Le Tala Lelei e Latou te Manana‘o ia E Faafofoga i Ai

A O IAI Iesu i le lalolagi, sa ō ane ona soo iā te ia ma fesili: “O le ā le faailoga o lou faatasi mai ma le faai‘ui‘uga o le faiga o mea?” (NW) Na ia tali atu i ai e faapea, o le a iai taua e aofia ai le tele o atunuu, o oge, o faama‘i, o mafui‘e, le faateteleina o le amioleaga, o ta‘ita‘i lotu sesē e ta‘ita‘isesēina tagata e to‘atele, le inosia ma le sauāina o ona soo moni, ma le maalili o le alofa i le amiotonu o le to‘atele o tagata. Pe a amata ona tutupu nei mea, o le faamaoniga lenā o le a iloa ai le faatasi mai lē vaaia o Keriso ma ua latalata mai fo‘i le Malo faalelagi. O se tala fou moni lenei mea—tala lelei! Ona faaopoopo atu lea e Iesu fetalaiga nei e avea o se vaega o le faailoga: “E tala‘iina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”—Mataio 24:3-14.

O mea uma lava o loo tutupu i le lalolagi i le taimi nei e leaga, peita‘i o loo latou faailoga mai ai se mea e lelei, o le faatasi mai o Keriso. O tulaga o loo ta‘ua i luga na amata ona manino mai i lenā tausaga sili ona faalauiloaina, o le 1914! Na faailogaina ai le i‘uga o Taimi o Nuu Ese ma le amataga o se vaitaimi o suiga mai pulega a tagata, ae suia atu i le Pulega a Keriso mo le Afe Tausaga (Meleniuma).

Sa tatau ona iai se vaitaimi o suiga e pei ona faaalia mai i le Salamo 110, fuaiupu 1 ma le 2, ma le Faaaliga 12:7-12. O inā ua faaalia ai o le a nofo Keriso i le lagi i le itu taumatau o le Atua se‘ia oo i le taimi e avea ai o ia ma Tupu. Ona tauina lea o le taua i le lagi lea o le a i‘u ina lafo ifo ai Satani i le lalolagi, ma aumaia ai auē i le lalolagi, ma o le a pule fo‘i Keriso i totonu o ona fili. O le a oo mai le i‘uga atoatoa o le amioleaga e ala i se “puapuaga tele,” lea e faatumutumu i le taua iā Amaketo ma sosoo mai ai ma le Pulega o le filemu a Keriso mo le Afe o Tausaga.—Mataio 24:21, 33, 34; Faaaliga 16:14-16.

Ua faapea mai le Tusi Paia: “A e ia iloa e oe lenei mea, o ona aso e gata ai e oo mai ai aso faigata. Auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e le ma faaleleia, o e faatuaupua, o e le taofi manao o le tino, o e faasaua, o e inoino i le amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua; o e ua peiseai ua toaga i lotu, a o le mana ua i lea mea ua latou teena; ia e ‘alo ese lava i tagata faapena.”—2 Timoteo 3:1-5, LF.

Atonu e finau mai nisi faapea sa tutupu fo‘i na mea i taimi muamua atu o le talafaasolopito o tagata, peita‘i o le mea moni lava, e le‘i iai lava se taimi muamua atu na faapena ai le mata‘utia o le tulaga na iai. E pei ona ta‘ua e tusitala o talafaasolopito ma le ‘aufaimanatu, e le‘i iai lava se vaitaimi muamua atu i le lalolagi e tutusa ma le vaitaimi lea na oo i ai i le 1914 ma faasolo mai ai. (Taga‘i i le itulau e 7.) Ua sili atu le mata‘utia o auē o loo iai nei na i lo o se isi lava taimi muamua atu. E lē gata i lea, e pei lava fo‘i ona iai i isi vala o le faailoga na ta‘ua e Keriso e faatatau i aso e gata ai, o vala nei e tatau ona iloiloina: O le folafolaina atu i le lalolagi aoao o le faatasi mai o Keriso faapea lona Malo, ua matuā lē mafaatusalia lava lona tula‘i mai i le talafaasolopito. E leai lava se isi vaega na oo i ai ni sauāga e tutusa mai i sauāga ia o loo aafia ai Molimau a Ieova ona o le tala‘iga. E faitau selau o i latou sa fasiotia i nofoaga o faasalaga mamafa a le Nasi. E oo mai i aso nei, o loo faasāina le galuega a Molimau a Ieova i nisi atunuu, ma i isi atunuu, ua pu‘eina faapagota i latou, ua faafalepuipuiina, ua sasaina faamo‘amo‘a, ma fasiotia. O vala uma nei o le faailoga lea na tuuina mai e Iesu.

