Pe na Faaata Mai e Ierusalema Lotu ua Faapea Mai o Kerisiano?

I le taimi ua teʻa, na taʻua i a tatou lomiga ua faaata mai e le aai o Ierusalema ua liliuese mai i le tapuaʻiga moni, lotu ua faapea mai o Kerisiano. O mea na tutupu i le aai lē faamaoni o Ierusalema, e aofia ai ifoga tupua ma le sasao faaafi o faiga faapiʻopiʻo, ua faamanatu mai ai iā i tatou mea o loo tutupu i lotu ua faapea mai o Kerisiano. Peitaʻi, i a tatou lomiga i tausaga talu ai nei, e pei o le lomiga o loo e faitau i ai, e lē o toe taumafai e saʻili ni faaataga ma ni faataunuuga o valoaga, seʻi vaganā ua iai se faavae manino faale-Tusi Paia e faia ai faapea. Pe e iai se faavae faale-Tusi Paia e faapea atu ai, ua faaata mai e le aai o Ierusalema lotu ua faapea mai o Kerisiano? E leai.

Seʻi mafaufau i manatu nei: Na avea muamua Ierusalema ma taulaʻiga o le tapuaʻiga mamā, ae na mulimuli ane liliuese ona tagatānuu mai i le tapuaʻiga moni. Ae i se faaeseesega, e leʻi faia lava e lotu ua faapea mai o Kerisiano le tapuaʻiga mamā. E mai lava i lo latou amataga i le senituri lona 4 T.A., na aʻoaʻo lava e nei lotu ua faapea mai o Kerisiano aʻoaʻoga sesē.

E lē gata i lea, ina ua mavae le faaumatiaina e ʻautau a Papelonia o Ierusalema, na finagalo malie Ieova e toe faafoʻisia le aai ma toe avea ma taulaʻiga o le tapuaʻiga moni. Peitaʻi, e leʻi maua lava e lotu ua faapea mai o Kerisiano le finagalo malie o le Atua, ma o le a lē toe iai lava pe a faaumatia i le puapuaga tele.

O le ā lo tatou malamalamaga e tatau ona iai pe a fua i manatu ua uma ona tatou iloiloina? A o tatou iloiloina valoaga a le Tusi Paia na faataunuuina i le aai lē faamaoni o Ierusalema, e mafai ona tatou faapea atu, o na mea e talitutusa ma mea o loo tatou vaaia i lotu ua faapea mai o Kerisiano i aso nei. Ae e foliga mai e leai se faavae faale-Tusi Paia e faapea atu ai, o loo faaata mai e Ierusalema lotu ua faapea mai o Kerisiano.