E Mafai Ona E Manumalo Mai Faafitauli e Faaleagaina ai se Aiga

1. O ā faafitauli e lē o iloa atu o loo tutupu i nisi aiga?

UA FAATOʻĀ uma lava ona fufulu ma faaiila le taavale tuai. Ua iila atu ma ua pei lava o se taavale fou i ē o loo ui ane ma autilo mai i ai. Peitai i le pito i totonu e lē o aliali atu, o loo amata ai ona ʻati e le ʻele le tino o le taavale. Ua talitutusa lena ma tulaga o nisi aiga. E ui lava i le vaaiga atu i fafo o loo foliga lelei mea uma, ae o foliga ʻataʻata o loo nanā ai le fefe ma tiga. I totonu o le liʻo o le aiga e lē o iloa atu e isi tagata, o loo ʻati ai e mea ua ʻelea le filemu o le aiga. O faafitauli e lua e mafai ona māfua ai lenei aafiaga, o le pulea e le ava malosi ma sauāga.

LE FAALEAGAINA E MĀFUA MAI LE PULEA E LE AVA MALOSI

2. (a) O le ā le manatu o le Tusi Paia i le faaaogaina o le ava malosi? (e) O le ā le puleaina e le ava malosi?

² E lē o faasā e le Tusi Paia le faaaogaina talafeagai o le ava malosi, ae o loo faasā mai le onā. (Faataoto 23:20, 21; 1 Korinito 6:9, 10; 1 Timoteo 5:23; Tito 2:2, 3) Ae o le puleaina e le ava malosi, e sili atu sona faatatauga nai lo le onā; o le faaauau lea ona inuina le ava malosi e aunoa ma le pulea o le faaaogaina. E mafai ona pulea e le ava malosi tagata matutua. Ae o se faanoanoaga, e mafai foi ona pulea e le ava malosi le ʻau talavou.

3, 4. Faamatala mai aafiaga o le pulea e le ava malosi e oo i le paaga ma le fanau a lē o loo pulea e le ava malosi.

³ Ua leva ona faaalia mai e le Tusi Paia o le faaaogaseseina o le ava malosi e mafai ona saveʻu ai le filemu o se aiga. (Teuteronome 21:18-21) O aafiaga leaga e pei ua ʻelea o le pulea e le ava malosi e aafia ai le aiga atoa. Atonu o le a matuā uaʻi atu le avā i ana taumafaiga e taofia lana paaga mai le pulea e le ava malosi po o le tau faafesagaia o ana amioga femoumouai.a E taumafai le avā e nanā uma ava malosi, tiaʻi ese, nanā tupe a lana tane, ma augani atu mo sona alofa i le aiga, ma manumanu i le ola, ma sona alofa foi mo le Atua​—ae o loo inu pea le tagata ua pulea e le ava malosi. A o lē taulau pea la ana taumafaiga ina ia taofia le pulea e le ava malosi o lana tane, e oo ai ina lagona e le avā le tiga ma le lē faamalieina. Atonu e amata ona oo ia te ia mafatiaga o le fefe, le ita, le lagona nofosala, le lē mautonu, le popole vale, ma lona lē toe fiafia ia te ia lava.

⁴ E lē o sao mai ai le fanau mai aafiaga o le pulea e le ava malosi o se matua. Ua matuā sasaina nisi tamaiti. O isi ua faaleagaina i faiga faaleituaiga. Atonu e oo ina latou tuuaʻia i latou lava i le tulaga ua pulea ai se matua e le ava malosi. E masani lava o o latou lagona o le faatuatuaina o isi ua faaluafesasi ona o uiga fesuisuiai o lē o loo pulea e le ava malosi. Talu ai le lē mafai ona latou talanoa toafilemu e uiga i mea o loo tutupu i le aiga, atonu e manatu ai tamaiti e nanā o latou faalogona, ma e masani ona oo ai i āuga leaga i le tino. (Faataoto 17:22) O na tamaiti atonu o le a faaauau pea ona latou tauave atu nei lagona o le lē mautinoa ma le lē fiafia o i latou lava ia i latou, a o faasolo atu ina avea ma tagata matutua.

O LE Ā E MAFAI ONA FAIA E LE AIGA?

