Ua Toe Faatūina e Iesu se Tama Talavou

Ua mavae atu sina taimi talu le faamālōlōina o le auauna a se taʻitaʻiʻau. Ua tuua nei e Iesu Kapanaumi ae agaʻi atu i Naina, o se aai e silia i le 20 maila (32 km) le mamao i le itu i saute i sisifo. Peitaʻi e lē na o ia, o loo latou iai faatasi ma ona soo faapea le motu o tagata. E taunuu la latou faigāmalaga i fafo atu o le aai o Naina, ae ua lata i le afiafi. O i inā ua latou fetaui ai ma le toʻatele o tagata Iutaia, o loo mulimuli atu i nisi o loo amoina le fata o loo iai le tino oti o se alii talavou. Ua latou ave lona tino i fafo o le aai e tanu ai.

O lē e sili ona faavauvau i nei tagata, o le tinā o lenei alii talavou. O ia o se fafine ua oti lana tane, a o lea foʻi ua oti lana tama e toʻatasi. Ina ua maliu lana tane, sa faamāfanafanaina pea o ia ona sa iai lana tama. Seʻi mafaufau i le vavalalata o le la faiā. O ona faamoemoega ma lona lumanaʻi sa faalagolago uma i lana tama. Peitaʻi, o lea ua maliu foʻi o ia. O ai la o le a tausia ma faamāfanafanaina lenei tinā?

Ua silasila atu Iesu i lenei fafine, ona matuā ootia ai lea o lona finagalo i le tulaga faavauvau o loo iai o ia. O lea, ua fetalai atu ai o ia i se auala mālū ma faamalosiau e faapea: “Aua e te tagi.” Peitaʻi, ua iai se isi gaoioiga ua faia e Iesu. Ua ia faalatalata atu i le fata o loo iai le tino oti ma paʻi atu i ai. (Luka 7:13, 14) O gaoioiga ua faia e Iesu ua faateʻia ai tagata o loo faavauvau, ma ua latou tutū faafuaseʻi ai. Atonu ua taumānatu le toʻatele o i latou: ʻO le ā le uiga o lana fetalaiga, ma o le ā le gaoioiga o le a ia faia?’

Ae faapefea i latou o loo iai faatasi ma Iesu, o ē sa vāai i ana galuega mamana o le faamālōlōina o le tele o maʻi? E foliga mai e latou te leʻi vāai lava o toe faatūina e Iesu se tagata mai i le oti. E ui lava sa iai tagata sa toe faatutūina mai le oti i le taimi ua teʻa, ae pe e mafai e Iesu ona faia faapea? (1 Tupu 17:17-23; 2 Tupu 4:32-37) Ua fetalai atu Iesu: “Le tauleʻaleʻa e, ou te fai atu iā te oe, tū ia i luga!” (Luka 7:14) O le mea tonu lenā ua tupu. Ua tū i luga le tauleʻaleʻa ma ua amata ona tautala. Ua avatu o ia e Iesu i lona tinā, o lē ua matuā faatumulia i le olioli. O lea, ua la toe faatasi nei ma lana tama.

Ina ua vāai tagata i le mea ua tupu, ona latou faamamaluina ai lea o Ieova o Lē e foaʻiina mai le ola. Ua faapea mai nisi: “Ua tulaʻi mai se perofeta sili iā i tatou.” Ae ua malamalama isi tagata i le uiga moni o le gaoioiga ua faia e Iesu, ma ua latou faapea atu: “Ua liuliualo mai le Atua i ona tagata.” (Luka 7:16) Ua salalau atu tala e faatatau i lenei mea ofoofogia ua tupu i nuu tuaoi, ma atonu foʻi i le nuu na ola aʻe ai Iesu o Nasareta, lea e pe ā ma le 6 maila (10 km) le mamao mai i Naina. Ua oo atu foʻi lenei tala i le itu i saute i Iutaia.

O le taimi lea, o loo faafalepuipuiina pea Ioane le Papatiso. Ua matuā naunau lava o ia i galuega mamana ua faia e Iesu, lea o loo faamatala atu e ona soo iā te ia. O le ā le auala ua ia tali atu ai?