Tala o le Malo Nu. 35
Pe e Iai ea se Taimi o le a Fealofani ai Tagata Uma?
Ua Mou Atu le Alofa i Tuaoi
E FAITAU miliona tagata ua iai lagona tuulafoaia ma le fememeai, ua lē iloa po o fea a tua i ai mo se fesoasoani. Na taʻua e se fafine faipisinisi ua litaea nei: ‘I se tasi afiafi na tuʻituʻi mai ai i loʻu faitotoa se fafine ua oti lana tane, o lē sa nofo i le fogafale lava lea ou te nofo ai, ma faapea mai ua ia lagona lava le tuua toatasi. Sa ou taʻu saʻo atu ma le faaaloalo ia te ia o loo tele aʻu mea o loo fai. Na ia faatoese mai ona o lona faalavelave ia te au ona toe foi lea.’
O le itu e faanoanoa ai, auā o le po lava lena, na pule ai lenei fafine i lona ola. Ina ua mavae lena mea, ona faapea mai lea o le fafine faipisinisi sa ia aʻoaʻoina mai ai iina se “lesona tāua tele.”
E masani ona matautia le leai o se alofa i tuaoi. A o faagasolo fetauaiga i le va o tagata o ituaiga i Bosnia ma Herzegovina, lea sa avea muamua ma vaega o Yugoslavia, e silia i le miliona tagata na tutuliesea mai o latou fale ma le faitau sefulu o afe na fasiotia. O ai na faia? “O o matou lava tuaoi,” o le tagi talatala mai lea a se teineitiiti o lē na aveesea mai lona nuu. “Sa matou masani ma i latou.”
E faitau selau afe tagata i Rwanda sa fasiotia, ma e masani ona faia e o latou lava tuaoi. Na lipotia mai e le New York Times e faapea: “[Sa nonofo] faatasi tagata Hutu ma tagata Tutsi, sa fefaaipoipoai, e lei popole lava pe tau mafaufau foi po o ai le Hutu a o ai le Tutsi. Ae faafuasei loa ona gāpā se mea, ua amata le fefasiotiaiga.”
E faapena foi le nonofo ma faifaimea faatasi o tagata Siu ma tagata Arapi i Isaraelu, ae o le toatele lava e ita le tasi i le isi. O le tulaga foi lena i le toatele o tagata Katoliko ma tagata Porotesano i Aialani, ma le vaega faatupulaia o tagata i isi atunuu. E leai lava se isi taimi muamua i le talafaasolopito ua faapea ai le leai o se alofa i le lalolagi.
Aisea ua Mou Atu ai le Alofa i Tuaoi?
Ua aumaia e Lē na Foafoaina i tatou le tali. Ua taʻua e lana Afioga, le Tusi Paia le taimi o loo tatou ola ai o “aso e gata ai.” O le vaitaimi lenei o loo faapea mai le valoaga a le Tusi Paia, o le a ‘leai se lotoaiga’ i tagata. E faatatau atu i nei “aso faigata,” ua taʻua ai foi i le Tusi Paia o “le vaitaimi faaiuiu o le faiga o mea,” lea na valoia e Iesu Keriso faapea “o le a maalili foi le alofa o le toatele o tagata.”—2 Timoteo 3:1-5; Mataio 24:3, 12, NW.
O le mea lea, o le leai o se alofa i aso nei, o se vaega lea o le faamaoniga e iloa ai o loo tatou ola nei i aso e gata ai o lenei lalolagi. O le itu e fiafia ai, auā e uiga foi i le lē o toe umi ona suia lea o lenei lalolagi o tagata faalemataʻu, i se lalolagi fou amiotonu e pulea e le alofa.—Mataio 24:3-14; 2 Peteru 2:5; 3:7, 13.
Ae pe o iai moni ea se mafuaaga tatou te talitonu ai e mafai ona faia lena suiga—e mafai e tagata uma lava ona aʻoaʻo e fealofani ma ia nonofo faatasi i le filemu?
Alofa i Tuaoi—O se Mea Moni
“O AI foi le tagata ma te tuaoi?” o le fesili lea a se loia o le uluai senituri ia Iesu. E lē taumatea sa ia faatalitalia Iesu e faapea atu, ‘O ou uso Iutaia.’ Peitai i le tala e uiga i se Samaria agalelei, na faaalia ai e Iesu o o tatou tuaoi foi tagata mai isi atunuu.—Luka 10:29-37; Ioane 4:7-9.
Na faamamafa e Iesu faapea, e sosoo atu i le alofa i le Atua, o le alofa lea i tuaoi ina ia taitaia ai o tatou olaga. (Mataio 22:34-40) Ae pe o iai ea se vaega o tagata o loo latou alolofa moni atu lava i o latou tuaoi? Na faia faapea e uluai Kerisiano! Sa iloga i latou ona o le alofa sa latou faaalia i isi.—Ioane 13:34, 35.
Ae faapefea i aso nei? Po o iai ea se tasi o faataitaia le alofa e pei o le alofa o Keriso? Ua taʻu mai e le Encyclopedia Canadiana: “O le galuega a Molimau a Ieova o le toe faafouina ma le toe faamautuina o le uluai Faa-Kerisiano lea na faatinoina e Iesu ma ona soo . . . O uso tagata uma lava.”
