O le ā o le a Tupu i Lotu?

1. Pe e lelei lotu uma?

O loo iai i lotu le toʻatele o tagata faamaoni. O se tala lelei le iloa e silafia mai e le Atua i latou na, ma e manatu mamafa mai i ai. Peitaʻi e faanoanoa lava, ona ua faaaogā e nisi o tagata ia lotu mo ni fuafuaga lē lelei. (2 Korinito 4:3, 4; 11:13-15) E tusa ai ma tala fou, ua faaauiluma e nisi o lotu faiga faatupu faalavelave, fasiotia o tagata, o taua, ma le sauāina ma le faileagaina o tamaiti i feusuaʻiga matagā. O lenei mea ua matuā faanoanoa ai lava tagata faamaoni o le Atua!​—Faitau le Mataio 24:3-5, 11, 12.

O le lotu moni e latou te viiaina le Atua, ae o lotu sesē e latou te faia mea e lē fiafia ai lona finagalo. E aʻoaʻoina e lotu sesē manatu e lē o taʻua i le Tusi Paia, e aofia ai aʻoaʻoga sesē e uiga i le Atua ma i latou ua maliliu. Ae e finagalo Ieova ina ia iloa e tagata upu moni e uiga iā te ia.​—Faitau le Esekielu 18:4; 1 Timoteo 2:3-5.

2. O le ā o le a tupu i lotu?

O le mea e fiafia ai, ona e lē faasesēina le Atua i lotu o loo faapea mai e alolofa iā te ia, ae o le mea moni e fiafia i latou i le lalolagi a Satani. (Iakopo 4:4) O loo taʻua i le Afioga a le Atua lotu sesē uma o “Papelonia le Aai Tele.” O Papelonia o le aai anamua na amata mai ai tapuaʻiga sesē ina ua mavae le Lolo i aso o Noa. E lē o toe umi ona aumaia loa lea e le Atua le faaumatiaga i lotu o loo faasesēina ma faapologaina tagata.​—Faitau le Faaaliga 17:1, 2, 5, 16, 17; 18:8.

E iai foʻi se isi tala lelei. E lē o faagaloina e Ieova tagata faamaoni uma o loo iai i lotu sesē i le lalolagi atoa. Ua ia autasia i latou nei e ala i le aʻoaʻoina i le upu moni.​—Faitau le Mika 4:2, 5.

3. O le ā e tatau ona faia e tagata faamaoni?

E alofa Ieova i tagata e fiafia e fai le mea saʻo ma lelei. Ua apoapoaʻi atu o ia iā i latou ina ia ō ese mai i lotu sesē. O tagata e alolofa i le Atua e lotomalilie e faia suiga i o latou olaga, ina ia faafiafia ai o Ia.​—Faitau le Faaaliga 18:4.

I le uluaʻi senituri, na tali mai ma le olioli tagata ina ua faalogo i le tala lelei na talaʻia atu e aposetolo. Na latou aʻoaʻoina se olaga fou mai iā Ieova, o se olaga fiafia e iai se fuafuaga ma se faamoemoe. O i latou o se faaaʻoaʻoga lelei mo i tatou i aso nei, ona na latou talia le tala lelei e ala i le faamuamua o Ieova i o latou olaga.​—Faitau le 1 Tesalonia 1:8, 9; 2:13.

E talileleia e Ieova i lona aiga, tagata tapuaʻi o ē ua liliu ese mai i lotu sesē. Pe a e talia lana valaaulia māfana, o le a e maua la se faauōga ma ia, o se aiga fou e alolofa o ē e tapuaʻi iā Ieova, faapea ma le ola e faavavau.​—Faitau le Mareko 10:29, 30; 2 Korinito 6:17, 18.

4. O le a faapefea ona aumaia e le Atua le olioli i le lalolagi atoa?

O le faamasinoga o lotu sesē lea o loo loma nei, o se tala lelei. O le a aumaia ai se mapusaga mo tagata uma o loo mafatia i le lalolagi. O le a lē toe faasesēina pe e feʻainaʻi tagata ona o lotu sesē. O le a autasia tagata uma lava i le tapuaʻiga i le Atua moni e toʻatasi.​—Faitau le Faaaliga 18:20, 21; 21:3, 4.