Talavou E—Aua Neʻi Olegia Outou
“Auā o Satani lava, ua liua o ia e ia ma agelu o le malamalama.”—2 KORINITO 11:14.
1. (a) O ā auala ua faaseseina ai le toatele o i tatou? (e) O ai e ua masani lava i le lautele ona faigofie ona olegiaina?
E LE TAUMATEA ua olegia i tatou uma mai lea taimi i lea taimi. Atonu sa e taalo i se taaloga na faia ai e lē o lua tauvā se gaoioiga tau faaoleole na sepu ai lou tulaga ae manumalo ai o ia i le taaloga. Pe na e faatauina mai foʻi se mea manaia pei o se ofu, a e mulimuli ane e iloaina ua uma ona e ofuina mo sina taimi ua tā foʻi e le o se ofu lelei. O ai e masani lava ona faigofie ona olegia, faavaleaina pe taʻitaʻiseseina? E le o i latou e lē lava le poto masani? Ma e masani lava ona mataʻutia le iʻuga na i lo o le na o le manumalo i se taaloga pe faavaleaina foʻi i se mea na faatau.
2. Ua faapefea ona taʻitaʻiina atu nisi o talavou i le faia o sese matuiā?
2 Mo se faaaʻoaʻoga, o Iulia, faatoa tasi lona tausaga i le aʻoga maualuga, sa “faavalea” i se “tama e sili ona aulelei ma lauiloa i aʻoga atoa,” e pei ona ia fai mai ai. Na ia faaamatalaina: “Sa ou taʻu atu ia te ia ou te leʻi nofo sauni mo le mea ua manao i ai, a e sa ia tauanau pea lava pea, o ia e alofa tele ia te aʻu, ma o le a manuia mea uma. A e sa ou fai atu pea e leai, ma o i ina na tupu ai loa le faalavelave. Sa ia faapea mai: ‘Ou te manatu tele ia te oe, ma sa ou faapea e faapena foʻi lou lagona. A e a fai e lē ma fai ona e faamaonia mai ia te aʻu, ou te manatu la ua tatau ona faamuta lo ta toe fevaai aʻi.’” O lea na lolo atu ai Iulia ma faia loa le faitaaga. A o le aso na sosoʻo ai, ina ua ia iloa ua alu le tama ma gugutu solo e uiga i lona “manumalo” ia Iulia, sa na iloa ai ua matuā olegia o ia. Sa tatau ona ia iloa afai e alofa moni le tama semanu, na te lē faia lea mea ia te ia.
3. (a) Ai se ā ua avea ai le faitaaga o se sese matuiā? (e) O le ā le sini a Satani le Tiapolo?
3 O le mea na maileai pe faavaleaina Iulia e fai o le matuā solia le o le tulafono a le Atua. O le mafuaaga lena ua uunaia ai i tatou e le Tusi Paia: “Ina sosola ese ia outou i le faitaaga.” Ma ua ia taʻu manino mai: “Ai sē faitaaga . . . e le maua e i latou se tofi i le malo o Keriso, [ma] le Atua.” (1 Korinito 6:18; Efeso 5:5) O lea atonu e lē o manatu Satani le Tiapolo i lou manumalo pe faiaʻiina i se taaloga pe e te faia ma le poto se faatauga pe leai foʻi, a e o loo taumafai maumauaʻi pea o ia e faaseseina oe i le solia o le tulafono a le Atua. “Ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ʻaina e ia,” ua lapataʻi mai ai le Tusi Paia. (1 Peteru 5:8) Ioe, o loo ia faaaogāina ona mafaufauga poto uma, e aofia ai le faafoliga mai o se agelu o le malamamala ina ia ō ese mai ai i le auauna atu ia Ieova le Atua! E lē o se manatu malamalama ea lena?—2 Korinito 11:14.
Aʻoaʻoina Mai le Mea na Tupu ia Eva
4. Ai se ā e mafai ai ona faapea atu o talavou o le taulaiga faapitoa a Satani?
4 A e mo outou le au talavou, o se manatu sili lea e tatau ona mataalia i ai: O outou o le taulaiga faapitoa a Satani. A i se ā ua faapea ai? Ona o lo outou tulaga talavou, e itiiti se taimi ua outou faaaluina e aʻoaʻo ai le poto ma le atamai, ma e ʻoto lava e Satani i latou e leai se poto masani. Na ia faia lena mea i le amataga lava o lana fouvalega. Manatua na ia faalatalata atu ia Eva i le faatoaga i Etena, a e le o lana tane o Atamu o lē na muamua ona faia mo se vaitaimi i lo ia. Ma sa taulau Satani. Ioe, na ia olegia, taʻitaʻiseseina Eva talavou e leʻi lava le poto masani i foliga sese. “Auā ua muamua ona faia o Atamu,” ua faamatala mai ai e le Tusi Paia, “a e mulimuli Eva. E lei ʻolegia foi Atamu, a ua ʻolegia le fafine, ona solitulafono lea o ia.”—1 Timoteo 2:13, 14.
