Mataupu 27

Faamaoni—Po o le Auala Sili Moni Lea?

PO UA faaosoosoina ea oe e pepelo? Sa taʻu atu e Tolo i lona tinā ua uma ona faamamā lona potu, ae o le mea moni, sa ia tauʻaiina mea uma i lalo o le moega. Na taumafai Risati e fai se taumafaiga sesē o le faasee lea o ona mātua. Sa ia taʻu atu ia i laʻua ua paʻū maulalo ona togi talu ai e lē o lona lē suʻesuʻe, ae o le ‘lē lelei o le la va ma le faiaʻoga.’

O mātua ma isi tagata matutua e masani lava ona latou iloa lelei atu ia ituaiga o togafiti. Peitaʻi e lē mafai lava ona taofia ai le toʻatele o talavou mai uunaʻiga e pepelo, faapiʻo le mea moni, po o le faia o le lē faamaoni pe a foliga mai e lelei ai. E lē o taimi uma e tali filemu atu ai mātua i faafitauli. Ma afai ua lua itula lea ua e tuai mai ai na i lo le taimi sa tatau ona e taunuu ai, e foliga mai e faaosoosoina oe e faapea atu sa iai se faalavelave telē na tupu i luga o le alatele, na i lo lou taʻu i ou mātua o le mea moni—ua galo ia te oe le taimi.

O le aʻoga atonu e mafai ona aumaia ai le isi luʻi o le faamaoni. E masani ona lagona e tamaiti aʻoga faapea ua tele naʻuā meaaʻoga. O tauvāga e faia ma le lē alofa e masani ona tulaʻi mai. O le mea moni, ua faaalia i suʻesuʻega i le Iunaite Setete e faapea, e sili atu i le ʻafa o tamaiti aʻoga e lē o faamaoni pe na iai foʻi se taimi na latou faia ai faapea. Peitaʻi a o foliga mai e manaia tele le faia o se pepelo, ma o faiga lē faamaoni o le auala faigofie lea e sao ai, ae pe aogā moni lava le lē faamaoni?

Pepelo—Aiseā e Lē Lelei Ai

O le pepelo ina ia ʻalofia ai se faasalaga, atonu e foliga mai e maua ai ni lelei i lena taimi. Ae ua lapataʻi mai le Tusi Paia: “Ma le ua tala pepelo, e le sao lava ia.” (Faataoto 19:5) E foliga mai e tele avanoa o le a faaalia ai le pepelo ma tuuina atu ai le faasalaga. O lea la o le a feita ou mātua e lē gata i lou sesē lea na fai ae faapea foʻi ma lou pepelo ia i laʻua!

Ae ā faiga lē faamaoni i le aʻoga? Ua faapea mai se tasi e faauluulu i ai polokalame tau faamasinoga i le aʻoga: “So o se tamaitiiti aʻoga e faia se gaoioiga lē faamaoni tau aʻoaʻoga o le a oo i se lamatiaga mataʻutia o le faaleagaina o avanoa mo nisi aʻoaʻoga ma galuega i le lumanaʻi.”

O le mea moni, e toʻatele e foliga o loo lē faamaoni ae lē o āfaina ai lava. O le lē faamaoni po o le kopi atonu e maua ai ou togi e te pasi ai, ae o ā āuga mo le lumanaʻi? E lē taumate e te talitonu o se mea valea le faia o faiga lē faamaoni ina ia pasi ai i lau vasega o le aʻoaʻoina o le aau. Auā o le mea moni, o ai e manaʻo e tūtū i luga o le paʻumātū ona e lē iloa aau ae o la e fiafia uma isi e ʻauʻau i le vai! Ma afai e teʻi ua tulei oe i le vai, o lau amio lē faamaoni la o le a e malemo ai!

Ae ā le kopi i le numera po o le faitau? E moni, o iʻuga atonu o le a lē matuā iloga mai—i le taimi muamua. Peitaʻi afai e te leʻi aʻoaʻoina le tomai faavae i le poto tau aʻoaʻoga, atonu o le a e iloaina lou “paʻū maulalo” i avanoa tau galuega! Ma o se tusipasi e maua mai i le lē faamaoni o le a lē mafai ona tausia ai oe i le olaga. Ua faapea mai le Tusi Paia: “O le faupuegāoloa ua maua i le laulaufaiva pepelo, o le mea faatauvaa lea ua faataapeapeina.” (Faataoto 21:6) So o se mea lelei lava e mafai ona maua mai i le pepelo, e puupuu lona aogā e pei o le puao. Maʻeu le sili ona lelei mo oe pe a e faamalosi e suʻesuʻe, na i lo lou pepelo ma lē faamaoni i lau aʻoga! Ua faapea mai le Faataoto 21:5: “O mafaufauga o e filigā i galuega, na o le mau mea e iʻu i ai.”

