Se Malo e Pei o se Laau Telē

I se tasi pō, na fai ai se miti a Nepukanesa ma na fefe ai. Na ia aami ana tagata atamamai ina ia faamatala atu iā te ia le uiga o le miti. Ae e leai se tasi o i latou na mafai ona faamatalaina lenā miti. Mulimuli ane, ona fesili atu lea o le tupu iā Tanielu.

Na faapea atu Nepukanesa iā Tanielu: ʻNa ou vaaia i laʻu miti se laau. Ua tupu tele ma ua oo lona maualuga i le lagi. E mafai ona iloa atu lenei laau mai i so o se vaega lava o le lalolagi. E mananaia ona lau, ma e anoanoaʻi ona fua. E ō mai i ai manu o le fanua i lona paolo, ma e ofaga mai i ai manulele o le lagi i ona lālā. Ona sau ai lea o se agelu mai i le lagi. Na ia alaga leotele mai: “Ia tātuu i lalo le laau, ia tipi ese ona lālā. Ae ia tuu pea i le eleele le tagutugutu o le pogati, ia fusi i se fusi uʻamea ma le ʻapamemea. O le a liua lona loto mai i le loto o le tagata i le loto o se manu, ia tuu ai pea seʻia mavae atu taimi e fitu. O le a iloa ai e tagata uma o le Atua o le Pule, ma e mafai ona ia avatu se malo i lē ua ia finagalo i ai.”’

Na faailoa mai e Ieova iā Tanielu le uiga o le miti. Ina ua malamalama Tanielu i le uiga o le miti, ona fefe ai lea o ia. Na ia faapea atu: ʻLe tupu e, maʻimau pe ana faapea o le miti e faatatau i ou fili. Pagā lea, e faatatau atu le miti iā te oe. O oe le laau telē na tātuu i lalo. O le a aveesea lou malo mai iā te oe, ma o le a e ʻai i vao e pei o se manu o le fanua. Ae talu ai na faapea mai le agelu e tuu ai pea le tagutugutu o le pogati, o lea o le a toe avea ai oe ma tupu.’

I le tausaga na sosoo ai, na fesavaliaʻi ai Nepukanesa i le taualuga o lona maota ma vaavaai atu iā Papelonia. Na ia faapea ane: ʻSeʻi vaai i le matagofie o lenei aai na ou fausia. Seʻi vaai i loʻu silisili ese.’ A o ia faia na faamatalaga, ae ia faalogoina loa se siʻufofoga mai i le lagi: ʻNepukanesa e, e lē toe iai sou malo.’

I lenā lava taimi, na faalētonu ai le mafaufau o Nepukanesa ma na pei ai o ia o se manufeʻai o le vao. Na tuliesea o ia mai i lona maota, ma nofo i le mea sa iai manufeʻai o le vao. Na uumi lona lauulu e pei o fulufulu o aeto, ma ona atigivae ma atigilima e pei o matiuu o le manulele.

Ina ua mavae tausaga e fitu, ona toe lelei ai lea o le mafaufau o Nepukanesa ma toe faia ai o ia e Ieova ma tupu o Papelonia. Ona faapea ane lea o Nepukanesa: ʻOu te vivii iā Ieova le Tupu o le lagi. O lea ua ou iloa nei o Ieova o le Pule. E na te faamaulaloina o ē faamaualuluga, ma e mafai ona ia avatu se malo i so o se tasi e finagalo i ai o ia.’