5. (a) O le ā le mea e tatau ona lē faavaleaina ai i tatou e manatu i ai? (e) O le ā sa manatu mamafa i ai le aposetolo o Paulo, ma ai se ā na tatau ai ona faapea?
5 Aua neʻi faamoeina oe i le manatu faapea e le taitai maua oe e auala a Satani, faapea e lē mafai ona ia faia oe ia solia tulafono a le Atua. Manatua le lapataiga tauatua faapea “o Satani lava, ua liua o ia e ia ma agelu o le malamalama.” (2 Korinito 11:14) Sa tonu lava le manatu o le aposetolo o Paulo faapea o le Matai o Taufaasese atonu o le a manuia i lana faalatalata atu i uso a Kerisiano o Paulo e lē lava lo latou poto masani. Sa tusi atu Paulo: “A e ou te fefe, ina nei pei ona faaseseina o Eva e le gata i lana togafiti, e faapea ona faaleagaina o outou manatu ina ia le tonu ia Keriso.”—2 Korinito 11:3.
6. O le ā le uiga o le olegiaina?
6 Ia matau sa leʻi na ona olegia pe maileia Eva; a e na faaogaseseina foʻi. O lona uiga o lenei mea sa tataʻiina atu o ai i le auala malaia e ala i le faatosinaina i se folafolaga po o le tofotofoga. E tusa ai ma le Websterʻs Third New International Dicitionary, o le uiga o le upu faaseseina o le “tauanau ia lē usiusita’i,” “o le faatosina po o le maua e ala i se faatinoga agavaivai.” Ua taʻu maoti mai e lenei lomifefiloi o le faaseseina o lona uiga o le “tauanau o se (tamaitai) ina ia faia se feusuaiga mo le uluaʻi taimi.” E mafai ona tatou maua aogā i le autaluina o le auala a Satani na faaseseinia ai Eva (e ui ina e lē o aafia i le taimi lea feusuaiga) ma e ala foʻi i le matauina o auala faapena talitutusa ua ia faaaogāina i aso nei.
7, 8. (a) O le ā le fuafuaga o le fesili a Satani ia Eva? (e) Na faapefea ona faafoliga mai e Satani o le ʻaina o le laau e tino mai e matuā matagofie?
7 I le amataga lava o lana faafeiloaʻi atu, sa faaaogāina ai e Satani e se auala poto, le gata e faapogaia ai ona amata fesiligia e Eva le tulafono a le Atua. Sa ia fesili atu i ni upu ua mafaufauina ma le faaeteete e faatupu ai masalosaloga ma le lē faatuatuaina, i le fesili atu: “E moni ea, na fetalai mai le Atua, lua te le aai i laau uma o le faatoaga?” E ala i lenei fesili alualua, na faauiga e Satani faapea o se mea e faanoanoa ai ona sa lē mafai ona ia ʻai i le laau uma o le faatoaga. O le mea moni, sa ia fianau atu faapea, na i lo o le oti e pei ona fetalai ai le Atua e oo ia te ia, o le a ia maua aogā lelei mai le ʻaina o le laau faasāina. “Auā ua silafia e le Atua, o le aso lua te aai ai,” sa tatao atu e Satani, “e pupula ai o oulua mata; ona avea ai lea o oulua e pei ni atua o loo iloa le lelei ma le leaga.”—Kenese 3:1-5.
8 Maeu le poto leaga o Satani sa i lenei mea, i lona fai atu faapea sa taumafai le Atua e natia le atamai aogā mai ia Eva! E tusa ia ma le faamatalaga a Satani, sa faaaogāina e le Atua na o se taufaamataʻu i le oti e taofia ai o ia mai le faatinoina o le tomai e faia ai ana lava faaiʻuga totino. ‘Suga, e i ai se mea ua e misia!’ e tusa ua ia taʻu atu ia Eva. ‘E te lē oti. E mafai ona e olioli i mea o loo olioli ai le Atua. E mafai ona e filifili lava e oe le mea lelei ma le mea leaga.’ Sa fetaui lelei lava ma le manatu o Eva o le a mafai ona faia o ana lava filifliga e aunoa ma le tali atu i se tasi.