E pei ona valoia mai i le Faaaliga 11:18, “ua ita fo‘i nuu” i Molimau faamaoni a Ieova, ma e faaalia ai i lenei mea o le a faaoo mai le “toasa” o Ieova i na nuu. O le mau lava fo‘i lenei o loo faapea mai, o le a ‘faafanoina e le Atua i latou o e o loo fano ai le lalolagi.’ E le‘i faapea lava muamua i le talafaasolopito o tagata, ona iai i se tulaga lamatia le tulaga lelei o le lalolagi mo le faatumauina o le ola o loo iai. Ae peita‘i, ua ese i le taimi nei! E to‘atele saienitisi ua lapata‘i mai e faapea, pe afai e faaauau pea ona faaleagaina e tagata le lalolagi, o le a oo ina lē talafeagai ona toe nofoia e se tasi. Peita‘i o Ieova “na ia faia ina ia āina,” ma o le a ia tafiesea tagata uma o loo faaleagaina a o le‘i oo ina latou matuā faafanoina atoatoa le lalolagi.—Isaia 45:18.

O FAAMANUIAGA I LE LALOLAGI E ALA MAI I LE MALO

Atonu o se talitonuga faapea e iai tagata o le a ola i luga o le lalolagi e fai ma tagatānuu o le Malo o le Atua, e ono faate‘ia ai le to‘atele o i latou o loo talitonu i le Tusi Paia, o ē o loo manatu e ō atu i le lagi i latou uma ua faasaoina. Ua faaalia e le Tusi Paia e faapea, e na o se aofa‘i faatapulaaina e ō atu i le lagi ma o i latou o le a ola e faavavau i le lalolagi o le a avea o se motu o tagata e to‘atele e lē mafaitaulia lo latou aofa‘i. (Salamo 37:11, 29; Faaaliga 7:9; 14:1-5) E iai se valoaga i le tusi o le Tusi Paia o Tanielu ua faaalia mai ai, o le a faatumulia ma pulea le lalolagi atoa e le Malo o le Atua e ala i le pule a Keriso.

I lenā valoaga o loo faaatagia mai ai le Malo o Keriso, e pei o se maa ua taavale ese mai le pule silisili ese e pei o se mauga a Ieova. E taia ma faataapeapeina e le maa se tupua o loo fai ma sui o malo malolosi o le lalolagi, ma “o le maa na lavea ai le tupua ua avea lea ma mauga tele, ua tumu ai le lalolagi uma.” Ua faaauau mai le valoaga: “O ona po o ia tupu e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tu‘imomomoina ma faaumatia ia malo uma lava, a o ia e tumau lava e faavavau.”—Tanielu 2:34, 35, 44.

O le Malo lenei faapea le faamoemoe faale-Tusi Paia o le ola e faavavau i se lalolagi ua faamamāina ma faamatagofieina, lea o loo faanaunau Molimau a Ieova e ta‘u atu iā te oe. E faitau miliona tagata o loo soifua nei, ma le tele o le isi faitau miliona o loo lagomau nei i o latou tuugamau, o le a latou maua le avanoa e nonofo ai e faavavau i le lalolagi. O inā, i le taimi o le Pulega a Keriso Iesu i le Afe Tausaga, o le a faataunuu moni ai le ulua‘i fuafuaga a Ieova, na māfua ai ona foafoaina le lalolagi ma tuuina i ai le ulua‘i ulugalii faaletagata. O le a lē taitai ona fiu tagata i lenei Parataiso i le lalolagi. E pei lava ona sa tofia Atamu e galue i le faato‘aga o Etena, o le a faapena fo‘i ona iai i tagata ni galuega o le a galulue malolosi ai i le tausia o le lalolagi faapea laau ma manu o loo ola ai. O le a latou “olioli umi ai lava i galuega a o latou lima.”—Isaia 65:22, Revised Standard Version; Kenese 2:15.

E tele mau e mafai ona faitauina e iloa ai tulaga o le a iai pe a oo ina taliina le tatalo lea na a‘oa‘o mai e Iesu iā i tatou: “Ia oo mai lou malo, Ia faia lou finagalo, I le lalolagi e pei ona faia i le lagi.” (Mataio 6:10) Ae ua lava le mau lea mo lenei taimi: “Na ou faalogo foi i le leo tele mai le lagi, ua faapea mai, ‘Faauta, ua i ai le afioaga o le Atua faatasi ma tagata, e mau foi o ia ma i latou; e fai foi i latou mona nuu, e ia te i latou le Atua lava. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.’ Ua fetalai mai foi lē tietie i le nofoālii, ‘Faauta, ou te faia ia fou mea uma lava.’ Ua fetalai mai foi o ia ia te au, ‘Ia e tusi; auā o upu nei e moni ma le faamaoni ia.’”—Faaaliga 21:3-5.

[Faamatalaga faaopoopo i le itulau 15]

O “aso faigata,”

PEITA‘I “ona oo mai ai lea o le gataaga”

[Ata i le itulau 18]

Netherlands

[Ata i le itulau 18]

Nigeria