O Auala e Latou te Faaaogā e Tufa Atu ai le Tala Lelei

UA POLOA‘IINA Kerisiano ina ia “fai nuu uma lava ma soo,” ae lē o le uiga o lenei mea faapea e tatau ona latou uuna‘i malosi pe faaliliu faamalosi isi. O le tofiga o Iesu ina ia “tala‘i le tala lelei i e ua tigaina,” ia “fufusi i e loto momomo,” ia “faamatalaloto i e faanoanoa uma lava.” (Mataio 28:19; Isaia 61:1, 2; Luka 4:18, 19) E taumafai Molimau a Ieova e faia lenei mea e ala i le faalauiloaina atu o le tala lelei mai le Tusi Paia. I le pei o le perofeta anamua o Esekielu, e taumafai Molimau a Ieova i aso nei e sa‘ilia i latou o loo ‘mapuitiga, ma feoi ona o mea inosia uma ua faia.’—Esekielu 9:4.

O le auala e sili ona lauiloa e latou te faaaogā e sa‘ili ai i ē o loo mafatia ona o tulaga o mea i aso nei, e ala lea i le ō atu i lea fale ma lea fale. O inā ua latou faia ai se taumafaiga mautinoa ina ia oo atu i le lautele, e pei lava ona sa faia e Iesu ina “ua faataamilo o ia i aai ma faoa aai, ua tala‘i ma folafola le tala lelei o le malo o le Atua.” O le mea fo‘i lenā sa faia e ona ulua‘i soo. (Luka 8:1; 9:1-6; 10:1-9) I aso nei, i vaipanoa o loo mafai ai, e taumafai Molimau a Ieova e asiasi atu i aiga ta‘itasi i taimi eseese o le tausaga, ina ia taumafai e talanoa atu i le tagata e ana le fale mo ni nai minute i ni mataupu e fitoitonu i lo latou lava atunuu po o se mataupu mai isi itu o le lalolagi, o loo naunau pe mamafa i mafaufau o tagata. Atonu e ofo atu se mau e tasi pe lua e talatalanoa i ai, ma pe a faaalia le naunau o lē ana le fale, e ono faia se fuafuaga a le Molimau ina ia toe asi atu i ai i se taimi talafeagai mo se isi talanoaga atili. Ua sauniunia ni Tusi Paia ma lomiga o loo faamatalaina ai le Tusi Paia, ma pe afai e finagalo i ai lē ana le fale, e mafai ona faia se su‘esu‘ega faale-Tusi Paia e aunoa ma se totogi. E faitau miliona nei su‘esu‘ega faale-Tusi Paia o loo faia e lē aunoa ma tagata ta‘ito‘atasi faapea fo‘i ma aiga i vaega uma o le lalolagi.

O le isi auala ua ta‘u atu ai “le tala lelei o le malo” i isi, e ala lea i sauniga o loo faia i Maota o le Malo i lou lava vaipanoa. O inā e faia ai e Molimau a latou sauniga i vaiaso ta‘itasi. O se tasi o sauniga o le lauga i le lautele e faia i se mataupu o loo naunau i ai tagata i lea vaitaimi, ona sosoo mai lea ma le su‘esu‘ega o se mataupu po o se valoaga faale-Tusi Paia, e faaaogā ai le mekasini o Le Olomatamata e fai ma puna o faamatalaga. O le isi sauniga o se a‘oga mo le toleniina o Molimau ina ia faaleleia atili ai lo latou avea o ni ē folafolaina le tala lelei, ona sosoo mai lea ma se vaega ua taula‘i atu i le talanoaina o le galuega molimau atu i le oganuu a le faapotopotoga. E lē gata i lea, e faatasi i le vaiaso ona faapotopoto Molimau i fale o ni aiga, i ni vaega to‘alaiti, mo ni su‘esu‘ega faale-Tusi Paia.

E tatala atu nei sauniga uma i le lautele. E leai ni tupe e aoina. O na sauniga ua aogā mo tagata uma. Ua faapea mai le Tusi Paia: “Ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou, pei o le masani o isi, a ia fefaamafanafanai; ia atili ai foi ona faapea ina ua outou iloa o le Aso o loo tāulata mai.” E mana‘omia ona faia e le tagata lava ia sana su‘esu‘ega ma ni sa‘ili‘iliga, peita‘i o le faapotopoto faatasi ma isi e faagaeetia ai: “E maamaai le uamea i le uamea, e faapea foi ona faamafanafana o le tagata i lana uo.”—Eperu 10:24, 25; Faataoto 27:17.

