Mataupu 15

Aiseā ua Ou Soona Matamuli Ai?

“E FAI mai uma lava tagata ia te aʻu e ese loʻu aulelei,” sa tusi atu ai se tamaʻitaʻi talavou i se nusipepa. Peitaʻi sa ia faaauau mai e faapea: “E iai soʻu faafitauli i le talanoa atu i tagata. Afai ou te tilotilo saʻo i mata o se tasi a o tautala, e mu oʻu foliga ma tau nofo ai laʻu mānava . . . I le galuega ou te faalogo ai i ni faamatalaga e faatatau i loʻu ‘fiasisi’ ona o loʻu lē tautala i se tagata. . . . Ou te lē fiasisi, ae ona e pau lava ou te matamuli.”

Ua faaalia e se tasi o suʻesuʻega e faapea o le 80 pasene o i latou sa fesiligia sa iai se taimi o o latou olaga sa matamumuli ai, ma le 40 pasene o iai pea le manatu o i latou o ni ē e matamumuli. O le mea moni, o le matamuli na taatele i tagata mai lava i taimi anamua. Ua taʻu mai e le Tusi Paia ia i tatou e faapea o le matamuli na faafiti ai Mose e avea ma fofoga fetalai a le Atua i luma o le nuu o Isaraelu. (Esoto 3:11, 13; 4:1, 10, 13) E foliga mai foʻi sa matamuli le soo Kerisiano o Timoteo ma sa faatalatū e tautala atu ma faatino lelei lana pule.—1 Timoteo 4:12; 2 Timoteo 1:6-8.

Le Mea ua Taʻua o le Matamuli

O le matamuli o se faalogona lē toʻa lea i le feagai ai ma tagata—tagataese, o ē e iai le pule, o tagata o le isi ituaiga, po o lau lava tupulaga. O le matuā popole o le tagata ia te ia lava ua aafia i latou i ni auala eseese. O nisi e mamā; e tilotilo i lalo ma tātāvale le fatu, ua lē mafai ai ona tautatala. O nisi ua leai so latou toʻafilemu ma ua amata ona tautalatala ai lava. Peitaʻi o isi ua faafaigatā ona tautatala ma faaleo mai ni o latou lava manatu po o mea e mananaʻo i ai.

Ae o le mea moni, o loo iai ni vala lelei pe afai e iai sina matamuli. E fesootaʻi ma le lotomaulalo ma le faamaualalo, ma o se tasi o mea e fia silasila i ai le Atua ma e finagalo i ai, o le ‘savavali ma ia ma le loto faamaulalo.’ (Mika 6:8) E iai aogā e sili atu i le foliga faautauta ma le filemu, e lē fiapule ma e lē faatoatoa. O se tagata matamuli e masani lava ona avea ma sē e faalogologo lelei. Ae pe afai o le mā e taofiofia ma faalavelavea ai i tatou mai le iloaina o lo tatou tomai atoa, ma faaleagaina ai a tatou faiā, galuega, ma faalogona, o le taimi la lenei ua tatau ona galue ia manumalo mai ai!

O le amataga lelei lava o le malamalama lea i le faafitauli. (Faataoto 1:5) O le matamuli e na te lē faamatalaina le ituaiga o tagata e iai oe; e faamatala mai ai ou uiga, lau tali atu i tulaga eseese e tulaʻi mai, le faaaʻoaʻoga ua e iloaina ma faamalosia ai i mea na tutupu ia te oe ma isi. E te manatu ua faia e isi ni faaiʻuga lē lelei e uiga ia te oe, e latou te lē fiafia ia te oe. E te manatu o isi e lelei atu pe sili foʻi lo latou toʻafimālie na i lo oe. E te manatu o le a sesē uma le gasologa o mea pe afai e te taumafai e fesootaʻi atu i isi tagata. E te faatalitalia e lē iʻu lelei mea uma, ma e masani lava ona faapena—auā ua e lē toʻa lelei ma gaoioi e tusa ai ma ou lava talitonuga.

Le Auala e Aafia ai Lou Olaga e le Matamuli

E ala i lou faaesea mai, lē tautala, po o le alu uma o le taimi mo oe lava ua e lē uaʻi atu ai i isi, e mafai ona e avatu ai se uiga faapea e te fiasisi, e lē faaleuō, ua fiu, po o le oo lava foʻi ina lē kea pe lē ano atu. Pe a e manatunatu ifo ia te oe lava, e faigatā la ona uaʻi atu i le talanoaga o faia i lea taimi. Ona itiiti ai lea o lou uaʻi atu i le faamatalaga o loo e maua. O lea la, ua tupu loa le mea e sili ona e fefe i ai—ua e foliga atu e te faavalevalea.

