Ua Faia e Iesu Galuega Mamana i Kapanaumi

Ua valaaulia e Iesu ona soo e toʻafā o Peteru, Aneterea, Iakopo ma Ioane e avea ma faifaiva i tagata. Ua oo nei i le Sapati, ma ua latou ō atu i se sunako i Kapanaumi. Ua aʻoaʻo atu Iesu i le sunako, ma ua taufaiofo tagata i le auala ua ia aʻoaʻo atu ai, auā ua pei o sē ua iai le pule ae e lē pei o le ʻautusiupu.

O loo iai foʻi i lea taimi se tamāloa ua pulea e se temoni. Ua ia alaga ane ma le leotele: “Iesu e, le Nasareta! Aiseā ua e faalavelave mai ai iā i matou? Po ua e sau ea e faaumatia i matou? Ua ou iloa o oe o Lē e Paia e te sau mai i le Atua.” Ae ua vavao atu Iesu i le temoni e faapea: “Ia e filemu, ma ia e alu i fafo mai iā te ia!”—Mareko 1:24, 25.

O le taimi lea ua maʻilili ai le tamāloa, ma faapaʻū i le eleele ona o le agaga leaga. Ua ʻeʻē leotele le temoni ma alu ese ai mai le tamāloa. Peitaʻi, ʻe leʻi afāina’ le tamāloa. (Luka 4:35) Ua maofa tagata o loo i le sunako iā te ia, ma faapea ane: ʻO le ā ea lenei mea? Ua iā te ia le pule e faatonu ai e oo lava i agaga leaga, ma ua latou usiusitaʻi iā te ia.’ (Mareko 1:27) Ua oo ina salalau atu le tala e uiga i lenei mea mataʻina na tupu i vaipanoa uma o Kalilaia.

Ua tuua nei e Iesu ma ona soo le sunako, ae ō atu i le fale o Simona Peteru. O i inā o loo taoto ai le tinā o le avā a Peteru, ua maʻi tigāina o ia i le fiva. Ua latou talosaga atu iā Iesu e fesoasoani iā te ia. O lea, ua tago atu Iesu i lona lima ma faanofo o ia i luga. O le taimi lava lea ua teʻa ai lona fiva, ma ua amata ai loa ona auauna atu iā Iesu ma ona soo, atonu i le saunia o se meaʻai mo i latou.

Ua goto le lā ma ua lolofi mai tagata i le fale o Peteru, ma aumai o latou tagata mamaʻi. Ua peiseaʻī ua potopoto ane le aai atoa i le fale o Peteru. Ua latou ō mai ina ia faamālōlōina o latou tagata mamaʻi. ʻUa latou aumaia iā te ia o tagata e maua i maʻi eseese. Ua faaee ona aao iā i latou taʻitoʻatasi, ona mālōlō ai lea o i latou.’ (Luka 4:40) E pei ona valoia, po o ā lava maʻi e maua ai tagata, e mafai ona fesoasoani atu Iesu iā i latou. (Isaia 53:4) Ua ia tuusaʻoloto foʻi i latou ua pulea e temoni. A o ō ese agaga leaga mai i tagata, ua latou alalaga mai: “O oe o le Alo o le Atua.” (Luka 4:41) Peitaʻi, ua vavao i latou e Iesu e aua le tautatala. E latou te iloa o Iesu o le Keriso, ma e lē manaʻo o ia ina ia latou faafoliga atu e pei o loo latou auauna i le Atua moni.