E faaaogā lelei fo‘i e Molimau avanoa e talanoa ai e uiga i le tala lelei a o latou feiloa‘i atu i isi tagata i aso ta‘itasi o o latou olaga. Atonu pe na o sina talanoaga puupuu lava ma se tuaoi po o se isi tagata o loo faimalaga faatasi atu i se pasi po o se vaalele, o se talanoaga umi ma se uō po o se tauaiga, po o se talanoaga ma se isi uō i le galuega a o mālōlō mo ‘aiga o le aoauli. O le ituaiga o molimau lenei sa tele ina faia e Iesu a o iai i le lalolagi—a o ia femaliua‘i i le matafaga, a o nofo i luga o se nofoaga maupu‘epu‘e, a o fai‘aiga i le fale o se tasi, a o auai atu i se faaipoipoga, pe a o malaga atu i se vaafagota i le Sami o Kalilaia. Sa a‘oa‘o atu o ia i totonu o sunako ma i le malumalu i Ierusalema. Po o fea lava sa iai, sa ia maua fo‘i ni avanoa e talanoa atu ai e uiga i le Malo o le Atua. E taumafai malosi Molimau a Ieova e mulimuli fo‘i i ona tulagāaao i lenei itu.—1 Peteru 2:21.

O LOO TALA‘I E ALA I FAAA‘OA‘OGA

E augapiu ma se tasi o nei auala o loo ta‘u atu ai le tala lelei o le a aogā iā te oe, pe afai o le tagata lea na te ta‘uina atu iā te oe, e na te lē o faatatauina na a‘oa‘oga iā te ia lava. O se matuā pepelo lava pe a ese le upu e fai atu, ae ese gaoioiga o loo fai, ma e faitau miliona tagata ua liliu ese mai le Tusi Paia ona o pepelo o loo faia e lotu. E lē fetaui ona tuua‘ia le Tusi Paia. Sa iai i le ‘autusiupu ma Faresaio Tusitusiga Eperu, peita‘i na ta‘usalaina i latou e Iesu o ni tagata pepelo. Sa ia ta‘ua lo latou faitauina o le Tulafono a Mose, ona ia toe fetalai atili atu lea i ona soo: “Ia outou anaana ai ma ia outou faia mea uma latou te fai atu ai ia te outou e anaana i ai; a e aua tou te faaa‘oa‘o i a latou amio; auā ua latou fai atu, a e latou te le faia.” (Mataio 23:3) E sili atu ona uigā se Kerisiano pe afai o loo avea ma se faaa‘oa‘oga lelei o sē o loo tonu lona olaga, na i lo le tele o ni itula e lauga atu ai. O le manatu lenei na ta‘u atu i avā Kerisiano o ē sa lē talitonu a latou tane: “Ia maua i latou i le amio lelei a avā, a e leai se upu, pe a latou vaai ane i a outou amio mamā.”—1 Peteru 3:1, 2, LF.

O le mea lea o loo taumafai ai Molimau a Ieova e faailoa atu le tala lelei o isi i lenei fo‘i auala: e ala i le avea o i latou o ni faaa‘oa‘oga lelei i amioga faa-Kerisiano ia o loo latou faailoa atu i isi. E latou te taumafai ina ia ‘faia i isi mea e latou te loto i ai ia faia e tagata iā te i latou.’ (Mataio 7:12) E latou te taumafai ina ia amioa‘i i lenei itu ma tagata uma lava, ae lē na o o latou uso Molimau, o uō, tuaoi, po o tauaiga. Ona o le tulaga lē lelei atoatoa, ua lē ausia ai e i latou le 100 pasene i taimi uma lava. Peita‘i o le faanaunauga o o latou loto ina ia latou faia le mea lelei i tagata uma lava, e lē gata i le ta‘u atu iā i latou o le tala lelei o le Malo, ae i le faasafua atu fo‘i i ai o se fesoasoani i so o se taimi e mafai ai.—Iakopo 2:14-17.

[Ata i le itulau 19]

Hawaii

[Ata i le itulau 19]

Venezuela

[Ata i le itulau 19]

Yugoslavia

[Ata i le itulau 20]

O Maota o le Malo, ua talafeagai lelei o latou fausaga, ua avea o ni nofoaga e talanoaina ai le Tusi Paia

[Ata i le itulau 21]

I o latou olaga faaleaiga ma fesoota‘iga ma isi, ua taumafai malosi ai Molimau e faatino mea o loo latou lagolagoina