Pe E te Manaʻo E te Muamua Lava i Mea Uma?

E TE masani i se tagata e manaʻo e muamua lava i mea uma?— Atonu e tautulei ma isi ina ia mafai ona pito i luma i le laina. Faamata ua e vaai i se mea faapena?— Na vaai le Faiaʻoga Sili e oo foʻi i tagata matutua, sa taumafai ia muamua pe ia maua mea e sili ona lelei. E leʻi fiafia i ai Iesu. Seʻi o tatou vaai po o le ā le mea na tupu.

O loo taʻua e le Tusi Paia, na valaaulia Iesu i se ʻaiga i le fale o se tamāloa Faresaio po o se taʻitaʻi lotu tāua. Ina ua taunuu Iesu, na silasila atu a o gasolo mai mālō ma filifilia nofoaga pito i lelei. O lea, na faamatala atu ai e Iesu se tala i ē na valaaulia. E te fia faalogo i le tala?—

Na faapea atu Iesu: ʻPe a valaaulia oe e se tasi i le ʻaiga o se faaipoipoga, aua e te nofo i le mea e sili.’ E te iloa le māfuaaga na fai ai le tala lenā e Iesu?— Na ia faapea mai, neʻi mea ane o valaaulia se tagata e sili atu lona tāua. E pei la ona e vaaia i le ata, ua sau le tagata e ona le ʻaiga ma faapea mai: ʻAlu ese ia, tuu le nofoaga lenā mo le tagata lenei, ae alu e nofo i ʻole.’ O ā la ni faalogona o le tagata valaaulia?— E māsiasi auā o loo tilotilo ane uma isi mālō o alu atu i se nofoaga faatauvaa.

Na faaalia e Iesu, e lē tatau i se tagata ona manaʻo i se tulaga e pito sili atu. O lea na ia fetalai atu ai: ʻAfai e valaaulia oe i le ʻaiga o se faaipoipoga, ia alu e nofo i le nofoaga e sili ona maulalo. Ona alu atu lea o lē na valaauliaina oe ma faapea atu, Sole, inā alu ia i le nofoa e sili; ona e mamalu ai lea i luma o mālō uma a o e alu atu i se nofoaga e sili atu.’​—Luka 14:1, 7-11.

Po o e malamalama i le uiga o le tala a Iesu?— O le a fai se faataʻitaʻiga ina ia iloa ai po o e malamalama. Seʻi faapea o loo e alu atu i totonu o se pasi e tumu i tagata. Faamata e tatau ona e faatopetope atu ina ia maua sou nofoa, ae tū se tagata matua?— Pe e fiafia Iesu i lau mea ua fai?—

Atonu e fai mai isi tagata e lē o naunau mai Iesu i a tatou mea o fai. E te talitonu i le tala lenā?— A o iai Iesu i le ʻaiga i le fale o le tamāloa Faresaio, na ia vaavaai ai o filifili e tagata mea sa latou nonofo ai. Pe e te lē manatu la e naunau mai foʻi Iesu iā i tatou i aso nei?— Ua sili atu le lelei o le nofoaga e silasila mai ai Iesu iā i tatou, auā o loo iai i le lagi.

E ono iai ni faafitauli pe a fia muamua lava se tagata i mea uma. E masani ona tupu ai finauga ma e feita ai tagata. O le mea lenā e tupu i isi taimi pe a ō tamaiti i se pasi. O le taimi lava e tū ai le pasi, e tautulei uma tamaiti e fia muamua i totonu. E latou te mananaʻo i nofoa lelei e latalata i faamalama. O le ā se mea atonu e tupu?— Ioe, e feita ai isi tamaiti.

E tele faafitauli e tupu mai ona o le fia muamua. Na oo foʻi faafitauli i soo o Iesu ona o le fia muamua. E pei ona tatou iloa mai le Mataupu e 6 o le tusi lenei, na latou fefinauaʻi po o ai o i latou e sili. O le ā le mea na fai e Iesu?— Ioe, na faasaʻo e Iesu ona soo. Peitaʻi, na toe fefinauaʻi foʻi. Seʻi tatou vaai po o lē a le auala na amata ai.

