Le Māfuaaga e lē Tatau ai Ona Tatou Pepelo

SEʻI faapea na fai atu se teineitiiti i lona tinā: “Ioe, e tuua loa le aʻoga ou sau i le fale.” Peitaʻi, na taaalo ma ana uō ina ua tuua le aʻoga ae sau i le fale ma fai i lona tinā: “Na fai mai le faiaʻoga ou te faatali pe a tuua le aʻoga.” Pe e saʻo le fai atu o se tala faapena?—

Pe e ono fai atu se tamaitiiti i lona tamā: “E leai, e lē o aʻu na kikiina le polo i totonu o le fale.” Ae e ā pe afai o ia moni na faia? Pe e sesē le faapea atu e lē o ia na faia?—

Na faaali mai e le Faiaʻoga Sili le mea saʻo e tatau ona tatou faia. Na fai mai: ʻA ia faapea la outou upu, Ioe, ioe; E leai, e leai; auā o isi upu na, e mai lē o leaga.’ (Mataio 5:37) O le ā le uiga o le tala a Iesu?— O lona uiga e tatau ona tatou faia mea tatou te fai atu ai.

O loo iai se tala i le Tusi Paia e faaalia ai le tāua o lo tatou tautatala faamaoni. O se tala e faatatau i ni tagata e toʻalua, o ē na fai mai o i laʻua o soo o Iesu. Seʻi o tatou vaai i le mea na tupu.

A o leʻi atoa le lua masina talu ona maliu Iesu, na ō mai ai i Ierusalema le toʻatele o tagata mai nofoaga mamao, e auai i se tausamiga tāua a tagata Iutaia e taʻua o le Penetekoso. Na faia e le aposetolo o Peteru se lauga matagofie e uiga iā Iesu, lea ua toe faatūina e Ieova na i le oti. O le taimi muamua lenei ua faalogo ai le toʻatele o tagata na ō mai i Ierusalema, i tala e uiga iā Iesu. Ua mananaʻo tagata nei ia latou iloa atili tala e faatatau iā Iesu. O le ā le mea o le a latou fai?

Na toe faaopoopo aso e nonofo ai. Peitaʻi ane, na oo ina uma tupe a isi ma latou moomia ai se fesoasoani auā le faatauina o a latou meaʻai. Ua mananaʻo nei le ʻausoo i Ierusalema e fesoasoani atu i tagata na asiasi mai. O lea na faatau atu ai e le toʻatele o i latou a latou mea ma avatu tupe na maua mai ai, i aposetolo o Iesu. Ona ave lea e le ʻauaposetolo tupe iā i latou na lē lava a latou mea.

Na faatau atu le fanua o Anania ma lana avā o Safaira, o ē na iai i le faapotopotoga Kerisiano i Ierusalema. E leai se tasi na fai i ai e faatau atu lo la fanua. Na fai la laʻua lava filifiliga e faatau atu. Peitaʻi, la te leʻi faatauina atu lo la fanua ona o le alolofa i soo fou o Iesu. Ae o le mea moni, na mananaʻo Anania ma Safaira ia manatu isi faapea o i laʻua o ni tagata e lelei tele. O lea na la filifili ai e taʻu atu i le ʻauaposetolo, la te foaʻi uma atu le tupe e maua mai i le faatauina o le fanua, ina ia fesoasoani ai i isi. Peitaʻi, e na o sina vaega o le tupe o le a la avatuina, ae e taʻu atu ua la foaʻiina atu le tupe atoa. O le ā sou manatu i le mea lenā?—

Na alu atu Anania i le ʻauaposetolo, ma ave i ai le tupe. Peitaʻi, o loo silafia mai e le Atua e lē o aveina uma le tupe. O lea na faailoa mai ai e le Atua i le aposetolo o Peteru, le lē faamaoni o Anania.

Ona fai atu lea o Peteru iā Anania: ʻAnania e, aiseā ua e faataga ai Satani e uunaʻia oe e te faia lenei mea? O oe e ana le fanua. E leʻi tau manaʻomia fua ona e faatau atu. Ina ua uma foʻi ona faatau atu, na pule lava oe i lau mea e fai i le tupe. Ae aiseā ua e faafoliga mai ai o loo aumai atoa le tupe, a o le mea moni ua na o se vaega o le tupe ua e aumaia? E lē gata ua e pepelo iā i matou, ae ua e pepelo foʻi i le Atua.’

