Vaega 2

Se lalolagi e aunoa ma ni puapuaga

1, 2. O le ā le manatu ese ua iai i le toatele o tagata?

PEITAI, e matuā ese mamao foi manatu o le isi faitau miliona o tagata i le lalolagi atoa. O loo latou valoia se lumanai matagofie mo le fanau a tagata. Ua latou faapea mai, i inei lava i le lalolagi, ua toeitiiti ona iai lea o se lalolagi e saoloto atoa­toa mai amioleaga ma puapuaga. O loo latou mautinoa e faapea, ua toeitiiti ona tafiesea lea o mea leaga ae faavaeina se lalolagi fou atoatoa. Ua oo foi ina latou faapea mai o loo saunia nei le faavae o lena lalolagi fou!

² E talitonu nei tagata faapea o le a aunoa le lalolagi fou ma ni taua, faiga sauā, solitulafono, faamasinoga lē tonu ma le mativa. O le a avea o se lalolagi e aunoa ma ni maʻi, faanoanoa, loi­mata, e oo foi i le oti. O le taimi lena, o le a faasolo ai ina lelei atoatoa tagata ma ola ai e faavavau i le fiafiaga i se parataiso faalelalolagi. Ioe, e oo foi i ē ua maliliu o le a toe faatutūina mai ma maua le avanoa e ola ai e faavavau!

3, 4. Aiseā ua mautinoa ai e na tagata lo latou manatu?

³ Po o lenei ea manatu e uiga i le lumanai, ua na o se miti, pe na o ni mafaufauga? Leai, e matuā leai lava. O loo faavaeina lea i se faatuatuaga ua matuā mausalī e faapea, o lenei Parataiso o loo fotuai mai, e mautinoa atoatoa. (Eperu 11:1) Aiseā ua latou matuā mautinoa ai? Auā ua folafolaina mai lea e Lē na Foafoaina mea e ona le malosi uma lava.

⁴ Ua faapea mai le Tusi Paia e uiga i folafolaga a le Atua: “E lei iuvale se upu e tasi i upu lelei uma na fetalai mai ai Ieova lo outou Atua ia te outou; ua taunuu uma ia te outou, ua le iuvale se upu e tasi.” “E le se tagata le Atua e tala pepelo ai o ia, . . . ua fetalai mai o ia, na te le faia ea? ua fetalai mai foi o ia, na te le faataunuuina ea?” “Ua tauto Ieova o ʻau, o loo faapea mai, E moni, e pei ona ou manatu e faapea lava ona taunuu, e pei ona aʻu pule e faapea lava ona faatumauina.”​—Iosua 23:14; Numera 23:19; Isaia 14:24.

5. O ā fesili e manaomia ona taliina?

⁵ Peitai, afai sa fuafua e le Atua e faavaeina se parataiso faalelalolagi e aunoa ma ni puapuaga, aiseā la na ia faatagaina ai mea leaga ina ia muai tutupu? Aiseā na ia faatalitali ai mo le ono afe tausaga seia oo mai i le taimi nei ina ia faasaʻoina ai mea sese? Po ua faaalia ea i na senituri uma o puapuaga faapea e lē o silasila alofa mai le Atua ia i tatou, pe faapea foi e lē o soifua o ia?