E Mafai Ona E Faaleleia Lou Manatuaina o Mea

NA FOAFOAINA e Ieova le Atua le faiʻai o le tagata faatasi ai ma le tomai ofoofogia e manatua ai mea. Sa ia fuafuaina e tai pei o se faatanoa e teu ai ni vai e mafai ona e ki ese mai ai se suavai e aunoa ma le leiloa o mea tāua ua uma ona tuuina i ai. O le auala ua fuafuaina ai le faiʻai o le tagata e ōgatusa ma le fuafuaga a le Atua ina ia ola e faavavau le tagata.—Sala. 139:14; Ioa. 17:3.

Peitaʻi atonu e te manatu o le tele naʻuā o mea e ave i lou mafaufau o le a oo ina leiloa. E foliga mai e lē o iai i inā i le taimi e te manaʻomia ai. O le ā e mafai ona e fai ina ia faaleleia ai lou manatuaina o mea?

Ia Fiafia i Ai

O le fiafia i se mea o se vaega tāua lea i le faaleleia o lou manatuaina o mea. Afai e avea ma a tatou masani le mataalia, ia fiafia i tagata ma mea o faagasolo i o tatou olaga, e faagaeetia ai o tatou mafaufau. O le faia faapea o le a faigofie ai mo i tatou ona faaalia le ituaiga fiafia lenā pe a tatou faitau pe faalogo i se mea e tumau lona aogā.

O se tulaga e masani ai mo se tagata le faigatā ona ia manatuaina igoa o tagata. Peitaʻi, i le avea ai o i tatou o ni Kerisiano, ua tatou iloa e tāua tagata—o aumea Kerisiano, o i latou tatou te molimau atu i ai, atoa ai ma isi tatou te feutagaʻi a o tatou taulimaina mea e masani ai o le soifuaga. O le ā e fesoasoani iā i tatou ina ia manatua ai igoa ia e tatau lava ona tatou manatuaina? E toʻa 26 i latou na taʻua e le aposetolo o Paulo o latou suafa, a o ia tusi atu i ai i la latou faapotopotoga. O lona naunau iā i latou e faaalia mai lea e lē gata sa ia silafia o latou suafa, ae sa ia taʻua nisi o mea patino e faatatau i le toʻatele o i latou. (Roma 16:3-16) O nisi o ovasia femalagaaʻi a Molimau a Ieova i aso nei e lelei tele lo latou manatuaina o igoa, e ui lava e eseese faapotopotoga e auai atu i ai i vaiaso taʻitasi. O le ā o loo fesoasoani iā i latou? Atonu e fai ma a latou masani le taʻu soo o le suafa o le tagata mo ni nai taimi i le uluaʻi taimi latou te talanoa ai. Latou te faia taumafaiga e faafesootaʻi ai foliga o le tagata ma lona suafa. E faaopoopo atu i lenā, e latou te faaalu se taimi ma tagata eseese i le faiva i le fanua ma taumamafa faatasi. Pe a e feiloaʻi atu i se tasi, pe o le a e manatua ea le suafa o lenā tagata? Ia amata i le iai o se māfuaaga malosi e manatua ai le suafa; ona faataʻitaʻi lea o nisi o fautuaga e pei ona muaʻi taʻua i luga.

E tāua tele foʻi le manatuaina o mea e te faitauina. O le ā e fesoasoani iā te oe ina ia faaleleia ai lea tulaga? E manaʻomia e lē gata ia fiafia i ai ae ia iai foʻi se malamalamaga. E manaʻomia ona e matuā naunau i mea o loo e faitauina ina ia taulaʻi ai lou uaʻi atoatoa atu i ai. E lē mafai ona e taofia faamatalaga pe afai o faalavelaveina lou mafaufau a o e taumafai e faitau. E faaleleia lou malamalamaga pe a e faafesootaʻia faamatalaga i mea e te masani ai po o le poto lenā ua iā te oe. Fesili ifo iā te oe lava: ʻE faapefea ma o afea ou te faatatauina ai nei faamatalaga i loʻu lava olaga? E faapefea ona ou faaaogāina e fesoasoani ai i se isi?’ E faaleleia foʻi le malamalamaga pe a e faitauina faaupuga na i lo o upu taʻitasi. O le a faigofie ai ona e taofia manatu ma mātaulia manatu autū, ona faigofie ai lea ona manatua.

