Soifuaga o Iesu ma lana Faiva

Faia o Galuega Lelei i le Sapati

O LE tau e totogo ai mea i le 31 T.A. Ua mavae ni nai masina talu ona talanoa atu Iesu i se fafine i le vaitele i Samaria a o faimalaga mai Iutaia i Kalilaia.

Nei, ina ua uma ona ia aʻoaʻo faalauai tele i Kalilaia, ua toe malaga atu foi Iesu i Iutaia, i le mea e talai atu ai i Sunako. Pe a faatusatusa atu i le fiafia na faaalia i lana faiva i Kalilaia, e itiiti lava ni mea o taʻu mai e le Tusi Paia e uiga i galuega a Iesu i Iutaia talu mai lana asiasiga lenei ma talu ai masina na i ai o ia i inei mulimuli ane ai ina ua mavae le Paseka talu ai. E foliga mai sa lei tali leleia lana faiva i Iutaia e pei ona sa faia i Kalilaia.

E lei pine a e agai atu Iesu i le aai laumua o Iutaia, o Ierusalema mo le Paseka o le 31 T.A. I inei, e lata ane i le faitotoa o mamoe, e i ai le taelega e igoa ia Petesa, e o atu i ai le toatele o tagata mamaʻi, tauaso, ma pipili. Sa latou talitonu e mafai ona malolo se tagata pe a taeele i le vai i le taimi e gaepu ai.

O Aso Sapati lea, ma ua iloa atu e Iesu le tagata i tafatafa o le taelega ua 38 tausaga talu ona maʻi o ia. Ina ua silafia e Iesu le umi o le taimi talu ona maʻi lenei tagata, ona fesili atu lea o Iesu: “E te fia malolo ea?”

“Le Alii e, e leai lava se tagata na te tuuina ifo aʻu i le taelega, pe a gaepu le vai,” ua ia tali atu ai, “a alu ifo aʻu e muamua ifo le tasi ia te aʻu.”

Ua fetalai atu Iesu ia te ia: “Ina tu ia i luga, ave ia lou moega, ma ia e savali.” O na o lena mea, ua faafuasei lava ona malolo le tagata ua ave lona moega, ma savali loa!

A e ina ua vaai mai tagata Iutaia i le tamaloa, ua latou fai atu: “O le Sapati lenei, e sa ona e ave ai lou moega.”

Ona tali atu lea o le tagata ia te i latou: “O le na faamalolo mai ia te aʻu, ua fetalai mai o ia ia te aʻu, ʻAve ia lou moega ma ia e savali.”

“O ai e a le tagata na fai atu ia te oe; ʻAve ia lou moega, ma ia e savali?” ua latou fesili atu ai. Ua maliu ese Iesu ona o le motu o tagata, ma o le na faamaloloina na te lei iloa le igoa o Iesu. Ae peitai, mulimuli ane, ua toe feiloai ai Iesu ma le tagata i le malumalu, ma ua iloa nei e le tagata le na faamaloloina o ia.

O lea na saili ai e le tagata na faamaloloina tagata Iutaia ina ia taʻu atu ia i latou faapea o Iesu o le na faamaloloina o ia. Ina ua latou iloa lenei mea, ona latou o atu loa lea i a Iesu. O le a a le mafuaaga? Ina ia iloa pe ua faapefea ona ia faia o nei mea ofoofogia? E leai. A e o le fia iloa o se mea sese mai ia te ia ona o lona faia o nei mea lelei i le Sapati. Ma ua oo lava ina latou saua ia te ia! Luka 4:44; Ioane 5:1-16.

◆ O le a le umi na va aʻi talu ona asiasi atu Iesu i Iutaia?

◆ Ai se a sa taʻutaʻua ai le taelega o Petesa?

◆ O le a le vavega na faia e Iesu i le taelega, ma o a uiga faaalia o tagata Iutaia agai i ai?