O lona uiga, ua e lokaina oe i totonu o le falepuipui o le matamuli ma ua e tiaʻia le ki. Ua e faatagaina ni avanoa lelei e mou ese atu ma oe. Ua e taliaina mea po o tulaga e te lē o manaʻo moni i ai—ona o le pogai autū, o lou fefe e tautala atu ma faailoa atu lou manatu. Ua e misia le olioli e maua mai le faafeiloaʻia o tagata ma faia ni uō fou po o le faia o mea o le a faaleleia atili ai lou olaga. Ae o le a misia foʻi e nisi. O le a lē taitai ona latou iloa le tagata moni e iai oe.

Foʻia le Matamuli

E ala i le taimi ma taumafaiga, e mafai ona suia ai lea uiga. O le mea muamua lava, ia soia le popole po o faamasinoina mai e le isi tagata oe. Atonu o loo pisi tele o ia e mafaufau mo ia lava ma le mea o le a ia tautala atu ai ma fai. Ma afai o lena tagata e taufaalili pei se tamaitiiti ia te oe, ia e malamalama ua iai sona faafitauli. “O lē e taʻufaatauvaaina lona tuaoi e lē sagatonu sona mafaufau.” (Faataoto 11:12, Revised Standard Version) O i latou o ē e tatau ona faauō atu i ai o le a latou faamasinoina oe e lē i ou foliga mai i fafo ae o le ituaiga tagata e iai oe.

E lē gata i lea, ia taumafai e mafaufau i se tulaga mautinoa. E leai se tasi o i tatou e lelei atoatoa; o i tatou uma lava e iai mea e tatou te lelei ai ma e iai ma o tatou vaivaiga. Ia manatua, e eseese auala e manatu ai i mea, e eseese mea e mananaʻo i ai ma mea e lē mananaʻo i ai. O le eseese o manatu e lē faapea ai o se teena o oe.

Ia iloa faamasino isi ma le tonu. Ua faapea mai se tasi tama talavou sa matamuli lava: “Ua ou iloaina ni mea se lua e uiga ia te aʻu lava ia . . . Muamua, sa tele ina ou manatu ifo lava ia te aʻu. Sa ou mafaufau tele ia te aʻu lava, ma popole po o ā manatu o tagata i saʻu tala e fai atu. Lona lua, sa ia te aʻu ni mafaufauga lē mautonu i uunaʻiga o gaoioiga a isi—lē talitonuina i latou ma manatu ai faapea e latou te vaai maualalo ia te aʻu.”

Sa auai se tama talavou i se sauniga a Molimau a Ieova. “Sa ou faalogo ai i se lauga iinā sa aogā moni lava ia te aʻu,” o lana tala lea. ‘Sa faamatilatila mai e le failauga faapea o le alofa e fiafia e faamasani atu i isi; o lona uiga afai e ia te oe le alofa e te manatu i mea e sili ona lelei o le tagata, ae lē o le mea e sili ona leaga. O lea na ou aʻoaʻoina ai le lafoaʻia o le faauiga leaga o uunaʻiga o gaoioiga a tagata. Sa ou faapea ifo ia te aʻu lava: “O le a latou malamalama, o le a latou agalelei, o le a latou magafagafa.” Ona amata ai lea ona ou talitonu i tagata. Sa ou iloaina e iai nisi atonu e tuuaʻia sesē aʻu, ae ua ou lagonaina nei o lo latou lava lena faafitauli.’

“Sa ou iloaina ai foʻi le manaʻomia ona amata faaalia le alofa e ala i gaoioiga—ia tatala atili atu aʻu i isi,” o lana faamatalaga lea. “Sa ou faataʻitaʻia muamua lava i talavou laiti. Ona sosoo ai lea ma loʻu asiasi atu i isi i o latou aiga. Sa ou aʻoaʻoina ai le mataalia i o latou manaʻoga, le mafaufau i nisi vala e fesoasoani ai ia i latou.” O lea na faapea ai ona ia aʻoaʻoina le moni o le fautuaga a Iesu i le Luka 6:37, 38 e faapea: “Aua tou te faamasino atu, ona le faamasinoina mai ai lea o outou; aua tou te faasala, ona le faasalaina mai ai lea o outou. . . . Ia outou foai atu, e foaiina mai ai ia te outou. . . . Auā o le fua tou te fuaina atu ai, e fuaina mai ai ia te outou.”

Faia se Amataga

O lea ia faamasani i le fiafia atu i isi—i le faatalofa atu ma amata se talanoaga. E mafai ona faafaigofie e pei o le faia o se tala e uiga i le tau. Ia manatua: E na o le 50 pasene le tiute tauave lea e ia te oe. O le isi ʻafa e fai e le isi tagata. Afai e sesē lau tautala, aua neʻi iai sou lagona ua faasalaina. Afai e toē isi, ia toē faatasi ma i latou. I le faapea atu “Na lē saʻo le faamatalaga,” o le a fesoasoani lena ia te oe e sologa lelei ai ou faalogona ma faaauau ai pea le talanoaga.