Pepelo ma Lou Lotofuatiaifo

Sa tuuaʻia pepelo e se teine talavou o Masina lona tuagane mo le tataʻeina o se ipu teufale faapelepele, e ui na ia toe lagona mulimuli ane le uunaʻiga e taʻu atu lana pepelo i ona mātua. “E leaga oʻu faalogona i le tele o taimi,” o le faamatalaga lea a Masina. “Sa faatuatuaina aʻu e oʻu mātua, ae o lea ua ou lē faamaoni ia i laʻua.” Ua faataʻitaʻia lelei e lenei mea le tuuina atu e le Atua i totonu o le tagata o le malosi o le lotofuatiaifo. (Roma 2:14, 15) Na faatigāina Masina e lona lava lotofuatiaifo i ona lagona nofosala.

E moni, e mafai e se tagata ona filifili ia lē amanaʻia lona lotofuatiaifo. Ae o le tele na te faia ai le pepelo, o le tele foʻi lena na te lē toe lagona ai le sesē—‘ua faamuina o latou lava lotofuatiaifo i le uamea aasa.’ (1 Timoteo 4:2) Pe te manaʻo moni ea e iai sou lotofuatiaifo e mate?

Le Silasila a le Atua i le Pepelo

“O le laulaufaiva pepelo” o se tasi lea o mea ua “inosia e Ieova.” (Faataoto 6:16, 17) O le mea moni, o Satani le Tiapolo lava ia o le “tamā o le pepelo.” (Ioane 8:44) E lē o faia e le Tusi Paia se faaeseesega i pepelo lapopoa ma tamaʻi pepelo. “E leai se tala pepelo mai le upu moni.”—1 Ioane 2:21.

O le faamaoni e tatau ona avea ma mataupu faavae mo so o se tasi e manaʻo e avea ma uō a le Atua. Ua fesili mai le Salamo lona 15 e faapea: “Ieova e, o ai ea e nofo i lou fale fetafai? O ai ea e mau i lou mauga paia?” (Salamo 15 Fuaiupu 1) Seʻi o tatou iloiloina le tali o loo aumaia i isi fuaiupu e fā o loo sosoo ai:

“O le savali ma le amio sao, ma ua fai le amiotonu, ma tautala ma le faamaoni i lona loto.” (Salamo 15 Fuaiupu 2) Pe faatatau atu ea lena fuaitau i sē e gaoia mea i le faleoloa po o sē e lē faamaoni? Po o se tasi ea e pepelo i ona mātua po o le taumafai foʻi e faafoliga sesē atu? E mautinoa e leai! O lea pe afai e te manaʻo e avea oe ma uō a le Atua, e tatau ona e faamaoni, e lē gata i au gaoioiga ae faapea foʻi ma lou loto.

“O le ua le tuuaʻi fua i lona laulaufaiva, ua le agaleaga i le la te tuaoi, e le faatupu foi se mea e faalumaina ai le ua lata mai ia te ia.” (Salamo 15 Fuaiupu 3) Pe na iai ea se taimi na e faataga ai oe e te auai faatasi ma se vaega o talavou o ē faia tala lē alolofa, ma taufaaleaga i isi? Ia ati aʻe se uunaʻiga malosi e teena ai le auai faatasi i na ituaiga o talanoaga!

“O loo inosia e ia le ua leaga, a e viia e ia o e matatau ia Ieova; e tauto ia i le mea e tiga ai o ia, a e le ʻalo ai.” (Salamo 15 Fuaiupu 4) Aua neʻi avea ma au uō so o se tasi o talavou e talapepelo, e lē faamaoni, po o le gugutu e faatatau i amioga lē mamā; o le a latou faatalitalia oe e te faia ia lava mea. E pei ona mātauina e se talavou e igoa ia Peti: “O se uō lua te faia le pepelo o le a ia taʻitaʻiina oe i faafitauli. E lē o ia o se uō e mafai ona e talitonuina.” Ia saʻilia uō o ē faaaloalogia faatulagaga o le faamaoni.—Faatusatusa i le Salamo 26:4.

Po o e mātauina faapea e talisapaia e Ieova, pe “viia” i latou o ē tausia a latou upu? Seʻi faapea sa fai sau folafolaga e te fesoasoani i le tapenaina o le fale i le Aso Toonai nei, ae o lenei la ua valaaulia oe i se taaloga i lena aoauli. Po o le a māmā ea ia te oe lau folafolaga ma tou ō ma au uō, ae tuu ai i ou mātua e faia galuega, po o le a e tausia pea au upu?