Ioe, e matuiā le mea na fai e Anania. Ua tala pepelo! E leʻi faia e Anania mea na fai atu o le a ia faia. Na faafoliga atu o loo ia avatuina le tupe atoa. O loo taʻu mai e le Tusi Paia le mea na tupu. Na faapea mai: ʻUa faalogo Anania i ia upu, ona paʻū lea i lalo ma oti ai.’ Na taia e le Atua Anania, ma oti ai! Mulimuli ane, na ave lona tino i fafo ma tanu ai.

E pe a ma le tolu itula mulimuli ane, ae sau loa Safaira. E lē o iloa e Safaira le mea na tupu i lona toʻalua. O lea na fesili atu ai Peteru: ʻPe na lua faatauina atu le fanua i le aofaʻiga lea na lua aumaia iā i matou?’

Ua tali atu Safaira: ʻIoe, na ma faatauina atu le fanua i tupe na.’ Ae na tala pepelo Safaira! Na la teuina le isi vaega o le tupe na maua mai i le faatauina atu o le fanua. Na taia e le Atua Safaira, ma faapea ona oti ai foʻi.​—Galuega 5:1-11.

O le ā se lesona tatou te aʻoaʻoina mai i le mea na tupu iā Anania ma Safaira?— E tatou te aʻoaʻoina ai, e lē fiafia le Atua i tagata tala pepelo. E finagalo le Atua tatou te tautatala faamaoni i taimi uma. Peitaʻi, fai mai isi tagata e lē leaga le tala pepelo. O le ā sou manatu, e saʻo tagata na?— E te iloaina, o le māfuaaga ua oo mai ai maʻi, tigā ma le oti i tagata, ona o le tala pepelo?—

Manatua foʻi, na pepelo Satani i le uluaʻi fafine o Eva. Na ia fai atu iā Eva e lē oti pe a lē usitai i le Atua ma ʻai i le fua na faasāina e le Atua. Na talitonu Eva i le Tiapolo, ma ʻai ai i le fua. Na tauanau foʻi e Eva Atamu ia ʻai i le fua. Ona o lea mea, na avea ai i laʻua ma tagata agasala, ma fananau mai ai la fanau i le agasala. Na mafatia le fanau a Atamu ma oo ai i le oti, ona o le agasala. Na faapefea ona amata nei faafitauli uma?— Na amata i se pepelo.

E lētioa la a taʻua e Iesu faapea o le Tiapolo o ʻle pepelo, ma le tamā o le pepelo’! O ia na muamua lava ona faia le pepelo. Afai e pepelo se tagata, o lona uiga ua fai e le tagata lenā le mea na faia muamua e le Tiapolo. E tatau ona tatou mafaufau i le mea lenā, pe a faapea tatou te fia faia se tala pepelo.​—Ioane 8:44.

O le ā le taimi e ono faaosoosoina ai oe e pepelo?— Pe lē o le taimi e te fai ai se mea sesē?— Atonu ua malepe se mea iā te oe e ui lava e te leʻi fuafua e fai. A faapea e fesili atu po o ai na malepe ai, faamata e tatau ona e tuuaʻia sou tei? Pe e tatau ona e faatagā leiloa le māfuaaga na malepe ai?—

Ae ā pe afai e tatau ona fai ia uma au meaaʻoga, peitaʻi ane na e faia na o sina vaega? Pe e tatau ona e faapea atu ua uma au meaaʻoga, ae o le mea moni e leʻi uma lelei?— E tatau ona tatou manatuaina Anania ma Safaira. La te leʻi taʻuina atu uma le mea moni. Na faaalia e le Atua le leaga o le la mea na fai, e ala i le taiaina o i laʻua ma feoti ai.

O lea la, e tusa lava po o le ā la tatou mea e fai, ae o le a atili ai ona matuiā le faafitauli pe a tatou pepelo, ma natia isi o mea e tutupu. Ua fai mai le Tusi Paia: “Ia tautalatala faamaoni.” Na toe faapea mai foʻi: ʻAua le pepelo atu le tasi i le isi.’ E faamaoni Ieova i taimi uma, ma e finagalo foʻi e tatou te tautatala faamaoni i taimi uma.​—Efeso 4:25; Kolose 3:9.