ʻO Loʻu Atalii Lenā’

PE A fai e tamaiti ni mea lelei, e fiafia ē o loo tausia i latou. A fai e se teineitiiti se mea lelei, e mitamita lona tamā ma taʻu i isi: “O loʻu afafine lenā.” A fai foʻi e se tamaitiiti ni mea lelei, e fiafia lona tamā ma taʻu atu: “O loʻu atalii lenā.”

O loo fai foʻi e Iesu i taimi uma mea e fiafia i ai lona Tamā. E mitamita foʻi la lona Tamā iā te ia. E te manatua le mea na faia e le Tamā o Iesu, a o faatasi Iesu ma ona soo e toʻatolu i le isi aso?— Ioe, na fetalai mai le Atua mai le lagi e taʻu mai iā i latou: “O loʻu Atalii pele lenā, ou te fiafia iā te ia.”​—Mataio 17:5.

E ese le fiafia o Iesu e fai mea e faafiafia ai lona Tamā. E te iloa le māfuaaga? Ona e alofa tele i lona Tamā. Afai na pau lava le māfuaaga e fai ai e se tasi se mea ona e tatau lava ona fai, e foliga mai e lē faigofie ona fai lenā mea. Ae e faigofie ona fai e se tagata se mea, pe a fai ma le loto malie. E te iloa le uiga o le faaupuga ia fai ma le loto malie?— O lona uiga, ia matuā fiafia e fai se mea.

E oo lava i le taimi a o leʻi afio mai Iesu i le lalolagi, na loto malie e fai so o se mea na fai atu ai lona Tamā iā te ia. Na faia faapea e Iesu, ona e alofa i lona Tamā, o Ieova le Atua. E ese le matagofie o le nofoaga sa iai Iesu ma lona Tamā i le lagi. Ae na iai se galuega faapitoa na finagalo le Atua e fai e Iesu. Ina ia fai lenā galuega, sa tatau ona tuua e Iesu le lagi. Sa tatau ona fanau mai o se pepe i le lalolagi. Sa loto malie Iesu e fai lenei galuega, auā sa finagalo Ieova e na te faia.

Ae ina ia mafai ona fanau mai Iesu i le lalolagi o se pepe, na tatau ona iai sona tinā. E te iloa le tinā o Iesu?— O lona igoa o Maria. Na auina mai e Ieova lana agelu o Kaperielu mai le lagi, e talanoa iā Maria. Na fai atu Kaperielu iā Maria o le a ia fanaua se pepe tama, ma o le igoa o le pepe, o Iesu. O ai la o le a avea ma tamā o le pepe?— Na fai atu le agelu o le Tamā o le pepe, o Ieova le Atua. O le māfuaaga lenā ua taʻua ai Iesu o le Alo o le Atua.

O le ā sou iloa, o ā ni faalogona o Maria?— Pe na fai atu Maria, “Ou te lē manaʻo e fai aʻu ma tinā o Iesu”? E leai, sa fiafia Maria e fai le mea na manaʻo i ai le Atua. Ae na faapefea ona fanau mai le Alo o le Atua i le lagi, ma avea o se pepe i le lalolagi? O le ā le auala ua ese ai le fanau mai o Iesu, mai i isi pepe? E te iloa?—

Na faia e Ieova o tatou uluaʻi mātua o Atamu ma Eva, ina ia mafai ona la faatasi i se auala ofoofogia. Mulimuli ane, ona tuputupu aʻe lea o se pepe i totonu o le manava o lona tinā. Ua faapea mai tagata o se vavega le mea lenā! Ou te mautinoa e te ioe foʻi i ai.

Peitaʻi, na toe faia foʻi e le Atua se isi vavega e sili atu ona ofoofogia. Na aumai e le Atua le ola o lona Atalii mai le lagi, ma tuu i totonu o le manava o Maria. E na o le pau lava lenā o le taimi na faia ai e le Atua lenā ituaiga o vavega ofoofogia. O le iʻuga na oo i ai, na amata ona tuputupu aʻe Iesu i totonu o le manava o Maria, e pei ona tuputupu aʻe isi pepe i manava o o latou tinā. Mulimuli ane, na faaipoipo ai Maria iā Iosefa.