Sa faimalaga faatasi Iesu, o ona aposetolo faapea ai ma isi tagata, ma o le malaga mulimuli lenā sa latou faia ma Iesu i Ierusalema. Sa talanoa atu Iesu iā i latou e uiga i lona Malo, o lea na mananaʻo ai Iakopo ma Ioane e avea i laʻua ma tupu faatasi ma Iesu. Na la talanoa atu foʻi i lo la tinā o Salome, e tusa ai ma lo la manaʻoga. (Mataio 27:56; Mareko 15:40) A o latou faimalaga i Ierusalema, na alu atu ai Salome iā Iesu ma ifo iā te ia, ma fai atu lana talosaga.

Na fesili atu Iesu: “Se ā se mea e te manaʻo i ai?” Na tali atu Salome e manaʻo e nonofo lana fanautama i autafa o Iesu i lona Malo, e nofo le isi i lona itu taumatau, ae nofo le isi i le itu agavale. O le ā sou manatu, o ā ni faalogona o isi aposetolo e toʻasefulu ina ua faalogo i le mea na mananaʻo ai Iakopo ma Ioane lea na la uunaʻia lo la tinā e talosaga atu ai iā Iesu?—

Ioe, na matuā feita iā Iakopo ma Ioane. O lea na avatu ai e Iesu ni fautuaga lelei i ona aposetolo. Na faapea atu Iesu, e fiafia tele taʻitaʻi o nuu ese e avea i latou ma tagata tāua ma ē pule malosi ma e mananaʻo i tulaga maualuluga ina ia usiusitai isi iā i latou. Peitaʻi, na fetalai atu Iesu i ona soo e lē tatau ona latou faapena. Na i lo lea, na faapea atu Iesu: ʻO sē fia muamua iā te outou, ia fai o ia ma a outou tautua.’ Seʻi mafaufau i le mea lenā!​—Mataio 20:20-28.

E te iloa mea a le tautua e fai?— E auauna atu i tagata, ae e lē faatalitali e auauna mai tagata iā te ia. E nofo le tautua i le pito i tua, ae lē o le pito i luma. E gaoioi e pei o se tagata pito i faatauvaa, ae lē o se tagata sili ona tāua. Aua neʻi galo, na fetalai mai Iesu o sē e fia muamua, e tatau ona gaoioi e pei o se tautua i isi tagata.

O le ā la sou manatu, o le ā le uiga o le tala lenā mo i tatou?— Faamata e finau atu se tautua i lona matai po o ai e nofo i le pito i luma? Pe finau atu foʻi po o ai o le a ʻai muamua? O le ā sou manatu?— Na faamatala e Iesu e faapea, e faamuamua e le tautua lona matai i taimi uma lava.​—Luka 17:7-10.

Na i lo le taumafai la ina ia muamua, o le ā se mea e tatau ona tatou faia?— Ioe, e tatau ona pei i tatou o se tautua i isi tagata. O le uiga o lenā mea, ia faamuamua isi tagata iā i tatou. E lē gata i lea, ia tatou manatu e tāua atu isi tagata i lo tatou. Pe e mafai ona e mafaufau i mea e mafai ona e faamuamua ai isi tagata?— E lelei pe a e suʻe i le itulau e 40 ma le 41, ma e vaai i nisi o auala e mafai ona e faamuamua ai isi, e ala i le auauna atu iā i latou.

E te manatua foʻi na faamuamua e le Faiaʻoga Sili, isi tagata e ala i lona auauna atu iā i latou. I le pō mulimuli lava na faatasi ai ma ona aposetolo, na fufulu ai e Iesu o latou vae. Pe afai tatou te faamuamuaina foʻi isi tagata e ala i le auauna atu iā i latou, o le a tatou faafiafiaina ai le Faiaʻoga Sili ma lona Tamā, o Ieova le Atua.