Tanielu i le Lua o Leona

O le isi tupu na sosoo ai o Papelonia o Tariu le Metai. Na mātau e Tariu e faapitoa Tanielu. Na ia tofia Tanielu e vaavaaia tane e sili ona tāua o le atunuu. Na lotoleaga nei tane iā Tanielu ma mananaʻo e aveesea Tanielu. Na latou iloa e faatolu ona tatalo Tanielu iā Ieova i aso taʻitasi. O lea na latou fai atu ai iā Tariu: ʻLe tupu e, e tatau ona iai se tulafono e na o oe lava e tatau ona tatalo atu i ai tagata uma. O so o se tasi lava e lē usitaʻi i le tulafono, e tatau ona lafo i le lua o leona.’ Na fiafia Tariu i lea manatu, ma sainia ai loa lea tulafono.

O le taimi lava na faalogo ai Tanielu i le tulafono fou, ona alu lea o ia i lona fale. Ua ia tatala le faamalama, ona ia tootuli lea ma tatalo atu iā Ieova. Na lolofi atu tagata lotoleaga i le fale o Tanielu ma maua atu o ia o loo tatalo. Ona latou faanatinati atu lea iā Tariu ma faapea atu: ʻE lē o usiusitaʻi Tanielu iā te oe. E faatolu i le aso ona ia tatalo i lona Atua.’ Na fiafia Tariu iā Tanielu ma e leʻi manaʻo e fasiotia o ia. Na alu le aso atoa o taumafai o ia e mafaufau i se auala e faasaoina ai Tanielu. Ae e oo lava i le tupu, e lē mafai ona ia suia se tulafono ua uma ona ia sainia. Sa tatau ona ia avatu le poloaʻiga e lafo Tanielu i le lua o leona feʻai.

Na matuā popole Tariu iā Tanielu i lenā pō, ma e leʻi mafai foʻi ona moe o ia. Ina ua oo i le taeao o le aso na sosoo ai, ona tamoʻe atu lea o ia i le lua o leona ma valaau atu iā Tanielu: ʻPe na laveaʻiina oe e lou Atua?’

Na faalogoina e Tariu se leo. O le leo o Tanielu. Na valaau mai Tanielu iā Tariu: ʻNa punitia e le agelu a Ieova gutu o leona, ma ou te leʻi afāina ai.’ Na matuā fiafia Tariu. Na ia avatu le faatonuga e aveese Tanielu mai i le lua. E leʻi iai se vaega o le tino o Tanielu na afāina. Ona avatu lea o le faatonuga a le tupu: ʻIa lafo i le lua o leona tagata na tuuaʻia Tanielu.’ O le taimi lava na lafo ai na tagata i le lua, na ʻaina i latou e leona.

Na auina atu e Tariu le poloaʻiga lenei i ona tagata: ʻE tatau i tagata uma ona matataʻu i le Atua o Tanielu. Na ia laveaʻia Tanielu mai i leona.’

Pe e te tatalo i aso taʻitasi iā Ieova e pei ona faia e Tanielu?