Se Malo o le a Pulea le Lalolagi Atoa

Pe e te iloa o le ā le malo lea o le a tatou talanoa i ai?— Ioe, o le Malo o le Atua. O le Malo lenā o le a suia le lalolagi e avea ma parataiso. Pe e te fia iloa atili e uiga i lenā Malo?—

O so o se malo lava e iai sona tupu. O le tupu, o ia lenā e pulea tagata o lona atunuu. E te iloa o ai le tupu o le Malo o le Atua?— O Iesu Keriso. E afio o ia i le lagi. E lē o toe umi ae pule mai lenā Tupu i tagata uma i le lalolagi! Faamata o le a tatou maua le fiafia, pe a pule mai Iesu i le lalolagi atoa?—

Ioe, o le a tatou matuā fiafia lava! O le a lē toe iai ni tagata e fetauaʻi pe e iai foʻi ni taua i le Parataiso. O le a alofa le tasi i le isi. E lē toe iai se isi e maʻi pe oti. O le a pupula mata o ē tauaso, faalogo taliga o ē tutuli, ma osooso ē pipili. O le a tele meaʻai mo tagata uma. O le a lē toe taufeʻai manu, o le a nonofo filemu manu uma, ma o le a nonofo filemu foʻi manu ma tagata. O le a toe feola mai foʻi tagata ua feoti. O le toʻatele o tagata na tatou talanoa i ai i lenei polosiua, e pei o Repeka, Raava, Tavita, ma Elia, o le a toe feola uma mai! Pe e te fia feiloaʻi iā i latou na?—

E alofa Ieova iā te oe ma e finagalo o ia, ia e maua le fiafia. Pe afai e faaauau ona e aʻoaʻoina e uiga iā Ieova ma usitaʻi iā te ia, o le a mafai la ona e ola e faavavau i le parataiso matagofie! Po o le mea lenā e te manaʻo i ai?—