“Ua le avane e ia ana tupe e fai ai taui faasili; e le talia e ia se mea alofa e faasala ai le ua le sala. O le ua faia ia mea e le faagaeetia lava ia e faavavau.” (Salamo 15 Fuaiupu 5) Pe lē moni ea o le matapeʻapeʻa o le māfuaaga autū lea o le kopi ma le lē faamaoni? O tamaiti aʻoga o ē kopi i suʻega e matapeʻapeʻa tele i togi latou te leʻi suʻesuʻe i ai. O tagata e faia faiga faatogafalea e sili atu ia i latou tupe na i lo le faamasinoga tonu.

E moni, ua tusitusi lima atu nisi i taʻitaʻi faapolotiki ma le ʻau faipisinisi o ē latou te faapiʻoina tulafono e faatatau i le faamaoni ina ia faia mea e mananaʻo ai. Peitaʻi o le ā le mautū lelei o le manuia o na ituaiga o tagata? Ua tali mai le Salamo 37:2 e faapea: “Auā e le pine ona seleeseina i latou e pei o le mutia; e mamae i latou e pei o le vao muʻa lauolaola.” Afai e lē maua ma faamāina e nisi, mulimuli ane o le a latou fesagaʻi ma le faamasinoga a Ieova le Atua. Peitaʻi o uō a le Atua, “e le faagaeetia lava.” Ua faamautinoaina mai lo latou lumanaʻi e faavavau.

Ati Aʻe ‘se Lotofuatiaifo Lelei’

Po ua lē iai ea la se māfuaaga malosi, e ʻalofia ai so o se ituaiga o pepelo? Sa taʻua e le aposetolo o Paulo ia lava atoa ai ma isi o ana aumea e faapea: “Auā o loo taofi i matou ua ia te i matou le loto fuatia ifo lelei.” (Eperu 13:18) Po o aafiagofie lou lotofuatiaifo i mea e lē moni? Afai e leai, ia toleniina e ala i le suʻesuʻe o le Tusi Paia ma lomiga faale-Tusi Paia e pei o Le Olomatamata ma le Ala Mai!

Ua faia faapea e le talavou o Peti, ma maua ai iʻuga lelei. Sa ia aʻoaʻoina e aua neʻi ufiufia faafitauli i se faupuʻega o talapepelo. Na uunaʻia o ia e lona lotofuatiaifo e alu atu i ona mātua ma talanoaina ma le faamaoni mataupu. I nisi o taimi na iʻu ai i lona mauaina o aʻoaʻiga. E ui i lea, na ia ioeina ‘ua lelei ona faalogona i totonu’ ona o lona faamaoni.

O le tautala faamaoni e lē o se mea e faigofie i taimi uma. Peitaʻi o lē e filifili ina ia taʻuina atu le mea moni o le a maua pea se lotofuatiaifo lelei, se faiā lelei ma ana uō moni, ae sili atu, o le faaeaga e avea ai ma sē e “nofo” i le fale fetafaʻi o le Atua! O lea la, o le faamaoni, ua lē gata ina avea ma auala moni e sili ona lelei, ae o se auala saʻo mo Kerisiano uma.

Fesili mo Talanoaga

◻ O ā nisi o tulaga e ono faaosoosoina ai se tasi e faia le pepelo?

◻ Aiseā e lē aogā ai le pepelo po o le lē faamaoni? Pe mafai ona e faataʻitaʻia lenei mea mai mea ua e mātauina e oe lava ia, po o mea ua tutupu?

◻ E faapefea ona faaleagaina e le tagata pepelo lona lotofuatiaifo?

◻ Faitau le Salamo 15. E faapefea e ona fuaiupu ona faatatau atu i le mataupu o le faamaoni?

◻ E mafai faapefea e se talavou ona ati aʻe se lotofuatiaifo e faamaoni?

[Faamatalaga faaopoopo i le itulau 212]

‘So o se tamaitiiti aʻoga e faia se gaoioiga lē faamaoni tau aʻoaʻoga o le a oo i se lamatiaga mataʻutia o le faaleagaina o avanoa i le lumanaʻi’

[Faamatalaga faaopoopo i le itulau 216]

E lē o faia e le Tusi Paia se faaeseesega i pepelo lapopoa ma tamaʻi pepelo

[Ata i le itulau 214]

E iloagofie e mātua faamatalaga ua faia e fai ma faamole- molega mo le lē usiusitai