Avatu ni Faamatalaga e Faamaonia Ai

PE A e faia se faamatalaga, ua iai i lau ʻaufaalogologo le aiā e fesili ai: “Aiseā ua moni ai lenā mea? O le ā le faamaoniga e ao ai ona talia mea ua taʻua e le failauga?” I le avea o se faiaʻoga, ua iā te oe le matafaioi e tali ai na fesili po o le fesoasoani i lau ʻaufaalogologo ina ia saʻilia ni tali. Afai e tāua le faamatalaga i lau finauga, ia faamautinoa ua e avatu i lau ʻaufaalogologo ni māfuaaga malolosi ina ia taliaina ai. O le a saosaolaumea lea i le faia o lau taulimaga ina ia faatalitonuina ai.

Sa faaaogā e le aposetolo o Paulo faamatalaga e faatalitonu ai. E ala i finauga saʻo, le faasolosolo lelei, ma le faatalosaga naunautaʻi, sa ia taumafai ai e suia mafaufau o i latou na ia lauga atu i ai. Ua ia faataatia se faaaʻoaʻoga e sili ona lelei mo i tatou. (Galu. 18:4; 19:8) O le mea moni, ua faaaogā e nisi failauga faamatalaga e faatalitonu ai ina ia taʻitaʻi sesē ai tagata. (Mata. 27:20; Galu. 14:19; Kolo. 2:4) Atonu latou te amata i se manatu sesē, e faalagolago i ni puna o faamatalaga e faaituʻau, e faaaogā ni finauga vaivai, lē amanaʻia o mea e lē ioe ma o latou manatu, pe sili atu ona faatosina i lagona ootia na i lo mafaufauga talafeagai. E ao ona tatou faaeteete ia ʻalofia na faiga uma.

Ia Faavae Mausalī i le Afioga a le Atua. O mea tatou te aʻoaʻoina atu e lē tatau ona fafau aʻe i o tatou lava manatu. Tatou te taumafai e faailoa atu i isi mea ua tatou aʻoaʻoina mai i le Tusi Paia. I lea aʻoaʻo atu, ua tatou maua ai le fesoasoani tele mai lomiga a le vasega o le auauna faamaoni ma le mafaufau. O nei lomiga ua faalaeiau ai i tatou ina ia iloilo faaeteete le Tusi Paia. O le iʻuga, ua tatou tataʻia ai isi i le Tusi Paia, e lē o le sini ina ia faamaonia atu o i tatou e saʻo, ae ma le faanaunauga lotomaulalo o le tuu atu lea iā i latou ina ia iloa e i latou lava mea o loo taʻua ai. E tatou te ioe faatasi ma Iesu Keriso, o lē sa tatalo atu i lona Tamā: “O lau afioga o le upu moni lea.” (Ioa. 17:17) E leai se pule e sili atu i lo o Ieova le Atua, o Lē na Foafoaina le lagi ma le lalolagi. E faalagolago la le aogā o a tatou faamatalaga i le faavae i lana Afioga.

I nisi taimi atonu e te talanoa atu ai i tagata o ē e lē masani i le Tusi Paia po o ē e lē talitonu o le Afioga a le Atua lea. E ao ona e faaaogā le uta mamao i le taimi ma le auala e te faailoa atu ai mau o le Tusi Paia. Ae ao ona e taumafai e faauaʻi atu i lenā tusi o faamatalaga o loo iai le pule, i le vave e mafai ai.

Pe ao ona e manatu faapea o le tau ina otooto atu o se mau talafeagai, ua saunia ai se finauga e lē mafaafitia? E lē tatau. Atonu e manaʻomia ona e faauaʻi atu i faamatalaga o loo siʻomia ai ina ia faailoa ai le matuā lagolagoina moni e le mau o le mea ua e taʻua. Afai o loo e faaaogāina e na o se mataupu silisili mai se mau, ae e lē o talanoaina faamatalaga o loo siʻomia ai le mataupu, atonu la e manaʻomia nisi faamaoniga. Atonu e manaʻomia ona e faaaogā isi mau e fesootaʻi i le mataupu, ina ia faamalie ai lau aofia faapea o mea o loo e taʻua e faavae mausalī moni mai i le Tusi Paia.

Ia ʻalofia le soona taʻua o mea ua faamaonia e se mau. Ia faitau iai ma le faaeteete. Atonu o loo feagai le mau ma le mataupu o loo e talanoaina i se tulaga lautele. Ae peitaʻi, ina ia faatalitonuina ai i lau finauga, e tatau i lau ʻaufaalogologo ona mātauina ua faamaonia le mea o loo e taʻua.

Lagolagoina i Faamaoniga Faaopoopo e Mautinoa. I nisi tulaga, atonu e aogā le faaaogā o faamaoniga mai se puna o faamatalaga e maufaatuatuaina e ese mai le Tusi Paia, ina ia fesoasoani ai i tagata ia malamalama i le talafeagai o manatu o le Tusi Paia.

