Folafolaga a le Malo​—Faia ia Fou Mea Uma

A O E tauina mai se apu, ua e sosogiina lona manogi manaia a o e tuuina i totonu o se ato. Ua umi ona e galue, ae o loo e lagona lava le malosi ma manaʻo e faaauau pea. I le isi itu o le faatoʻaga, o loo galue ai lou tinā ma talatalanoa fiafia ma isi ou tauaiga ma uō. Ua foliga talavou o ia, e pei lava ua e toe vaai i ai i le taimi a o e laʻitiiti. E faigatā ona e talitonu i le taimi na faasolo ai ina matua o ia i le faiga tuai o mea, lea ua mavae atu. Sa e vaai iā te ia i le taimi na maʻi tigāina ai, aemaise le taimi mulimuli sa e uuina ai lona lima ina ua tali oti, ma na e matuā tagi lotulotu i autafa o lona tuugamau. Peitaʻi, o lea ua e toe vaai atu iā te ia faapea le toʻatele o isi ua toetutū mai, ma toe ola mālōlōina.

Ua tatou iloa o le a oo moni mai lenā aso, auā e taunuu moni folafolaga uma a le Atua. O le a iloiloina i lenei mataupu auala o le a faataunuuina ai nisi o folafolaga a le Malo, a o leʻi oo i le taua o Amaketo. O le a iloiloina ai foʻi nisi o folafolaga mataʻina a le Malo o le a faataunuuina mulimuli ane ai. Maʻeu lo tatou fiafia i le vaai atu i le taimi o le a pulea ai e le Malo o le Atua le lalolagi atoa, ma faia ia fou mea uma!