Faamālōlō e Iesu Tagata i le Sapati

Na matuā feita le ʻau Faresaio iā Iesu, ma taumafai e saʻili se māfuaaga e puʻe ai o ia. Na latou faapea atu e lē tatau ona ia faamālōlōina tagata mamaʻi i le Sapati. I se tasi aso Sapati, na maua atu ai e Iesu se tamāloa ʻaisi i le auala. Na ia faapea atu i ona soo: ʻSeʻi vāai i le auala o le a fesoasoani ai le mana o le Atua i lenei tamāloa.’ Na palu e Iesu le palapala i ona fāua, ona ia nini ai lea o mata o le tamāloa. Na fai atu Iesu iā te ia: ʻInā alu ia e fufulu ou mata i le vai tāʻele o Seloa.’ Na faia faapea e le tamāloa, ma o le taimi muamua lea i lona olaga ua mafai ai ona ia vaai.

Na ofo tagata ma faapea ane: ʻPe e lē o le tamāloa ea lenei na masani ona nofo ma ʻaisi, po o se tasi e foliga e pei o ia?’ Na tali mai le tamāloa: “O aʻu lenei o ia.” Na fesili atu tagata: “Na faapefea ona pupula ou mata?” Ina ua ia faamatala atu le mea na tupu, ona latou ave ai lea o ia i le ʻau Faresaio.

Na fai atu le tamāloa i le ʻau Faresaio: ʻNa palu e Iesu le palapala ma nini ai oʻu mata. Ona ia faatonuina lea o aʻu e alu e fufulu oʻu mata. Ona ou alu lea ma fufulu, ma ua ou pupula ai.’ Na faapea mai le ʻau Faresaio: ʻPe afai e faamālōlō e Iesu tagata i le Sapati, e lē mai i le Atua la lona mana.’ Ae na faapea ane isi tagata: ʻPe ana faapea e lē mai i le Atua lona mana, e lē mafai lava ona ia faia so o se faamālōlōga.’

Na valaauina e le ʻau Faresaio mātua o le tamāloa tauaso ma fesili atu: ʻUa faapefea ona pupula la oulua tama?’ Na fefefe ona mātua, talu ai na faapea atu le ʻau Faresaio o so o se tasi e faatuatua iā Iesu e faateʻaina mai i le sunako. O lea na la tali mai ai: ʻE ma te lē iloa. Ia outou fesili atu iā te ia.’ E tele fesili ua toe fai atu e le ʻau Faresaio i le tamāloa, ma na iʻu ai ina faapea atu o ia: ʻUa uma ona ou taʻuina atu iā te outou mea ua ou iloa. Aiseā ua faaauau ai ona outou fesili mai?’ Na feita le ʻau Faresaio ma tuliese o ia.

Na alu Iesu e saʻili le tamāloa ma fesili atu: ʻPe e te faatuatua i le Mesia?’ Na tali mai le tamāloa: ʻOu te faatuatua pe afai ou te iloa po o ai o ia.’ Na faapea atu Iesu: ʻO aʻu le Mesia.’ Pe e lē o se gaoioiga agalelei ea lenā sa faia e Iesu? E lē gata sa ia faamālōlōina le tamāloa, ae sa ia fesoasoani foʻi iā te ia ina ia maua le faatuatua.