5. E mafai faapefea ona foia le puleaina e le ava malosi, ma aisea ua faigata ai lenei mea?

⁵ E ui lava ina toatele tagata o loo suesueina lenei mataupu ua latou faapea mai e lē mafai ona foia le puleaina e le ava malosi, ae o le toatele e ioe, e mafai ona iai sina suiga e ala i le polokalame o le aua lava neʻi toe paʻi i le ava malosi. (Faatusatusa i le Mataio 5:29.) Peitai, o le taumafai ina ia talia e le tagata ua pulea e le ava malosi lenei polokalame, o se mea e faigofie ona tautala i ai ae faigata ona faatino, auā e masani lava ona ia faafiti mai e lē o iai sona faafitauli. Ae pe a fai e tagata o le aiga ni gaoioiga e foia ai le tulaga lea ua latou aafia ai ona o lē o loo pulea e le ava malosi, atonu o le a amata ai e lē o loo pulea e le ava malosi ona ia iloa o loo iai sona faafitauli. O se fomaʻi e iai sona poto masani i le fesoasoani atu i ē ua pulea e le ava malosi, ma o latou aiga, na ia faapea mai: “Ou te manatu o le itu e pito sili ona tāua o le taumafai o le aiga e faaauau pea i a latou gaoioiga o aso taitasi i se auala e sili ona aogā latou te mafaia. E oo ai lava ina matuā iloa e lē o loo pulea e le ava malosi le telē o le eseesega i le va o ia ma isi uma tagata o le aiga.”

6. O le ā le puna e sili ona lelei mo fautuaga, i aiga o loo iai se tasi ua pulea e le ava malosi?

⁶ Pe afai o loo iai i lou aiga se tasi ua pulea e le ava malosi, e mafai la e fautuaga faagaeeina a le Tusi Paia ona fesoasoani ia te oe i le ola i se olaga e sili ona aogā e mafai ai. (Isaia 48:17; 2 Timoteo 3:16, 17) Seʻi iloiloina nisi o mataupu silisili ua fesoasoani i aiga e faafetaiaia ai ma le manuia le tulaga o le puleaina e le ava malosi.

7. Pe afai ua pulea e le ava malosi se tasi o le aiga, o ai e tuuaʻia?

⁷ Aua e te tuuaʻia na o oe i taimi uma. Ua faapea mai le Tusi Paia: “Auā e taitasi ma ave i lana lava avega,” ma “e taitasi i tatou ma tala i lana amio i le Atua.” (Kalatia 6:5; Roma 14:12) Atonu e taumafai lē o loo pulea e le ava malosi e faapea mai e tuuaʻia tagata o le aiga. Mo se faaaoaoga, e ono faapea mai o ia: “Pe ana fai tou te faia lelei aʻu, semanū e lē puleaina aʻu e le ava malosi.” Pe afai e foliga mai o loo ioe i ai manatu o isi, o lona uiga o loo latou uunaia pea o ia e faaauau ona pulea e le ava malosi. Ae tusa lava pe ua tatou mafatia i tulaga ua tutupu mai, pe mafatia ona o isi tagata, ae o i tatou uma lava​—e aofia ai ma ē ua pulea e le ava malosi​—e tuuaʻia i mea tatou te faia.​—Faatusatusa i le Filipi 2:12.

8. O ā nisi o auala e mafai ona fesoasoani atu ai i le tagata ua pulea e le ava malosi ina ia malamalama o ia i iuga leaga o lona faafitauli?

⁸ Aua e te manatu faapea e tatau lava ona e puipuia i taimi uma lē o loo pulea e le ava malosi mai āuga e oo i ai lana inugā ava malosi. O se faataoto a le Tusi Paia e faatatau i se tasi ua lotoa e mafai foi ona tutusa lona faatatauina atu i lē o loo pulea e le ava malosi e faapea: “Afai e te laveai ia te ia, e te toe faapea foi.” (Faataoto 19:19) Tuu ai pea i le tagata ua pulea e le ava malosi ina ia ona lagona le mafatia i iuga leaga o lana inugā ava malosi. Tuu i ai na te tapenaina mea na ia faaleaga po o le telefoni atu foi i lona pule o le galuega e faamatala i ai, i le taeao e sosoo ai pe a uma lana inuga sa fai.