9. E pei ona faaalia i le Iakopo 1:14,15, o ā faagasologa o le mea na tupu sa taʻitaʻiina atu ai i le agasala o Eva ma agai atu ai ina oti?
9 O le iʻuga, sa vaai atu loa Eva i le laau ma le naunau lava. “Ona vaai atu le o le fafine i le laau e lelei lava pe a ʻai, ma ua matagofie mai, o le laau foi e aoga e maua ai le poto, ona tago ai lea o ia i lona fua, ma ʻai ai.” (Kenese 3:6) A e mulimuli ane, ina ua iloa e Eva na te leʻi maua le mea na folafolaina atu, sa ia faamatala mai: “Na faasese mai le gata ia te au.” (Kenese 3:13) O le mea moni, sa na faaseseina foʻi o ia ma taʻitaʻiina ai o ia i le faatosinaga poto agavaivai po o le tofotofoga seʻia oo ina uunaia ai o ia e ona faanaunauga manatu faapito e faia le agasala ma, agaʻigaʻi malie atu ai ina oti.—Iakopo 1:14, 15.
Faaeteete i Faiga a Satani
10. Ai se ā e le tatau ai ona faavaleaina i tatou i faiga a Satani, ma o ā faatonuga ua poto ona tatou mulimuli ai?
10 Ua faaaogāina e Satani faiga tali faapena, o togafiti leaga, fuafuaga poto, faiga faatogafiti e faavaleaina ma olegia ai talavou i aso nei. A e talu ai ua aumaia e le Tusi Paia se atoaga o le talafaasolopito o ala tau faaoleole a Satani, e manaomia la ona e amanaiaina ana faiga. (2 Korinito 2:11) O loo e manaomia le mafaufau lelei e utagia ai lapataiga ma faatonuga o loo aumaia e Ieova le Atua e ala i lana Afioga ma le faalapotopotoga.—Faataoto 2:1-6; 3:1-7, 11, 12; 4:1,2,20-27; 7:1-4.
11. E faapefea ona faaseseina pe olegia e Satani talavou i le faia o mea sese?
11 E faapefea ona masani ona faatosina e Satani manao o le au talavou i le faia o le mea sese? Ua ia faatino lea e ala i le faia o mea ua faasāina e le Atua, gaoioiga e taʻitaʻiina atu ai i le leiloa o le faamaoniga a le Atua e foliga mai e mananaia, a e i le taimi lava e tasi e lē afaina ai, e pei ona foliga mai o le fua o le laau ia Eva. Ma e pei ona sa ia faia ia Eva, o le ai taumafai e faataʻatia le manatu faapea o loo i ai se ma e sili ona faamalie loto ua e misia. O lea, i se auala poto taufaaoleole ua taumafai ai Satani e faavaivaia lou faaaloalo mo le Afioga a Ieova, atoa foʻi ma faatonuga ua avatua e ou matua e matataʻu i le Atua ma le faalapotopotoga a le Atua. O lea ua i ai se mafuaaga lelei ua uunaia ai e le Tusi Paia, “Ina ia outou mafai ona teteʻe atu i togafiti [e pei ona taʻua i le The Kingdom Interlinear Translation of the Greek Scriptures, o “gaoioiga faaoleole”] a le Tiapolo.”—Efeso 6:11.
12. (a) O le ā le mea moni e uiga ia Satani e tatau ia i tatou uma ona manatu mamafa i ai, ma ai se ā? (e) E faapefea ona e vaaia le mea o fai mai ai le 1 Ioane 2:15 ma le Iakopo 4:4? (i) O le ā ua manao Satani e olegia ai e talitonu i ai?
