Se Tusi Mai i le Vaega Pule

Mo Oe le Tagata Peleina o Lē e Alofa iā Ieova:

Na fetalai Iesu: “E iloa e outou le upu moni, e tuusaʻoloto foʻi outou e le upu moni.” (Ioane 8:32) Maʻeu ni upu faalaeiau! Ioe, e mafai ona tatou iloa le upu moni e ui lava o loo taatele le pepelo i nei “aso e gata ai” e sili ona faigatā. (2 Timoteo 3:1) Po o e manatua ea le taimi na e faatoʻā aʻoaʻoina ai le upu moni o le Afioga a le Atua? Ioe, o se taimi inā fiafia!

Ae peitaʻi, e ui lava e tāua le iloa lelei o le upu moni ma faasoa atu e lē aunoa lenā upu moni i isi, ae e tāua foʻi ona tatou amioaʻi e tusa ai ma lenā upu moni. Ina ia tatou faia lenā mea, e tatau ona tatou tumau i le alofa o le Atua. O le ā le uiga o lenā mea? E maua le tali i fetalaiga a Iesu i le pō a o leʻi maliu. Na faapea atu o ia i ona aposetolo faamaoni: “Afai tou te tausi i aʻu poloaʻiga, tou te tumau ai i loʻu alofa, e pei ona ou tausi i poloaʻiga a le Tamā, ma ou tumau ai i lona alofa.”​—Ioane 15:10.

Seʻi mātau mai, na tumau Iesu i le alofa o le Atua e ala i le tausia o poloaʻiga a lona Tamā. E faapena foʻi i tatou i aso nei. Ina ia tatou tumau i le alofa o le Atua, e ao ona tatou faatatauina le upu moni i le olaga i aso faisoo. Na fetalai atu Iesu i le pō lava lenā: “Afai ua outou iloa nei mea, e fiafia outou pe a outou faia.”​—Ioane 13:17.

Matou te faamoemoe o le a fesoasoani lenei tusi iā te oe, ina ia faaauau ai ona e faatatauina le upu moni i lou olaga, ma faapea ona e tumau ai “i le alofa o le Atua . . . lea e iʻu ai i le ola e faavavau.”​—Iuta 21.