9, 10. Aisea e ao ai i aiga o loo iai tagata ua pulea e le ava malosi ona talia ni fesoasoani, ae o ai patino lava e ao ona latou saili atu i ai mo le fesoasoani?

⁹ Ia talia fesoasoani mai isi. Fai mai le Faataoto 17:17: “E alofa le uo i aso uma lava; a e fanau le uso mo le aso vale.” Pe afai e iai i lou aiga se tagata ua pulea e le ava malosi, o loo iai la ni mafatiaga. E te manaomia se fesoasoani. Aua le faatalatū e faalagolago atu i ʻuo moni’ mo se lagolagosua. (Faataoto 18:24) O le talanoa ma isi o ē e malamalama i le faafitauli po o ē ua fesagai foi ma se tulaga e tali faapena atonu e aumaia ai ia te oe ni fautuaga aogā i le mea e fai ma le mea e lē faia. Ae ia iai le paleni lelei. Ia talanoa atu ia i latou e te faatuatuaina, o ē o le a latou puipuia au “upu faalilo.”​—Faataoto 11:13.

¹⁰ Ia taumafai e faatuatuaina toeaina Kerisiano. O toeaina i le faapotopotoga Kerisiano e mafai ona avea ma puna sili o fesoasoani. O nei tane taʻumatuaina ua aʻoaʻoina i latou i le Afioga a le Atua ma ua latou faatatauina ona mataupu silisili. E mafai ona faamaonia le avea o i latou “e pei o se lafitaga i le matagi, ma se mea e malu ai i le afā; e pei o vaitafe i le nuu naumati, e pei o le paolo foi o le papa tele i le nuu ua le o i ai se vai.” (Isaia 32:2) E lē gata ina puipuia e toeaina Kerisiano le faapotopotoga atoa mai aafiaga leaga, ae latou te faamafanafana atu foi, faalaeiau atu, ma naunau totino atu i ē o loo iai faafitauli. Ia matuā faaaogā atoatoa la latou fesoasoani.

11, 12. O ai e saunia le fesoasoani sili mo aiga o loo iai tagata ua pulea e le ava malosi, ma ua faapefea ona avatu lena lagolagosua?

¹¹ O le sili i na mea uma, ia saili i le malosi mai ia Ieova. Ua faamautinoa mai ma le māfana le Tusi Paia ia i tatou: “Ua latalata mai Ieova i e ua loto momomo; ua ia faaola foi i e ua loto nutimomoia.” (Salamo 34:18) Pe afai o e lagona le loto momomo po o le loto nutimomoia ona o omiga o le mafuta ma se tagata o le aiga o loo pulea e le ava malosi, ia e iloa o loo “latalata mai Ieova.” E malamalama o ia i le faigata o le tulaga o loo iai lou aiga.​—1 Peteru 5:6, 7.

¹² O le talitonu i mea o loo fetalai mai ai Ieova i lana Afioga e mafai ona fesoasoani ia te oe ina ia e manumalo ai mai le soona popole. (Salamo 130:3, 4; Mataio 6:25-34; 1 Ioane 3:19, 20) O le suesueina o le Afioga a le Atua ma le ola aʻe e tusa ma ana mataupu silisili ua mafai ai ona e mauaina le fesoasoani o le agaga paia o le Atua, lea e mafai ona faaauupegaina ai oe i le ʻmana e sili atu nai lo le mea e masani aʻi’ ina ia e onosaia le tasi aso ma aulia atu ai le isi aso.​—2 Korinito 4:7.b

13. O le ā le faafitauli lona lua ua faaleagaina ai le tele o aiga?

¹³ O le faaaogaseseina o le ava malosi e mafai ona taʻitaʻia atu ai i le isi faafitauli lea e faaleagaina ai le tele o aiga​—o sauāga i totonu o aiga.

LE FAALEAGAINA E MĀFUA MAI SAUĀGA I TOTONU O AIGA

14. O anafea na amata mai ai sauāga i totonu o aiga, ma o le ā le tulaga ua iai i aso nei?

¹⁴ O le uluai gaoioiga sauā lava i talafaasolopito o tagata o le sauāga lea i totonu o le aiga na aafia ai le auuso e toalua, o Kaino ma Apelu. (Kenese 4:8) Talu mai lena taimi, ua malaia ai tagata i so o se ituaiga o sauāga i totonu o aiga. Ua iai tane fasi avā, o avā e osofai atu i tane, o mātua e fasi leaga i a latou fanau laiti, ma fanau ua matutua aʻe ma latou agaleaga i o latou mātua ua matutua.

