“O le a Ou . . . Aoaoina Faatasi Outou”​—Folafola Mai le Toe Faafoʻisia o le Tapuaʻiga Mamā

Ua matuā pagatia Isaraelu ma ua lē autasi ona o faiga a i latou ua liliuese mai i le tapuaʻiga moni. Ua mafatia le nuu ona o āuga o a latou gaoioiga; ua faaleagaina le tapuaʻiga mamā ma faalumaina le suafa o le Atua. E ui i na tulaga faanoanoa, ae na uunaʻia e Ieova Esekielu e faasolosolo ona faia valoaga e faailoa mai ai se faamoemoe. Na faaaogā e Ieova ata ma vaaiga ofoofogia e faalaeiau ai tagata Isaraelu na faaaunuua, ma i latou na naunau e toe faafoʻisia le tapuaʻiga mamā.