Aiseā ua Lē Anapopogi ai Soo o Iesu?

O loo iai lava Ioane le Papatiso i le falepuipui talu mai le taimi na auai ai Iesu i le Paseka i le 30 T.A. Na manaʻo Ioane ina ia avea ona soo ma soo o Iesu. Peitaʻi, talu mai lava le taimi na faafalepuipuiina ai Ioane e leʻi faia faapea e ona soo uma.

Ua latalata i le Paseka i le 31 T.A., ma ua ō atu nei nisi o soo o Ioane iā Iesu ma fesili atu: “Aiseā ua matou anapopogi ai ma le ʻau Faresaio, ae e lē anapopogi ou soo?” (Mataio 9:14) E faia e le ʻau Faresaio le anapogi o se tū faalelotu. Ua faaaogā e Iesu se talafaatusa e faatatau i se Faresaio faafiaamiotonu ua tatalo e faapea: ʻLe Atua e, ou te faafetai atu iā te oe ona ua ou lē pei o isi tagata. E faalua ona ou anapogi i le vaiaso.’ (Luka 18:11, 12) E foliga mai o loo faia foʻi e soo o Ioane le anapogi e pei o se tū masani, pe atonu e latou te faia e faailoa ai lo latou faanoanoa ona o le faafalepuipuiina o Ioane. Ua tuufesili foʻi soo o Ioane pe aiseā e lē anapopogi ai soo o Iesu, atonu ina ia faailoa atu ai lo latou faanoanoa i le mea ua tupu iā Ioane.

Ua tali atu Iesu e ala i le avatu o se faaaʻoaʻoga: “Pe e iai ea se māfuaaga e faanoanoa ai uō a le alii faaipoipo a o faatasi o ia ma i latou? Ae e oo mai aso e aveesea ai le alii faaipoipo mai iā i latou, ona latou anapopogi ai lea.”—Mataio 9:15.

O le alii faaipoipo lea sa faasino atu i ai Ioane, o Iesu. (Ioane 3:28, 29) O lea, ua lē anapopogi ai soo o Iesu, ona o loo latou iai faatasi ma ia. Mulimuli ane, pe a maliu Iesu, o le a faanoanoa ona soo ma anapopogi. Peitaʻi, pe a toe faatūina mai o ia, o le a lē manaʻomia ona latou toe faanoanoa ma anapopogi.

Ua toe fetalai atu Iesu i isi foʻi talafaatusa e lua: “E leai se tasi e na te fonoina se ofu tele tuai i se fasiʻie fou; auā e atili masae ai pe a mimigi le fasiʻie fou. E lē mafai foʻi e tagata ona utu le uaina fou i fagupaʻu tuai, auā pe a faia faapea, ona pāpā ai lea o fagupaʻu ma masaa ai le uaina ma leaga ai fagupaʻu. Ae e masani ona utu e tagata le uaina fou i fagupaʻu fou.” (Mataio 9:16, 17) O le ā le manatu o loo taumafai Iesu e faamalamalama atu?

O loo fesoasoani Iesu i soo o Ioane le Papatiso e malamalama, e lē tatau i se tasi ona faatalitalia ona soo e mulimuli i tū masani a Iutaia, e pei o a latou anapogi faalelotu. E leʻi afio mai o ia e toe fonofono ma faasaoina se faiga tuai tau tapuaʻiga, lea ua tatau ona aveesea atoatoa. Nai lo o lea, o loo faalaeiau e Iesu se faiga faaletapuaʻiga e lē taofimau i faiga faa-Iutaia o na taimi, faapea uputuu a tagata. Ioe, e lē o taumafai Iesu e fonoina se ofu tuai i se fasiʻie fou, pe taumafai foʻi e utuina se uaina fou i se fagupaʻu tuai.