LESONA 4

Aiseā ua Matou Saunia ai le Faaliliuga a le Lalolagi Fou?

Le tatalaina o le uluaʻi lomiga O le Tusi Paia-O le Faaliliuga a le Lalolagi Fou

Tagata o loo matamata i le O le Tusi Paia-O le Faaliliuga a le Lalolagi Fou i Congo (Kinshasa) — Congo (Kinshasa)

Tatalaina O le Tusi Paia-O le Faaliliuga a le Lalolagi Fou i Rwanda — Rwanda

O se fasi manusikulipi o le Symmachus o loo iai le suafa o le Atua — O loo iai i fasi manusikilipi o le Symmachus le suafa o le Atua i le Salamo 69:31, i le senituri lona tolu po o le fā T.A.

I le tele o tausaga, na faaaogā, lolomiina ma tufatufaina ai e Molimau a Ieova faaliliuga eseese o le Tusi Paia. Peitaʻi, na matou iloa ua manaʻomia se lomiga fou e sili atu ona lelei e fesoasoani i tagata e aʻoaʻoina ai le “poto saʻo i le upu moni,” ona o le finagalo lenā o le Atua mo tagata uma. (1 Timoteo 2:3, 4) O lea, i le 1950, na amata ai ona matou tatala ni vaega o le Tusi Paia o loo faaaogā ai le gagana o aso nei, le New World Translation i le faa-Peretania. Ua faaliliuina ma le faamaoni ma le saʻo lenei Tusi Paia i le sili atu i le 130 gagana.

Sa manaʻomia se Tusi Paia e faigofie ona malamalama i ai. E fesuisuiaʻi gagana a o faagasolo taimi, ma o loo iai i le tele o faaliliuga faaupuga e lē o toe faaaogāina ma e faigatā ona malamalama i ai. E lē gata i lea, ua maua nisi manusikulipi anamua e saʻo lelei ma e talitutusa ma uluaʻi manusikulipi, ma ua iʻu ai i se malamalamaga e sili atu o Tusitusiga Eperu, Aramaika, ma Eleni.

Sa manaʻomia se faaliliuga e faamaoni atu i afioga a le Atua. Nai lo o le saʻoloto e suia tusitusiga faagaeeina a le Atua, e tatau i tagata faaliliu o le Tusi Paia ona faamaoni i uluaʻi tusitusiga. Peitaʻi i le tele o faaliliuga, e lē o faaaogāina ai i Tusitusiga Paia le suafa o le Atua, o Ieova.

Sa manaʻomia se Tusi Paia e viia ai Lē na tusiaina. (2 Samuelu 23:2) E pei ona faaāta mai i inei, i le Faaliliuga a le Lalolagi Fou, ua toe faafoʻisia ai le suafa o Ieova lea e tusa ma le 7,000 taimi e aliaʻi mai ai i manusikulipi tuai o le Tusi Paia e pei ona faataʻitaʻi mai i le faaaʻoaʻoga i loo taʻua i lalo. (Salamo 83:18) O iʻuga o tausaga e tele na faia ai ni iloiloga filigā, ua tatou fiafia ai e faitau lenei Tusi Paia a o faailoa manino mai ai manatu o le Atua. E tusa pe e lē o maua le Faaliliuga a le Lalolagi Fou i lau gagana, e matou te faalaeiauina oe e atiaʻe se masaniga lelei o le faitauina o le Afioga a Ieova i aso taʻitasi.—Iosua 1:8; Salamo 1:2, 3.

Aiseā na matou filifili ai ua manaʻomia se faaliliuga fou o le Tusi Paia?
O le ā le masaniga i aso taʻitasi e lelei mo so o se tasi o loo naunau e aʻoaʻoina le finagalo o le Atua?