O Ai i Latou?

O LE faanaunauga o Molimau a Ieova ina ia e masani lelei iā i latou. Atonu pe o tou feiloa‘i ona o loo tou tuaoi, pe tou te faigaluega faatasi, pe i isi lava meafai o le olaga i aso ta‘itasi. Atonu sa e vaaia i latou i magāala, o loo ofo atu a latou mekasini i tagata feoa‘i. Pe atonu fo‘i na tou talanoa puupuu i se taimi na latou afea ai lou maota.

O le mea moni, e naunau Molimau a Ieova iā te oe ma sou manuia. E latou te fia faauō iā te oe ma ta‘u atu atili iā te oe faamatalaga e uiga iā i latou, o o latou talitonuga, la latou faalapotopotoga, ma o latou lagona e faatatau i tagata ma le lalolagi lea o loo tatou soifua uma ai. O le autū tonu lenā ua latou tapenaina ai lenei polosiua mo oe.

I le tele o tulaga, e tai pei lava Molimau a Ieova o isi tagata uma. E iai o latou faafitauli masani—i le tamaoaiga, i le tino, i faalogona. E iai taimi latou te faia ai mea sesē, auā e lē lelei atoatoa i latou, e lē o faagaeeina e se mana tauatua, pe faapea fo‘i ua lē mafai ona latou faia ni mea sesē. Peita‘i e latou te taumafai e a‘oa‘oina lesona mai mea e tutupu iā i latou, ma su‘esu‘e ma le filigā le Tusi Paia ina ia faia ai ni faasa‘oga mana‘omia. Ua latou tuuina atu i latou lava i le Atua ina ia faia lona finagalo, ma ua latou matuā taumafai ai e faataunuuina lenei tuuina atu. I a latou gaoioiga uma lava, e latou te sa‘ilia ai le ta‘ita‘iga mai le Afioga a le Atua ma lona agaga paia.

E matuā tāua lava iā i latou le faavae a‘e o o latou talitonuga i le Tusi Paia ae lē i taumatematega a tagata po o a‘oa‘oga faalotu. E iā i latou lagona e pei ona sa iai i le aposetolo o Paulo a o faapea mai ina ua faagaeeina: “Ia tuu le faamaoni i le Atua, a o le pepelo i tagata uma lava.” (Roma 3:4a) Pe a tuu mai i le tulaga o a‘oa‘oga o loo ofoina atu e fai ma upu moni o le Tusi Paia, e matuā ioeina e Molimau le auala sa faia e tagata i Perea, ina ua latou faalogologo atu a o tala‘i le aposetolo o Paulo: “Ua latou talia le upu ma le fiafia tele, ua saili i Tusi i lea aso ma lea aso, pe moni ia mea.” (Galuega 17:11) E iai le talitonuga o Molimau a Ieova e faapea, e tatau ona iloiloina a‘oa‘oga uma lava faalotu pe faamata e ōgatusa ma le Tusi Paia faagaeeina, e tusa lava po o i latou, pe o se isi fo‘i tagata, o loo ofoina mai lenā a‘oa‘oga. E latou te valaaulia oe—uuna‘ia oe—e te faia faapena a o e talanoa ma i latou.

O lenei mea ua manino mai ai, e talitonu Molimau a Ieova i le Tusi Paia o le Afioga lea a le Atua. E latou te manatu i ona tusi e 66 e faapea, ua faagaeeina ma e sa‘o a‘ia‘i e tusa ai ma mea moni na tutupu i talafaasolopito. O le vaega lea e ta‘ua e le to‘atele o le Feagaiga Fou, e latou te ta‘ua o Tusitusiga Kerisiano Eleni, ma le Feagaiga Tuai e latou te ta‘ua o Tusitusiga Eperu. E latou te faaaogāina uma mau o Tusitusiga Eleni ma le Eperu, ma e latou te faatatauina mau i le ulua‘i faauigaga o loo tusia mai ai, se‘i vaganā ni faaupuga po o faamatalaga e si‘omia ai, e manino mai o loo faafaatusa po o loo fai ma ata o se mea. Ua latou malamalama o le tele o valoaga o le Tusi Paia ua uma ona faataunuu, o isi o loo faagasolo le faataunuuina, ma isi o loo faatalitalia pea lo latou faataunuuga.

LO LATOU IGOA

Molimau a Ieova? Ioe, o le igoa lenā ua latou faaigoaina ai i latou. O se igoa uigā, e faailoa mai ai o loo latou molimau e faatatau iā Ieova, i lona tulaga o ia o le Atua, ma ana fuafuaga. O le “Atua,” “Alii,” ma “Lē na Foafoaina Mea”—e pei lava o le “Peresitene,” “Tupu,” ma le “Ta‘ita‘i‘au”—o ni ta‘u, ma e mafai ona ave i tagata eseese se to‘atele. Peita‘i o “Ieova” o le suafa totino ma e faasino atu i le Atua e ona le malosi uma lava, o Lē na Foafoaina le vateatea aoao. Ua faaalia lenei manatu i le Salamo 83:18, e tusa ai o le faaliliuga faa-Samoa i le 1884 o le Tusi Paia e faapea: “Ina ia iloa e i latou, o oe, e ou le suafa o IEOVA, na o oe lava o le Silisili ese i le lalolagi uma.”