15. Ua faapefea ona aafia faalogona o tagata o aiga ona o sauāga i totonu o o latou aiga?

¹⁵ O le faaleagaina ua māfua i sauāga i totonu o aiga ua sili atu le matuia nai lo le na ona maʻilaʻila ai o le tino. Na fai mai se tasi avā e fasi soo: “E anoanoai faalogona leaga ma le maasiasi e ao ona ou fesagaia. O le tele o taeao, e na o loʻu manao lava e taoto ai pea i le moega, ma moomoo maimau pe ana faapea ua na o se miti leaga.” O fanau o loo mātauina pe ua oo foi i ai sauāga i totonu o aiga atonu o le a latou faasauā foi pe a matutua aʻe ma fai aiga.

16, 17. O le ā le faaleagaina o faalogona, ma ua aafia ai faapefea tagata o le aiga?

¹⁶ O sauāga i totonu o aiga ua lē o faamuta mai i le fasi. E masani lava ona fai atu osofaiga e ala i upu. Ua faapea mai le Faataoto 12:18: “O i ai lē soona tautala, e pei o tutuʻi i le pelu.” O nei “tutuʻi” o loo faamatala ai sauāga i totonu o aiga e aofia ai le lafo atu o ni igoa fāifai ma le feei, faapea ma faitioga e fai atu pea lava pea, o faaupuga fāifai e faamaasiasi ai, ma le faafefe atu i le fasi. O manuʻa ua tuia ai le loto ma faalogona e lē mafai ona vaaia ma e masani ona lē iloa mai e isi.

¹⁷ E sili atu ona faanoanoa le faamanuʻalia o faalogona o se tamaitiiti​—le faitioina pea lava pea ma le taʻufaatauvaaina o tomai o se tamaitiiti, lona maelega, po o ona tulaga tāua o se tagata. O na faiga leaga i faaupuga e mafai ona faaleagaina ai lagona mautinoa o se tamaitiiti ia te ia lava. E moni, e manaomia e tamaiti uma aoaiga. Peitai ua faatonu mai le Tusi Paia i tamā e faapea: “Aua neʻi faaita i a outou fanau, ina neʻi faapalapala i latou.”​—Kolose 3:21.

LE AUALA E ALOFIA AI SAUĀGA I TOTONU O AIGA

18. O fea e amata mai ai sauāga i totonu o aiga, ma o le ā le auala ua faaalia e le Tusi Paia e mafai ona taofia ai?

¹⁸ O sauāga i totonu o aiga e amata mai i le loto ma le mafaufau; o le auala tatou te gaoioi ai e amata mai i le auala tatou te mafaufau ai. (Iakopo 1:14, 15) Ina ia taofia sauāga, e manaomia e lē o loo faasauā ona suia le ala o ona mafaufauga. (Roma 12:2) Pe mafai ea lena mea? Ioe. Ua iai i le Afioga a le Atua le mana e suia ai tagata. E mafai ona ia lepeti e oo lava i “ʻolo” o manatunatuga leaga. (2 Korinito 10:4; Eperu 4:12) O le poto saʻo o le Tusi Paia e mafai ona fesoasoani e faatupuina ai se suiga atoatoa i tagata o ē ua faapea mai ua latou ofuina le tagata fou.​—Efeso 4:22-24; Kolose 3:8-10.

