Laveaʻiina e Eseta Ona Tagata

O Eseta o se tamaʻitaʻi Iutaia na nofo i Susana le aai o Peresia. I le tele o tausaga ua mavae, na aveese ai e Nepukanesa lona aiga mai i Ierusalema. Na tausi aʻe o ia e lona tauusoga o Moretekai, o ia o se auauna a Asueru le tupu o Peresia.

Na manaʻo le tupu o Asueru i se masiofo fou. Na avatu e ana auauna iā te ia tamaʻitaʻi e sili ona lalelei o le atunuu e aofia ai ma Eseta. Ae mai i na tamaʻitaʻi uma, na filifilia e le tupu Eseta e avea ma ana masiofo. Na fai atu Moretekai iā Eseta, ina ia aua neʻi faailoa atu i se tasi o ia o se Iutaia.

Sa iai se tamāloa faamaualuga e igoa iā Hamanu, ma na taʻitaʻi o ia i perenise uma. Na manaʻo e ifo atu tagata uma iā te ia. Na musu Moretekai e faia faapea, ma na matuā ita ai Hamanu ma manaʻo ai e fasioti Moretekai. Ina ua iloa e Hamanu o Moretekai o se Iutaia, ona ia faia lea o se faufauga e fasiotia tagata Iutaia uma i le atunuu. Na ia faapea atu i le tupu: ʻE fouvale tagata Iutaia, ma e manaʻomia ona e fasiotia i latou.’ Na tali mai Asueru: ʻIa e faia le mea ua lelei iā te oe.’ Ona tuu atu lea e Asueru le pule iā Hamanu e faia ai se tulafono. Na faia e Hamanu se tulafono, ina ia fasiotia tagata Iutaia uma i le aso 13 o le masina o Atara. Na silafia e Ieova nei mea uma.

E leʻi iloa e Eseta le tulafono. O lea na auina atu ai e Moretekai se kopi o le tulafono iā te ia ma faapea atu: ʻIa e alu e talanoa atu i le tupu.’ Na faapea atu Eseta: ʻO so o se tasi e alu atu i le tupu e aunoa ma se valaaulia, e fasiotia o ia. Ua 30 aso e leʻi valaauliaina aʻu e le tupu. Ae o le a ou alu pea. Afai e na te faaloaloa mai lona tootoo, o le a ou ola. Ae afai e leai, o le a ou oti.’

Na alu atu Eseta i le lotoā o le maota o le tupu. Ina ua iloa mai o ia e le tupu, ona faaloaloa mai lea o lona tootoo. Na alu atu Eseta iā te ia, ma na fesili mai le tupu: ʻO le ā se mea ou te faia mo oe Eseta?’ Na tali atu o ia: ʻOu te manaʻo e valaaulia oe ma Hamanu i se taumafataga.’ I lenā taumafataga, na toe valaaulia ai foʻi i laʻua e Eseta i se isi taumafataga. A o faia le taumafataga lona lua, na toe fesili atu le tupu: ʻO le ā se mea ou te faia mo oe?’ Na tali mai Eseta: ʻE iai se tasi o loo taumafai e fasiotia aʻu ma oʻu tagata. Faamolemole ia e laveaʻi i matou.’ Na fesili le tupu: ʻO ai o loo manaʻo e fasioti oe?’ Na tali atu Eseta: ʻO le tagata amioleaga lea o Hamanu.’ Na matuā ita Asueru, ma na ia faatonuina ai loa le fasiotia o Hamanu.

Ae e leai se tasi e mafai ona toe soloia le tulafono na faia e Hamanu, e oo lava i le tupu. O lea, na tofia ai loa e le tupu Moretekai ina ia avea ma taʻitaʻi i perenise, ma tuuina atu iā te ia le pule e faia ai se tulafono fou. Na faia e Moretekai se tulafono na faatagaina ai tagata Iutaia e puipuia i latou lava, pe a osofaʻia i latou. I le aso 13 o le masina o Atara, na faatoʻilaloina ai e tagata Iutaia o latou fili. Talu mai lenā taimi, na latou faamanatuina lea manumalo i tausaga taʻitasi.