Na Latou Fouvale iā Ieova

E leʻi umi se taimi na iai tagata Isaraelu i le toafa, ae fouvale Koru, Tatano, Apiramo ma isi tagata e toʻa 250 iā Mose ma Arona. Na latou faapea atu iā i laʻua: ʻUa matou fiu iā te oulua. Aiseā ua avea ai oe ma o matou taʻitaʻi, ae avea Arona ma ositaulaga sili? O loo faatasi foʻi Ieova ma i matou uma, ae e lē na o oulua ma Arona.’ E leʻi fiafia le finagalo o Ieova i lea mea. I le silafaga a Ieova, ua fouvale atu nei tagata iā te ia.

Na faapea atu Mose iā Koru ma tagata na lagolagoina o ia: ʻŌ mai taeao i le faleʻie paia, ma aumai mea e tuu ai a outou afi, ma tuu i ai ma mea manogi. O le a faailoa mai e Ieova po o ai le tagata o le a ia filifilia.’

I le aso na sosoo ai, na ō atu Koru ma tamāloloa e toʻa 250 i le faleʻie paia e feiloaʻi ai ma Mose. O i inā na latou faamū ai mea manogi, e pei i latou o ni ositaulaga. Na faapea atu Ieova iā Mose ma Arona: ʻIa oulua ō ese mai iā Koru ma tagata o loo lagolagoina o ia.’

E na o Koru sa alu atu iā Mose i le faleʻie paia, ae e leʻi ō Tatano, Apiramo ma o la aiga. Na faapea mai Ieova i tagata Isaraelu ina ia ō ese mai i faleʻie o Koru, Tatano ma Apiramo. O le taimi lava lenā na ō ese ai tagata Isaraelu. Na ō i fafo Tatano, Apiramo ma o la aiga mai i o latou faleʻie, ma na faafuaseʻi ona māvaevae le eleele ma folo ai i latou. Ae na paʻū mai se afi mai i le lagi ma susunu ai Koru ma tagata e toʻa 250 na lagolagoina o ia, a o latou iai i luma o le faleʻie paia.

Ona faapea atu lea o Ieova iā Mose: ʻIa e aumai ni tootoo mai i taʻitaʻi o ituaiga taʻitasi, ma tusi ai le igoa o le tagata i luga o lona tootoo. Ae o le tootoo o le ituaiga o Levi, ia tusi ai le igoa o Arona. Ia tuu na tootoo i totonu o le faleʻie paia. O le tootoo ou te filifilia, o le a ola mai ai ni fugālaau.’

I le aso na sosoo ai, na aumai e Mose tootoo uma ma faaali atu i taʻitaʻi o ituaiga taʻitasi. Ae o le tootoo o Arona, sa ola ai fugālaau ma fua mai ai sekati matutua. O le auala lea na faamautinoa mai ai e Ieova, ua ia filifilia Arona e avea ma ositaulaga sili.