La Latou Faalapotopotoga ma Galuega i le Lalolagi Aoao

E TELE vala o le fesoota‘iga o loo faaaogā i le aumaia o ta‘ita‘iga mo le galuega molimau atu i le silia ma le 230 atunuu o loo faia ai. O le ta‘ita‘iga aoao e sau mai le Vaega Pule i le ofisaulu mo le lalolagi atoa i Brooklyn, i Niu Ioka. E aauina mai e le Vaega Pule ni ona sui i tausaga ta‘itasi i vaega eseese i le lalolagi aoao ina ia faia ni talanoaga ma sui o lālā i na vaega. I ofisa o lālā, ua iai ni Komiti o le Lālā e faia a‘e i le tusa o le to‘atolu i le to‘afitu ni ona sui, ina ia latou vaavaaia le galuega i atunuu o i lalo o le latou ta‘ita‘iga. O nisi lālā ua iai o latou fale ma masini mo le lolomiina o lomiga, ae o nisi o loo faaaogāina ni masini lomitusi e sili atu ona vavave. Ua vaevaeina le atunuu po o le vaipanoa o loo tausia e lālā ta‘itasi, i ni itumalo, ma o na itumalo ua vaevaeina i matagaluega. E tusa ma le 20 ni faapotopotoga e iai i matagaluega ta‘itasi. E asiasi faasolosolo atu le ovasia o le itumalo i matagaluega o loo i lana itumalo. E lua fonotaga e faia mo matagaluega ta‘itasi i le tausaga. E iai fo‘i se ovasia o le matagaluega, ma e masani lava ona asiasia faalua i le tausaga e lenā ovasia faapotopotoga ta‘itasi o i lana matagaluega, ina ia fesoasoani atu i Molimau i le faamaopoopoina ma le faatinoina o le galuega tala‘i i le oganuu ua tofia atu i lenā faapotopotoga.

O le faapotopotoga faatasi ai ma lo latou Maota o le Malo, o inā e faaautū i ai le ta‘uina atu o le tala lelei i lou nuu. Ua māe‘a ona vaevaeina i ni oganuu laiti, vaipanoa uma o loo iai i le vaavaaiga a faapotopotoga ta‘itasi. Ona tofia atu lea o nei oganuu i Molimau ta‘ito‘atasi, o ē o le a taumafai e asiasi ma talanoa atu i tagata i aiga uma o loo iai i lenā oganuu. O faapotopotoga ta‘itasi, o loo iai ni nai Molimau e to‘aitiiti po o le oo atu lava i le tusa ma se to‘a 200, ua tofu lava ma toeaina ua tofia atu ina ia gafa ma tiute eseese. O le tagata o loo folafolaina atu le tala lelei, e matuā tāua lava o ia i le faalapotopotoga a Molimau a Ieova. O Molimau uma ta‘ito‘atasi, e tusa lava pe o loo auauna i le ofisaulu mo le lalolagi atoa, pe i ni lālā, pe i faapotopotoga, ua latou faia lenei galuega i le fanua, o le talanoa totino atu lea i isi e uiga i le Malo o le Atua.

E oo uma atu lava lipoti o lenei galuega i le ofisaulu mo le lalolagi atoa, ona tuufaatasia ai lea ma lolomia o se Yearbook faaletausaga. E lē gata i lea, ua lolomia se siata i tausaga ta‘itasi i le lomiga o Le Olomatamata o Ianuari 1. O nei lomiga e lua o loo faaalia mai ai ni lipoti au‘ili‘ili uma o mea sa mafai ona faatinoina i tausaga ta‘itasi, i le faaooina atu o le molimau iā Ieova ma lona Malo e ala i le pulega a Keriso Iesu. I tausaga talu ai nei, e tusa ma le 14,000,000 Molimau ma tagata lotofiafia sa auai i le Faamanatuga faaletausaga o le maliu o Iesu. E silia ma le 1,000,000,000 itula e faaaluina e Molimau a Ieova i le tausaga e tasi, i le folafolaina atu o le tala lelei, ma le silia i le 300,000 tagata fou ua papatisoina. E faitau selau miliona kopi o lomiga ua ofoina atu.