O le ā le uiga o lena mea? O lona uiga e leai se mea e faatagaina e Molimau a Ieova—e lē o le lanu, e lē o le atunuu, e lē o le ituaiga e tupuga mai ai—e faapogaia ai i latou e ita i o latou tuaoi. Latou te lē fasiotia foi so o se isi, auā ua latou tuʻiina faafaatusa a latou pelu e fai ma uamea o suotosina ma a latou tao e fai ma polo e teu aʻi vine. (Isaia 2:4) O le mea moni, ua mataulia Molimau ona o lo latou tausolomua e fesoasoani atu i o latou tuaoi.—Kalatia 6:10.
E lētioa ona taʻua e se tusi i le faatonu i le nusipepa a Kalefonia o le Sacramento Union e faapea: “E mafai ona faapea atu, pe afai e ola ai le lalolagi uma i le talitonuga a Molimau a Ieova, o lona uiga o le a faaiuina le faamasaatoto ma le feitagai, ae o le a faamautuina le alofa.” Na saunoa se tusitala o le mekasini a Hagakeri e taʻua o le Ring: “Ua faia laʻu faaiuga, pe ana faapea e na o Molimau a Ieova lava ia e ola i le lalolagi, semanu ua lē o toe iai ni taua, ma e na o le pau lava tiute a leoleo e fai o le faatonutonuina o taavale ma fai tusifolau o tagata.”
E ui i lea, ua ioeina, o se suiga e matuā telē lava i le lalolagi aoao o le a manaomia pe afai e mananao tagata uma ina ia fealofani. O le a faapefea ona oo mai lena suiga? (Faamolemole ia tagai atu i le itulau i le pito i tua.)
Le Taimi o le a Fealofani ai Tagata Uma
O LE tatalo lea na aʻoaʻoina e Iesu Keriso ua faaalia mai ai se suiga tele o loo lata mai. I lana Lauga taʻutaʻua i luga o le Mauga, sa aʻoaʻo ai e Iesu i tatou ia tatalo: “Ia oo mai lou malo, Ia faia lou finagalo, I le lalolagi e pei ona faia i le lagi.”—Mataio 6:10.
O le ā le Malo o le Atua? O se pulega moni, lea e pule mai le lagi. O le mafuaaga lena ua taʻua ai o “le malo o le lagi.” O Iesu, le “Alii o le filemu,” ua tofia e lona Tamā ina ia avea ma pule o lena malo.—Mataio 10:7; Isaia 9:6, 7; Salamo 72:1-8.
Pe a oo mai le Malo o le Atua, o le ā o le a tupu i lenei lalolagi ua faatumulia i le feitagai? O le a “tuʻimomomoina ma faaumatia” e “le malo” faiga malo piopio uma a lenei lalolagi. (Tanielu 2:44) Ua faamatala mai e le Tusi Paia: “E mavae atu foi le lalolagi, . . . a o lē fai le finagalo o le Atua, e tumau lea e faavavau.”—1 Ioane 2:17.
E tusa ai o le lalolagi fou a le Atua, ua faapea mai le Tusi Paia: “E fai lava le nuu [lalolagi] mo tagata amiotonu, e nonofo ai pea i latou.” (Salamo 37:9-11, 29; Faataoto 2:21, 22) Maeu se na taimi faamamaluina! “E leai foi se toe oti, po o se faanoanoa, po o se aue, e leai foi se toe puapuaga.” (Faaaliga 21:4) E oo lava i ē ua maliliu o le a toe ola mai, ma o le a faaliliuina le lalolagi atoa e avea ma parataiso moni.—Isaia 11:6-9; 35:1, 2; Luka 23:43; Galuega 24:15.
Ina ia ola ai i le lalolagi fou a le Atua, e tatau ona tatou fealofani, e pei lava ona aʻoaʻo mai i tatou e le Atua ia faia. (1 Tesalonia 4:9) Na faapea mai se tagata e aʻoga faale-Tusi Paia i se atunuu Asia: “O loo oʻu tulimatai atu i le taimi, e pei ona folafola mai e le Tusi Paia, o le a aʻoaʻoina ai e tagata uma lava ina ia fealofani pe alofa atu le tasi i le isi.” Ma e mafai ona tatou mautinoa o le a tausia e le Atua ana folafolaga! Ua Ia faapea mai: “Na ou fai atu ai . . . ou te faia lava.”—Isaia 46:11.
Peitai ina ia olioli i faamanuiaga i le Malo o le Atua, e tatau ona faagoto i lou loto le poto o le Tusi Paia, e pei ona faia e le faitau miliona o tagata loto faamaoni i le lalolagi aoao. (Ioane 17:3) O le a fesoasoani ia te oe le polosiua e 32 ona itulau O le ā e Manaomia e le Atua Mai ia i Tatou? Ia maua sau kopi e ala i le faatumu o le kuponi o loo i le itulau na mavae atu ma auina atu i le tuatusi o loo sili ona latalata ane i lou aiga.
[Ē Ana le Ata i le itulau 2]
Le tagata lima i fana ma le falelauasiga o se maliu i Bosnia: Reuters/Corbis-Bettmann