Ia Faaalu se Taimi e Autalu Ai

O i latou e tomai faapitoa i tulaga tau i aʻoaʻoga latou te faamamafaina le tāua o le toe autalu. I se tasi suʻesuʻega na faia, sa faataʻitaʻia ai e se alii polofesa i se iunivesite e faapea, o le minute e tasi e faaalu i se autaluga faavavevave e mafai ona faaluaina ai le aofaʻiga o faamatalaga e taofia. O le taimi lava la e māeʻa ai ona e faitauina faamatalaga uma—po o se vaega tele o faamatalaga—ona toe autalu loa lea i lou mafaufau manatu autū ina ia manatua lelei ai i lou mafaufau nei faamatalaga. Mafaufau pe o le a faapefea ona e faamatalaina i au lava upu so o se manatu fou ua e aʻoaʻoina. O le toe faafouina o lou manatuaina o mea i le taimi lava e māeʻa ai ona e faitauina se manatu, o le a faateleina ai le umi o le taimi e mafai ona e taofia ai se manatu.

O isi la aso o sosoo mai, ia saʻili se avanoa e autalu ai mea sa e faitau i ai e ala i le faasoa atu i se isi o na faamatalaga. E lua te ono faia faapea ma se tasi o lou aiga, se tasi i le faapotopotoga, se tasi lua te faigaluega faatasi, se tasi lua te aʻoʻoga faatasi, sou tuaoi, po o se tasi e te lua feiloaʻi i le faiva i le fanua. Taumafai e toe taʻua e lē gata o mea moni autū ae faapena foʻi ma le māfuaaga faale-Tusi Paia e fesootaʻi atu i ai. O le faia faapea o le a aogā iā te oe, e fesoasoani e tāmau ai manatu tāua i lou mafaufau ma o le a aogā foʻi i isi.

Ia Manatunatu Loloto i Mea Tāua

E faaopoopo atu i le autaluina o mea e te faitau i ai ma le taʻuina i isi, o le a e mātauina foʻi e aogā tele le manatunatu loloto i mea tāua ua e aʻoaʻoina. O le mea lenā sa fai e tusitala o le Tusi Paia o Asafo ma Tavita. Na faapea mai Asafo: “Ou te manatua galuega a Ioa; e moni, ou te matuā manatua ou vavega anamua. Ou te manatunatu foi i au galuega uma, ou te mafaufau i mea na e faia.” (Sala. 77:11, 12) E faapena foʻi le manatu sa tusia e Tavita: “Ou te mafaufau ia te oe i leoleoga i itu po,” ma le “Ou te manatu i aso anamua; ou te manatunatu i mea uma na e faia.” (Sala. 63:6; 143:5) Pe e te faia lenā mea?

O ituaiga mafaufauga faapena e loloto ona taulaʻi atu, lea e te mafaufau ai i mea na faia e Ieova, o ona uiga, atoa ma faailoaga mai o lona finagalo, e tele atu isi mea e mafai ona faataunuuina ai na i lo le na o le mauaina o mea moni. Afai e fai ma au masani lou mafaufau i ituaiga o manatunatuga faapena, o le a tāmau ai i lou loto mea e matuā aogā moni lava. O le a faatonutonuina ai le ituaiga o tagata e te iai. O mea ia o le a e manatuaina pea o le a avea o ni lagona e tumau iā te oe.—Sala. 119:16.

Le Vaega a le Agaga o le Atua

Pe a taumafai ina ia manatua upu moni e faatatau i mea na faia e Ieova ma mea na fetalai i ai Iesu Keriso, e lē o tuulafoaʻia i tatou. I le pō a o lumanaʻi lona maliu, na fetalai atu ai Iesu i ona soo e faapea: “O mea ia ua ou fai atu ia te outou, manū o tatou nonofo ma outou. A o le Fesoasoani, o le Agaga Paia lea, e auina mai e le Tamā i loʻu igoa, o ia lava na te aʻoaʻo ia te outou i mea uma lava; e faamanatu mai foi o ia ia te outou i mea uma ua ou fai atu ai ia te outou.” (Ioa. 14:25, 26) O Mataio ma Ioane isi sa iai i inā. Pe sa faamaonia ea le avea o le agaga paia ma fesoasoani iā i laʻua? Ioe, o le mea tonu lava lenā na tupu! Pe tusa o le valu tausaga mulimuli ane, na faaiʻuina ai le tusiaina e Mataio o le uluaʻi tala auʻiliʻili o le soifuaga o Keriso, e aofia ai mea tautele na ia manatua e pei o le Lauga i luga i le Mauga atoa ai ma faamatalaga auʻiliʻili o le faailoga o le faatasi mai o Keriso ma le faaiʻuiʻuga o le faiga o mea. I le 65 tausaga talu le maliu o Iesu, na tusia ai e le aposetolo o Ioane lana Evagelia, e aofia ai ma faamatalaga i le mea na fetalai i ai Iesu i le pō mulimuli sa faatasi ai le ʻauaposetolo ma le Alii a o leʻi maliu o ia. E lē taumatea, sa manatua lelei e Mataio ma Ioane mea sa fetalai i ai ma faia e Iesu a o latou faatasi ai ma ia, ae o le vaega autū a le agaga paia, o le faamautinoaina lea la te leʻi faagaloina mea tāua ia sa finagalo Ieova e tusia i lana Afioga.

