Ua Faaumatia Ierusalema

Na toe tuua foʻi e tagata o Iuta Ieova ma tapuaʻi i atua sesē. Mo le tele o tausaga, na taumafai pea Ieova e fesoasoani iā i latou. Na ia auina atu perofeta e toʻatele e lapataʻi i latou, ae e latou te leʻi faalogo. Peitaʻi na latou taufaifai i perofeta. Na faapefea ona faamuta e Ieova a latou ifoga tupua?

Sa faasolosolo ona faatoʻilalo e Nepukanesa le tupu o Papelonia atunuu taʻitasi. O le taimi muamua na ia faatoʻilaloina ai Ierusalema, na ia puʻea ai le tupu o Ioakina, o perenise, o tagata totoa, o tufuga, ma ave i latou uma i Papelonia. Na ia ave foʻi oloa uma sa iai i le malumalu o Ieova. Ina ua uma lenā, ona tofia lea e Nepukanesa o Setekaia e avea ma tupu o Iuta.

I le taimi muamua, sa usiusitaʻi Setekaia iā Nepukanesa. Peitaʻi, na faapea atu nuu na lata ane ma perofeta pepelo iā Setekaia ina ia fouvale iā Papelonia. Na lapataʻia e Ieremia Setekaia e faapea: ʻPe afai e te fouvale, o le a iai fasiotiga tagata, faapea oge ma faamaʻi i Iuta.’

Ina ua mavae tausaga e valu o le pulega a Setekaia, ona ia filifili lea e fouvale iā Papelonia. Na ia talosaga atu i le ʻautau a Aikupito e fesoasoani mai iā te ia. Ona auina atu lea e Nepukanesa o lana ʻautau e osofaʻia Ierusalema, ma na latou nonofo ai faataamilo i le aai. Na faapea atu Ieremia iā Setekaia: ʻUa fetalai mai Ieova pe afai e te lē tau ma Papelonia, o le a faasaoina oe ma le aai. Ae afai e te tau ma Papelonia, o le a latou susunuina Ierusalema ma ave faapagota oe.’ Na tali mai Setekaia: ʻOu te tau pea ma i latou.’

I le tausaga ma le ʻafa mulimuli ane, na ō atu ai le ʻautau a Papelonia ma talepe i lalo pā o Ierusalema ma susunu le aai. Na latou susunuina le malumalu, fasiotia le toʻatele o tagata, ma ave faapagota le faitau afe o isi tagata.

Na sola ese Setekaia mai i Ierusalema ae na tuliloa o ia e ʻau a Papelonia. Na latou puʻea o ia i se nofoaga e lata i Ieriko ma aumai o ia iā Nepukanesa. Na faamatamata e le tupu o Papelonia Setekaia a o fasiotia ona atalii. Ona faatauaso lea e Nepukanesa o Setekaia ma tuu o ia i le falepuipui, lea na mulimuli ane maliu ai. Ae na folafola atu e Ieova i tagata o Iuta: ʻPe a mavae tausaga e 70, o le a ou toe faafoʻisia oe i Ierusalema.’

O le ā o le a tupu i talavou sa ave i Papelonia? Po o le a latou faamaoni pea iā Ieova?