Ia laʻei i se auala e fetaui ma ou faalogona, ae ia faamautinoa o ou laʻei e mamā ma mafolafola. O le iai o le faalogona faapea ua lelei ou foliga vaaia o le a faaitiitia ai popolega i lea itu ma mafai ai ona e uaʻi atu i le talanoaga. Ia tū saʻo—ae ia toʻa. Ia tiotio le vaai ma ia laumata ʻataʻata. Ia tausisia le fetepaʻi ma faaleuō ma ia lue lou ulu pe tali mautinoa atu i mea o fai mai ai le isi tagata.

Afai e fesagaʻi ma se tulaga faigatā, e pei o le faia o se lauga i luma o isi po o se faatalanoaga o se galuega, ia alu i ai ae ua lava saunia lelei. Ia muaʻi faataʻitaʻi mea o le a e tautala atu ai. O faafitauli i le tautala e mafai foʻi ona foʻia pe faaitiitia e ala i le faataʻitaʻi. O le a alu ai le taimi, e pei lava foʻi ona faia ina ia maua ai so o se isi lava tomai fou. Ae te iloaina loa iʻuga mautinoa, o le a atili ai ona faalaeiauina oe ina ia taulau manuia.

Aua foʻi neʻi galo le fesoasoani e mafai e le Atua ona tuuina atu. O Saulo, le uluaʻi tupu o le nuu anamua o Isaraelu, sa matuā matamuli i le taimi muamua. (1 Samuelu, mataupu 9 ma le 10) Ae ina ua oo mai le taimi na gaoioi ai, “ona osofia lea o Saulo e le Agaga o le Atua,” ma ia taʻitaʻia ai tagata i le manumalo.—1 Samuelu, mataupu 11.

I aso nei ua iai i talavou Kerisiano se tiute tauave e fesoasoani ai i isi e aʻoaʻo e uiga i le Atua ma lana lalolagi fou amiotonu ua folafolaina. (Mataio 24:14) O le tauaveina o lenei tala lelei ma le avea ma sui o le Pule e sili ona maualuga o le vateatea e mautinoa le uunaʻia ai o le mautinoa totino o se tasi ia te ia lava ma fesoasoani ai ina ia lē taulaʻi atu ona mafaufauga ia te ia lava. E mafai la ona e mautinoa faapea, afai e te auauna faamaoni i le Atua, o le a ia faamanuia atu ia te oe ma fesoasoani ia te oe e foʻia lou matamuli.

Fesili mo Talanoaga

◻ O le ā tonu lava le matamuli, ma e faapefea e se tagata matamuli ona amioaʻi i luma o isi? Pe iai ni tulaga o tupu moni ai lava ia te oe?

◻ Aiseā e lē mautonu ai le tagata matamuli pe a iai faatasi ma isi?

◻ E mafai faapefea e le matamuli ona avatu ai i se tagata le faalogona ua ia misia nisi mea?

◻ O ā nisi o auala e foʻia ai le matamuli? Po o aogā ea nisi o nei fautuaga ia te oe?

[Faamatalaga faaopoopo i le itulau 121]

O le tagata e matamuli e na te misia fefaauōaʻiga ma avanoa lelei

[Pusa i le itulau 124]

E mafai ona e foʻia le matamuli e ala i le

Manaʻo e sui ma talitonu faapea e mafai moni lava ona fai se suiga

Suia mafaufauga lē mautinoa i gaoioiga mautinoa

Faataatitia ni sini aogā ma le uigā mo oe lava

Iloaina o le auala e toʻafimālie ma onosaia ai popolega

Muaʻi autalu se mea e fai a o lava le taimi

Mauaina o le lagona mautinoa i ni mea na tutupu ma sa faaauau ona taulau manuia

Manatua e iai eseesega o manatu ma e sesē foʻi isi tagata

Faataʻitaʻi ona faateleina tomai ma aʻoaʻoina ni tomai fou

Aapa atu e faaalia le alofa ma ia fesoasoani atu i isi

Laʻei i se tulaga onomea ma gaoioi ma le mautinoa

Faalagolago atu i le fesoasoani e foaʻiina mai e le Atua

Faia o se sao i sauniga faa-Kerisiano ma tufa atu lou faatuatuaga i isi

[Ata i le itulau 123]

O le tagata e matamuli e mafaufau o ia faapea e manatu faatauvaa atu isi ia te ia

[Ata i le itulau 125]

Ia faataʻitaʻi ona fiafia atu i isi—ia laumata ʻataʻata, ia faafeiloaʻi atu isi, ma ia faia se talanoaga ma isi