19. E ao faapefea ona vaai ma tausia e se Kerisiano lana paaga faaipoipo?

¹⁹ Le vaaiga i le paaga faaipoipo. Ua faapea mai le Afioga a le Atua: “O loo faapea ona tatau ona alolofa o tane i a latou lava avā, faapei o latou lava tino; o lē alofa i lana lava avā, o loo alofa o ia ia te ia lava.” (Efeso 5:28) Ua faapea mai foi le Tusi Paia e ao i se tane ona avatu i lana avā le “ava . . . auā o le ipu ia ua sili ona vaivai.” (1 Peteru 3:7, LT ) Ua lapataia avā ia “alolofa atu i a latou tane” ma ia ʻfaaaloalo loloto’ mo a latou tane. (Tito 2:4; Efeso 5:33) E mautinoa e leai se tane e mataʻu i le Atua, e mafai ona finau mai ma le saʻo e faapea o loo matuā ava o ia i lana avā, pe afai o loo ia osofaia le avā i le fasi, pe i ni faaupuga foi. Ma e leai se avā o lē e ʻeʻe atu i lana tane, lafo atu i ai ni upu fāifai, po o le faamisa soo i ai, e mafai ona faapea mai e alofa moni o ia ma faaaloalo i lana tane.

20. I luma o ai o le a tali atu i ai mātua i le latou tiute tauave mo a latou fanau, ma aisea e lē tatau ai i mātua ona latou faatalitalia ni mea e lē mafai ona faataunuu e a latou fanau?

²⁰ Le vaaiga saʻo i le fanau. Ioe, e onomea ma e manaomia ona maua e le fanau le alofa ma le uaʻi atu i ai o o latou mātua. Ua taʻua e le Afioga a le Atua le fanau o “le tofi lea mai ia Ieova” ma o “le taui.” (Salamo 127:3) Ua iai i mātua le tiute tauave i luma o Ieova ina ia tausia lena tofi.” Ua taʻua e le Tusi Paia “uiga o se pepe” ma le “valea” o le tamaitiiti. (1 Korinito 13:11, NW; Faataoto 22:15) E lē tatau i mātua ona faateʻia pe a la fesagai ma le valea o loo iai i le la fanau. O tamaiti laiti e lē o ni tagata matutua. E lē tatau i mātua ona faatalitalia ni mea e sili atu nai lo mea e talafeagai ma le matua o se tamaitiiti, le tulaga e masani ai le aiga, ma le tomai.​—Tagai i le Kenese 33:12-14.

21. O le ā le auala faale-Atua e vaai ai i mātua ua matutua ma tausia ai i latou?

²¹ Le vaaiga i mātua ua matutua. Ua faapea mai le Levitiko 19:32: “Ia e tulai atu i luma o le ua ulu sinā, ia e ava foi i luma o le toeaina.” O lea sa uunaia e le Tulafono a le Atua le faaaloalo ma le manatunatu mamafa mo tagata matutua. E ono avea lenei o se luʻi pe afai e foliga mai e faasaulala tele se matua pe o loo maʻi foi ma lē mafai ai ona vave lana gaoioi ma lona mafaufau. E ui lava i lea, ua faamanatu mai i fanau ina ia “taui atu i o latou mātua.” (1 Timoteo 5:4) O le uiga o lenei manatu ia tausia i latou i le mamalu ma le faaaloalo, atonu e oo lava i le tausia o i latou i ni tulaga tau tupe. O le leaga o le tausiga o mātua ua matutua, i le itu faaletino pe faia i nisi tulaga, e mautinoa le feteenai ma le auala ua taʻu mai e le Tusi Paia ina ia tatou gaoioi ai.

22. O le ā le uiga autū i le foiaina o sauāga i totonu o aiga, ma e mafai faapefea ona faatinoina lea mea?

²² Ia atiina aʻe le pulea totino. Ua faapea mai le Faataoto 29:11: “O le vale, e sasaa uma mai e ia lona loto; a o le tagata poto, e taofiofi e ia lona loto i tua.” E mafai faapefea ona e pulea lou loto? Nai lo le faatupu aʻe o lagona ita i le loto, ia vave ona gaoioi e foia faafitauli ua mapuna aʻe. (Efeso 4:26, 27) Alu ese mai le mea o loo iai le faafitauli pe afai e te lagona e lē mafai ona e pulea lou loto. Ia tatalo atu mo le agaga paia o le Atua ina ia e atiina aʻe ai lou puleaina o oe lava. (Kalatia 5:22, 23) O le alu e savalivali pe auai atu i nisi gaoioiga faamalositino atonu e fesoasoani ia te oe e pulea ai ou faalogona. (Faataoto 17:14, 27) Ia taumafai e “faatoatoa” lou ita.​—Faataoto 14:29.