Ina ua oo i le taimi o le a fanau ai Iesu, na asiasi atu Maria ma Iosefa i le aai o Peteleema. Ae ua tumu i tagata. Ua leai se fale e avanoa mo Maria ma Iosefa, o lea, na nonofo ai loa i le fale o manu. O inā na fanau ai Iesu, ma ua faataʻoto i se pusa e tuu ai meaʻai a manu e pei ona e vaaia i le ata. O le pusa lenei e tuu ai meaʻai a povi ma isi manu.

E mataʻina mea na tutupu i le pō na fanau ai Iesu. Na alu ifo se agelu i ni leoleo mamoe e lata ane i Peteleema. Na taʻu atu e le agelu i leoleo mamoe, o Iesu o se tagata tāua. Na fai atu le agelu: ʻFaauta, ou te au mai iā te outou le tala lelei e olioli ai tagata. O le aso nei, ua fanau ai se tasi na te faaolaina tagata.’​—Luka 2:10, 11.

Na fai atu le agelu i leoleo mamoe e mafai ona latou vaai iā Iesu i Peteleema, ma o loo taʻoto i totonu o se pusa. Ona ō mai faafuaseʻi lea o isi agelu mai le lagi ma pepese faatasi ma le agelu lenei, e vivii i le Atua e faapea: ʻIa viia le Atua, ma ia manuia tagata loto faamaoni i le lalolagi.’​—Luka 2:12-14.

Ina ua toe foʻi agelu i le lagi, na ō ai loa leoleo mamoe i Peteleema ma latou maua ai Iesu. O inā na latou faamatala ai iā Iosefa ma Maria, tala lelei sa latou faalogo i ai. Pe e mafai ona e manatu i le fiafia na maua e Maria, ona o lona loto malie e avea ma tinā o Iesu?

Mulimuli ane, na ave ai e Iosefa ma Maria, Iesu i le aai o Nasareta. O i inā i Nasareta na ola aʻe ai Iesu. Ina ua matua Iesu, na amata ai loa lana galuega o le aʻoaʻoina o tagata. O se tasi lenei o galuega sa finagalo Ieova le Atua, e fai e lona Atalii i inei i le lalolagi. Na loto malie Iesu e fai lenā galuega, auā e alofa tele i lona Tamā.

A o leʻi amata lana galuega o se Faiaʻoga Sili, sa papatiso Iesu i le vaitafe o Ioritana, e Ioane le Papatiso. Ae sa iai se mea mataʻina na tupu! I le taimi na ea aʻe ai Iesu mai le vai, sa fetalai mai ai Ieova mai le lagi e faapea: “O loʻu Atalii pele lenā, ua ou fiafia lava iā te ia.” (Mataio 3:17) Pe e te lē fiafia ea pe a fai mai ou mātua e alolofa iā te oe?— Tatou te mautinoa sa fiafia foʻi Iesu.

Na faia e Iesu le mea saʻo i taimi uma. E leʻi pepelo Iesu e tusa ai ma lona tulaga moni. E leʻi faapea atu Iesu i tagata, o ia o le Atua. Na fai atu le agelu o Kaperielu iā Maria, o le a taʻua Iesu o le Alo o le Atua. Na fetalai mai foʻi Iesu lava ia, o ia o le Atalii o le Atua. E leʻi faapea atu Iesu i tagata, e sili atu mea ua ia iloa na i lo lona Tamā. Ae sa faapea atu o ia: “E sili loʻu Tamā iā te aʻu.”​—Ioane 14:28.

I le taimi na iai i le lagi, na faia e Iesu galuega na tuu atu e lona Tamā iā te ia. E leʻi faapea atu Iesu o le a ia faia, ae ese lana mea na fai. E alofa Iesu i lona Tamā. O le mea lenā, na faalogo ai i mea na fetalai mai ai lona Tamā. Ina ua afio mai i le lalolagi, na faia e Iesu le galuega na auina mai ai o ia e lona Tamā e fai. E leʻi faapea sa ese sana mea na fai. E lētioa lava fiafia Ieova i lona Atalii!

Tatou te mananaʻo foʻi e faafiafia Ieova, a ea?— E tatau la ona tatou faaalia, tatou te faalogo moni i le Atua e pei ona sa faia e Iesu. Ua talanoa mai le Atua iā i tatou, e ala i le Tusi Paia. E lē saʻo la le faafoliga atu o loo tatou faalogo i le Atua, ae tatou talitonu ma faia mea e lē tusa ma le Tusi Paia, a ea?— Ia manatua foʻi, o le a tatou naunau e faafiafia Ieova pe afai tatou te alolofa moni iā te ia.