Pe o gaoioi ea le agaga paia o se fesoasoani i auauna a le Atua i aso nei? O le mea moni lava lenā! E lē faapea e tuuina e le agaga paia i o tatou mafaufau ni mea tatou te leʻi aʻoaʻoina muamua, peitaʻi e gaoioi e pei o se fesoasoani e faamanatu mai i o tatou mafaufau mea tāua sa tatou aʻoaʻoina i le taimi ua teʻa. (Luka 11:13; 1 Ioa. 5:14) A o tulaʻi mai la le manaʻoga, e faagaoioia o tatou tomai e mafaufau ai ina ia “manatu ai i valoaga na fai mai e le au perofeta paia, ma le poloaiga a le Alii o le Faaola lea.”—2 Pete. 3:1, 2.

‘Aua Lava Neʻi E Faagaloina’

Sa lapataʻi atu e lē aunoa Ieova iā Isaraelu: ‘Aua lava neʻi e faagaloina.’ E lē faapea sa ia faatalitalia i latou ia lelei atoatoa lo latou manatuaina o mea uma. Peitaʻi sa lē tatau ona latou aafia naʻuā i a latou lava gaoioiga totino ma oo ai ina latou faagaloina gaoioiga a Ieova. Sa tatau ona olaola i o latou mafaufau le faasaoina o i latou e Ieova ina ua fasiotia e le agelu ulumatua uma a Aikupito, faapena foʻi ina ua vaeluaina ma toe faasoo ane e Ieova le Sami Ulaula, ma malelemo ai Farao ma ana ʻautau. Sa ao iā Isaraelu ona manatua sa avatu iā i latou e le Atua lana Tulafono i le Mauga o Sinai, ma sa ia taʻitaʻia i latou i le vaomatua ma faaoo atu i le Nuu o le Folafolaga. Sa lē tatau ona latou faagaloina i le uiga faapea, o le manatuaina o nei mea o le a faaauau ona iai ni aafiaga loloto i o latou olaga i aso taʻitasi.—Teu. 4:9, 10; 8:10-18; Eso. 12:24-27; Sala. 136:15.

O i tatou foʻi e ao ona faaeteete ina ia aua neʻi faagalogalo. A o tatou faafetaiaʻia omiga o le soifuaga, e ao ona tatou manatuaina Ieova, ia teu i manatu le ituaiga Atua e iai o ia atoa ma le alofa sa ia faaalia i le ofoina mai o lona Alo, o lē na saunia le togiola mo a tatou agasala ina ia tatou mauaina le ola lelei atoatoa e faavavau. (Sala. 103:2, 8; 106:7, 13; Ioa. 3:16; Roma 6:23) O le faitauina e lē aunoa o le Tusi Paia ma le faia o se sao olaola i sauniga a le faapotopotoga, atoa ai ma le faiva i le fanua, o le a faatumauina ai le olaola o nei upu moni iā i tatou.

Pe a fesagaʻi ma filifiliga, pe tetele pe laiti, ia tomanatu i na upu moni tāua, ma ia faaaafia ai ou manatunatuga. Aua le faagaloina. Vaai atu iā Ieova mo le taʻitaʻiga. Na i lo le tau lava ina vaai i mea i le vaaiga faaletino po o le talitonuina o lagona o le loto lē lelei atoatoa, ia fesili ifo iā te oe, ‘O ā ni fautuaga po o ni mataupu silisili mai i le Afioga a le Atua e ono aafia i laʻu filifiliga?’ (Faata. 3:5-7; 28:26) E lē mafai ona e manatuaina ni mea e te leʻi faitau pe faalogo muamua i ai. Peitaʻi a o tuputupu aʻe lou poto saʻo ma lou alofa mo Ieova, o le a faateleina le aofaʻiga o le poto lea e mafai ona fesoasoani mai ai le agaga o le Atua i lou manatuaina o mea ma o lou alofa mo Ieova lea ua faatupuina o le a uunaʻia ai oe e gaoioi e talafeagai ai.