Talaʻiga i Kalilaia ma le Toleniina o Aposetolo

Ua pe ā nei ma le lua tausaga o talaʻi pea ma le maelega Iesu. Po o le taimi lenei e faifailemū ai? E leai, ua faalautele atu e Iesu lana galuega talaʻi e ala i le “malaga atu . . . i aai ma nuu uma [o Kalilaia], ua aʻoaʻo atu i o latou sunako, ma talaʻi atu le tala lelei o le malo, ma faamālōlō i maʻi eseese ma maʻi tigāina uma.” (Mataio 9:35) O mea ua ia vaaia, ua ia iloa ai e manaʻomia ona faalautele atu le galuega talaʻi. Ae o le ā le auala o le a ia faataunuuina ai lenei vala?

O so o se mea lava e maliu atu i ai Iesu, e na te vaaia ai tagata o loo manaʻomia le faamālōlōga faaleagaga ma faamāfanafanaga. Ua pei i latou o mamoe ua faamanuʻalia ma agaleagaina, ua leai so latou leoleo mamoe. Ua mutimutivale lona alofa iā i latou ma faapea atu i ona soo: “E moni, e telē le galuega o le seleselega, ae e toʻaitiiti le ʻaufaigaluega. O le mea lea, ia outou ʻaiʻoi atu ai i le Alii o le seleselega, ina ia auina mai se ʻaufaigaluega e faia le seleselega.”—Mataio 9:37, 38.

Ua iloa e Iesu le gaoioiga e tatau ona fai. Ua ia faapotopoto mai ona aposetolo e toʻa 12, ma tofia i latou e galulue taʻitoʻalua. Ua ia avatu iā i latou faatonuga manino nei: “Aua tou te ō atu i se ala o nuu ese, aua foʻi le ō atu i se aai o Samaria. A ia ō atu pea i mamoe ua leiloloa o le aiga o Isaraelu. A outou ō, ia talaʻi atu e faapea: ʻUa latalata mai le malo o le lagi.’”—Mataio 10:5-7.

O le Malo lea o le a latou talaʻia atu, o le Malo lea na taʻua e Iesu i le tatalo faaaʻoaʻo. O le faaupuga “ua latalata mai le malo,” e faasino atu i le iai o Iesu Keriso le Tupu tofia a le Atua i lenā taimi. Peitaʻi, e faapefea ona faamaonia o soo o Iesu o ni sui o le Malo? Ua tuuina atu e Iesu iā i latou le mana e faamālōlōina ai ē mamaʻi, ma toe faatutūina ai ē ua feoti. E latou te faia fua nei vavega. E faapefea la ona tausia manaʻoga faaletino o le ʻauaposetolo, e pei o a latou meaʻai i aso taʻitasi?

Ua faatonuina e Iesu le ʻauaposetolo ina ia aua neʻi sauniunia ni a latou meafaitino i lenei malaga faataamilo. E lē tatau ona avea ni auro, siliva, po o tupe ʻapamemea i a latou ato tupe. E lē tatau foʻi ona ave ni taga meaʻai i le malaga, po o ni ofutino se lua po o ni seevae. Aiseā? Ua faamautinoa atu e Iesu iā i latou: “E tatau lava ona avatu le meaʻai i le tagata faigaluega.” (Mataio 10:10) O tagata e taliaina le feʻau, o i latou ia o le a fesoasoani i le saunia o mea e manaʻomia e le ʻausoo. Ua fetalai atu Iesu: “O so o se mea e tou te ulu atu ai i se fale, ia nonofo ai seʻia oo ina outou ō ese mai lea nuu.”—Mareko 6:10.

Ua avatu foʻi e Iesu faatonuga i le auala e faaoo atu ai le feʻau o le Malo i tagata o le aiga: “A outou ulufale atu, ia faafeiloaʻi i le aiga. Afai ua tatau le feʻau i lea aiga, ia outou faapea atu ia filemu le aiga nei. Ae afai e lē tatau, ona toe faafoʻi mai lea o la outou upu. Afai e lē talia outou ma lē fia faalogo foʻi i la outou upu, pe a outou ō ese mai i lenā fale po o lenā aai, ia tūtū atu i ai le pefu mai i o outou vae.”—Mataio 10:12-14.

E ono teena foʻi e se aai po o se nuu atoa la latou feʻau. O le ā la le iʻuga e oo i na nofoaga? Ua faamatala e Iesu, e matuā ogaoga le faamasinoga e oo iā i latou. Ua ia fetalai: “E moni ou te fai atu iā te outou, e māmā atu le faasalaga o Sotoma ma Komoro i le Aso Faamasino, nai lo o lenā aai.”—Mataio 10:15.