Na Faalafi e Raava Tagata Vāai

Ina ua ō atu tagata vāai Isaraelu i le aai o Ieriko, na la nonofo i le fale o se fafine e igoa iā Raava. Na faalogo i ai le tupu o Ieriko ma na ia auina atu ai ni fitafita i le fale o Raava. Na faalafi e Raava nei tagata vāai i le taualuga o lona fale, ma fai atu i fitafita e lē iloa po o fea ua ō i ai nei tagata. Na fai atu Raava i tagata vāai: ʻO le a ou fesoasoani iā te oulua, ona ou te iloa o loo fesoasoani Ieova iā te outou, ma o le a outou faatoʻilaloina le nuu. Faamolemole ia tautō mai o le a oulua faasaoina loʻu aiga.’

Na tali atu tagata vāai: ʻE ma te tautō atu e leai se tasi i totonu o lou fale o le a fasiotia.’ Ona la fai atu lea iā Raava: ʻIa nonoa se maea mūmū i le faamalama o lou fale, ona faasaoina lea o lou aiga.’

Ona tuutuu ifo lea e Raava o tagata vāai i le faamalama e ala i se maea. Na ō atu tagata vāai i mauga ma lalafi ai mo aso e tolu a o leʻi toe foʻi iā Iosua. Ona ui atu lea o tagata Isaraelu i le vaitafe o Ioritana, ma sauniuni ai e faoa le laueleele. O Ieriko le aai muamua na latou faatoʻilaloina. Na faatonuina i latou e Ieova ina ia faatasi ona latou savavali faataamilo i le aai, ma ia faia faapea mo aso e ono. Ae i le aso lona fitu, e faafitu ona latou savavali faataamilo i le aai. Na ili lea e ositaulaga o a latou pū, ma alalaga leotetele fitafita. Ona solo ai lea i lalo o pā o le aai. Ae e leʻi solo i lalo le vaega o le pā sa iai le fale o Raava. Na faasaoina Raava ma lona aiga, ona sa latou faatuatua iā Ieova.