IA TETEʻA PE NONOFO FAATASI PEA?

23. O le ā e mafai ona tupu pe a faifai pea ma le lē salamō e se tasi o le faapotopotoga Kerisiano ona lolo atu i le lotoa, atonu e aofia ai le fasileagaina o tagata o lona aiga?

²³ Ua faatulaga e le Tusi Paia galuega e taʻusalaina e le Atua, “le feitagai, o le femisai, . . . le lotoa” ma taʻua ai e faapea, “o e faia mea faapena, e le fai le malo o le Atua mo latou tofi.” (Kalatia 5:19-21) O lea la, so o se tasi e faapea mai o se Kerisiano o lē e faifai pea ma le lē salamō ona lolo atu i le lotoa, atonu e aofia ai le fasileagaina o lana paaga po o le fanau, e mafai ona faateʻaeseina o ia mai le faapotopotoga Kerisiano. (Faatusatusa i le 2 Ioane 9, 10.) I lenei auala ua tausia ai le mamā o le faapotopotoga mai tagata sauā.​—1 Korinito 5:6, 7; Kalatia 5:9.

24. (a) Atonu o le ā le gaoioiga ua filifili nisi o paaga o loo sauāina ina ia fai? (e) E mafai faapefea e uo alolofa ma toeaina ona lagolagosua atu i se paaga o loo sauāina, ae o le ā e lē tatau ona latou faia?

²⁴ Ae faapefea Kerisiano o ē o loo fasi pea e se paaga sauā o lē e leai se faailoga e iloa ai se suiga? Ua filifili nisi e nonofo faatasi pea ma le paaga sauā ona o nisi o mafuaaga. O nisi ua filifili e ō ese, i le lagona faapea o lo latou maloloina faaletino, faalemafaufau, ma le faaleagaga​—atonu e oo foi i o latou ola​—ua iai i se tulaga lamatia. Po o le ā lava le mea e filifili lē o loo mafatia i sauāga i totonu o le aiga e fai e tusa ai o nei tulaga, o lana lava lea faaiuga i luma o Ieova. (1 Korinito 7:10, 11) Atonu o le a mananao ē alolofa e pei o uo, o tauaiga, po o toeaina Kerisiano, ina ia fesoasoani atu ma faufautua atu, peitai e lē tatau ona latou taʻu atu i lē o loo mafatia se gaoioiga patino e fai. O lena tulaga o le filifiliga lava lea e faia e le paaga o loo mafatia.​—Roma 14:4; Kalatia 6:5.

SE IUGA I FAAFITAULI E FAALEAGAINA AI

25. O le ā le fuafuaga a Ieova mo le aiga?

²⁵ Ina ua tuufaatasia e Ieova Atamu ma Eva i le faaipoipoga, sa lei iai lava sana fuafuaga ina ia faatamaʻia aiga e ala i faafitauli e faaleagaina ai e pei o le pulea e le ava malosi po o sauāga. (Efeso 3:14, 15) Sa tatau ona avea le aiga o le nofoaga e tumu i le alofa ma le filemu, ma e tatau ona tausia ai manaoga faalemafaufau, o faalogona, ma le faaleagaga o ona tagata taitoatasi. Peitai, ina ua tulai mai le agasala, sa vave ona faaleagaina le olaga faaleaiga.​—Faatusatusa i le Failauga 8:9.

26. O le ā le lumanai o loo faatalia maia i latou o ē taumafai ina ia ola e ogatusa ma fuafuaga a Ieova?

²⁶ E fiafia lava, ona ua lē o lafoaia e Ieova lana fuafuaga mo le aiga. Ua ia folafola mai le taʻitaʻia atu i se lalolagi fou filemu lea e iai tagata o le a “nonofo fifilemu, e leai foi se na te faamatau ia te i latou.” (Esekielu 34:28) I lena taimi, o le a avea ai le pulea e le ava malosi, o sauāga i totonu o aiga, ma isi uma faafitauli o loo faaleagaina ai aiga i aso nei, o ni mea o taimi ua tuanai. O le a ʻataʻata mai tagata, e lē ina ia nanā ai le fefe ma tiga, ae ona ua latou maua le ʻmatuā fiafia ona o le manuia e tele.’​—Salamo 37:11.