Mo se faaaʻoaʻoga, e mafai ona e faasino atu i le vanimonimo vaaia, o se faamaoniga o le soifua o Lē na Foafoaina Mea. E mafai ona e faauaʻi atu i tulafono faalenatura, e pei o le kalave, ma faapea atu o le iai o na tulafono ua muaʻi faailoa mai ai o loo iai se Faitulafono. O le a saʻo manatu e te faaalia pe afai o loo ōgatasi ma mea ua taʻua i le Tusi Paia. (Iopu 38:31-33; Sala. 19:1; 104:24; Roma 1:20) O le a fesoasoani tele na faamaoniga auā ua faataʻitaʻia ai, o mea o loo taʻua i le Tusi Paia e tutusa ma mea o loo mātauina.

Po o e taumafai e fesoasoani i se tasi ina ia iloa o le Tusi Paia e moni o le Afioga a le Atua? Atonu e te siiina atu upu a ni tagata popoto o ē e ioe i ai, ae pe faamaonia ai ea? O na upu sii ua na o tagata o ē e faaaloalogia na tagata popoto e aogā i ai. Pe mafai ona e faaaogā le faasaienisi e faamaonia ai le moni o le Tusi Paia? Afai o le a e faaaogāina taofi o saienitisi lē lelei atoatoa e fai ma faavae o au faamaoniga, o le a fausia aʻe la au faamatalaga i luga o se faavae maluelue. I le isi itu, afai e te amata i le Afioga a le Atua ona mulimuli ane lea faasino atu i suʻesuʻega faasaienisi o loo faamatilatila ai le saʻo aʻiaʻi o le Tusi Paia, o le a fafau aʻe la au finauga i luga o se faavae mausalī.

Po o le ā lava le mea o loo e taumafai e faamaonia, ia tauaaoina ni faamaoniga e lava ma totoe. O le aofaʻiga o faamaoniga e manaʻomia o le a faalagolago i lau aofia. Mo se faaaʻoaʻoga, afai o loo e talanoaina aso e gata ai e pei ona faamatala i le 2 Timoteo 3:1-5, e mafai ona e faauaʻi atu lau aofia i se lipoti o tala fou ua lausilafia e faaalia ai le “le lotoaiga” o tagata. O lenā faaaʻoaʻoga e tasi, atonu ua lava lenā e faamaonia ai ua faataunuuina nei lenei vala o le faailoga o aso e gata ai.

O le faatusatusa o ni mea se lua e iai ni vala tāua e tutusa ai e masani ona aogā. O le faatusatusaga lava ia e lē faamaonia ai se mataupu; e tatau ona tofotofoina lona aogā i mea ua taʻua i le Tusi Paia. Ae e mafai ona fesoasoani le faatusatusaga i se tagata ina ia iloa ai le talafeagai o se manatu. Mo se faataʻitaʻiga, e mafai ona faaaogā lenā ituaiga o faatusatusaga pe a faamalamalamaina e faapea o le Malo o le Atua o se pulega. Atonu e te faasino atu faapea, i le pei o pulega faaletagata, o le Malo o le Atua e iai ni ona pule, tagatānuu, o tulafono, se faiga faaletulafono, ma se faiga tau aʻoaʻoga.

O mea moni e tutupu i le olaga e masani ona faaaogā e faataʻitaʻia ai le atamai o le faatatauina o fautuaga a le Tusi Paia. E mafai foʻi ona faaaogā mea tutupu totino e lagolago ai faamatalaga ua faia. Mo se faataʻitaʻiga, pe a e faailoa atu i se tagata le tāua o le faitauina ma le suʻesuʻeina o le Tusi Paia, e mafai ona e faamatala atu faapea o le faia o lenā mea ua faaleleia ai lou olaga. I le faalaeiauina o ona uso, sa faasino atu ai Peteru i le liliuina faavavega, lea sa avea ai ia o se molimau vaaitino. (2 Pete. 1:16-18) Sa sii mai foʻi e Paulo mea na tutupu iā te ia lava. (2 Kori. 1:8-10; 12:7-9) Peitaʻi, e ao ona e faaaogā fuafua mea na tutupu iā te oe ina ia aua ai neʻi e faatosina mai ai ma le lē tatau manatu iā te oe.

Talu ai e eseese tagata i o latou talaaga ma mafaufauga, o faamaoniga la e faatalitonu ai le tasi tagata atonu e lē faamalieina ai le isi. O lea, ia iloilo manatu o lau ʻaufaalogologo pe a filifilia finauga o le a e faaaogā ma le auala o le a e tauaaoina ai. Ua taʻua i le Faataoto 16:23 e faapea: “O le loto o le ua poto, e poto ai lona gutu; e faaopoopoina ai foi le poto i ona laugutu.”