O le suafa Ieova (po o Iāuē [Yahweh], e pei ona ta‘u ai e le Jerusalem Bible a le Katoliko Roma ma isi tagata a‘oga atamamai) e toetoe lava 7,000 taimi o loo aliali mai ai i ulua‘i Tusitusiga Eperu. O le tele o Tusi Paia e lē o tusia maia faapena, ae ua latou suia i le ta‘u, “Atua” po o le “Alii.” Ae peita‘i, e oo lava i na Tusi Paia, e masani ona faigofie i le tagata ona ia iloa po o gafea o loo faaaogā ai e ulua‘i tusitusiga i le faa-Eperu le suafa Ieova, auā i na mau, o loo tusia ai ta‘u na ua suia i ai, i mata‘itusi lapopo‘a, e tetelē ma laiti, e pei o nei: ATUA, ALII. E feoloolo fo‘i isi faaliliuga faaonapōnei o loo faaaogā ai a lē o le suafa o Ieova, po o le igoa Iāuē. O lea la, ua faitauina le Isaia 42:8 i Le Tusi Paia faa-Samoa o le 1884 e faapea, “O a‘u o Ieova, o lo‘u igoa lea.”

O le faamatalaga faale-Tusi Paia lea e faasino atu i ai Molimau a Ieova mo lo latou igoa, o le Isaia i lona Isaia mataupu e 43. O inā o loo avea ai le tulaga o le lalolagi, e pei o se faamasinoga o loo faia i se potu faamasino: Ua valaaulia atua o nuu ese ina ia faatula‘i mai a latou molimau e faamaonia ai a latou mau e faapea, o loo latou faia le amiotonu, po o le faalogologo mai i molimau a le itu a Ieova, ma latou ioeina le upu moni. O inā loa na faalauiloa atu ai e Ieova i ona tagata e faapea: “Ua fetalai mai Ieova, O outou o a‘u molimau, ma la‘u auauna o le na a‘u filifilia; ina ia outou iloa, ma ia outou faatuatua mai ia te au, ma ia outou lagona, o a‘u lava o ia; e leai se atua na gaosia e muamua ia te au; e leai foi se tasi e mulimuli ia te au. O a‘u o a‘u lava o Ieova; a e leai se faaola ua na o a‘u lava.”—Isaia 43:10, 11.

E faitau afe tausaga talu ona iai molimau a Ieova le Atua i le lalolagi a o le‘i fanau mai Iesu. Ina ua uma ona lisi mai e le Eperu mataupu e 11 nisi o na tagata faatuatua, ona fai mai lea o le Eperu 12:1: “O lenei, o i tatou foi, o loo ua vagavagaia e le faapotopotoga o e matamata mai [“o molimau,” NW] e faapea ona toatele, ina tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le ala tanu o i o tatou luma.” Na fetalai Iesu a o tula‘i i luma o Ponotio Pilato: “O le mea lenei na fanau mai ai a‘u, o le mea foi lenei na ou sau ai i le lalolagi, ina ia ou molimau i le upu moni.” Ua ta‘ua o ia o “le molimau moni ma le faamaoni.” (Ioane 18:37; Faaaliga 3:14) Na fetalai atu Iesu i ona soo: “O le a maua e outou le mana, pe a afio ifo le Agaga Paia i luga ia te outou; e fai foi outou ma molimau ia te au i Ierusalema, ma Iutaia uma lava, ma Samaria, e oo lava i le tulu‘iga o le lalolagi.”—Galuega 1:8.

O lea la, o tagata e tusa ma le 6,000,000 i aso nei o loo latou ta‘uina atu le tala lelei o le Malo o Ieova e ala mai iā Keriso Iesu, i le silia i le 230 atunuu, ua latou lagonaina e faapea, e talafeagai ona faaigoaina i latou o Molimau a Ieova.

[Faaopoopoga i lalo]

[Faamatalaga faaopoopo i le itulau 4]

Ua tuuina atu i latou i le Atua e faia lona finagalo

[Faamatalaga faaopoopo i le itulau 4]

E latou te talitonu o le Tusi Paia, o le Afioga a le Atua

[Faamatalaga faaopoopo i le itulau 5]

Le fesoota‘iga a le suafa ma se faamasinoga o loo faia i se potu faamasino

[Faamatalaga faaopoopo i le itulau 5]

E tusa ma le 6,000,000 o Molimau i le silia ma le 230 atunuu

[Ata i le itulau 3]

E naunau i latou iā te oe

[Ata i le itulau 4]

Le suafa totino o le Atua i le gagana Eperu anamua