12 Ua iloa tino, le valea o Eva ona sa talitonu i le pepelo a Satani. Ui i lea, e lē o faapena ea foʻi le toatele o le au talavou i aso nei ona manatu māmā i lapataiga a le Afioga a Ieova po o nā o loo aumaia e o latou matua po o toeaina Kerisiano? A e faapefea oe? Mo se faaaʻoaoʻga, e uigā ea ia te oe le mea moni fapaea o Satani le Tiapolo o le pule o lenei lalolagi ma o lena foʻi, o le atua o lenei faiga o mea, o loo ia faatauasoina manatu o tagata? (1 Ioane 5:19; Ioane 12:31; 14:30; 16:11; 2 Korinito 4:4) E te taumafai maumauaʻi e utagia poloaiga a le Atua: “Aua tou te mananao i le lalolagi, po o mea o i ai i le lalolagi”? (1 Ioane 2:15) Ma fesili ifo ia te oe lava: ‘Pe ou te talitonu aʻiaʻi i faamatalaga a le Tusi Paia, “O lenei, o sē fia uo ma le lalolagi, ua avae o ia ma ita i le Atua”’? (Iakopo 4:4) Ua manao Satani e olegia oe faapea e leai ni faamataʻuga, o gaoioiga o loo ia faia e le afaina ai. A e ia faaeteete! Aua neʻi olegia oe!
Faatosina Taufaaoleole o Aso Nei
13. O le ā le tū ua fai ma aga i le tele o nofoaga, ma o le ā ua manao Satani ia tatou talitonu e uiga i ai?
13 E masani lava ona usui e Satani tagata ia faia mea sese e ala i mea atonu e lē sese pe leaga ia i latou lava pe lē o matuā faasāina mai e le Tusi Paia. Mo se faaaʻoaʻoga, a o manatunatu fiafia le tele o ulugalii faaipoipo i le taimi sa latou olioli ai i aso o ā latou evaga, e i ai foʻi le malosi mataʻutia pe a na o se tama ma se teine i se tuugatala. O le mea moni o tuugatala o se tu fou faaonaponei na faatoa lauiloa ina ua mavae le Taua l a le Lalolagi i le tele o nofoaga. Atonu ua manao Satani ina ia e talitonu faapea o le tū e foliga mai e mamā, o faafiafiaga e mafai ai e talavou ona faamasani atu ai isi o le isi itu pa i le faavae o le taitoalua. A e, o le upu moni, o le tū e ō faatasi ma le mataʻutia tele tau amio.
14. (a) E faapefea ona iloiloina tū o le tuugatala? (e) O ā faalogona e sasao aʻe i le tulaga o tuugatala?
14 O Kerisiano matutua taʻumatuaina, e sili atu lo latou iloa o nei tulaga mataʻutia ona ua lava lo latou poto masani, ma o le mea lea e mafai ai ona latou avatu taʻitaʻiga, o fesoasoani. (Faataoto 27:12) Peitaʻi atonu e te lagona faapea e leai se mea leaga ai le faia o tuugatala ma ua malosi tele le taofi a matua, ua la faoa le fiafia mai ia te oe. O lea e pei lava ona iloa tagata i fua ua latou fuaina mai, e mafai foi la ona faapena le tū o le tuutala. (Faataoto 20:11; Mataio 7:16) Mo se faaaʻoaʻoga, o se talavou e 18 tausaga sa masani lava ona fai tuugatala ma sa oo ai ina maʻi tō, na ia faailoa mai: “O aʻu o se tasi o le faitauafe o talavou na manatu e lē mafai ona tupu lenei mea ia te aʻu.” Sa ioe o ia faapea ina ua faaauau tuugatala mo sina taimi, o le “uulima ma le feasogi na oo ina mafu.” E faapena foʻi se teine e 17 tausaga sa masani ona fai tuugatala, na ia lipotia mai e faapea: “O le fusifusi ma feasogi na sasao aʻe seia oo ina manao loʻu loto i le tama ia faia le feusuaiga.” o se faalogona ea e le masani ai? E leai lava.
15. O ā mala tutupu ua tatau ai ona amoina e tuugatala se avega tauave mamafa?
15 Pe a faaesea e talavou o fetosinaaʻia i latou i le itu faaletino, e pei ona lauiloa ai o tuugatala, e mafai ona tuputupu aʻe faanaunauga tau i feusuaiga se ia oo ina taʻitaʻiina atu ai i le solia o le tulafono a le Atua e oo lava i talavou e leʻi mafaufauina. Seʻi manatu i ai i le sili atu ma le miliona teine talavou i le Iunaite Setete ua maua i maʻitaga i tausaga taitasi ma e faitau selau afe i latou ua faia le faapaū tama po o le maua o ni fanau a o leʻi faaipoipo. O le mea e le manuia ai, ona i nisi taimi o isi o nei teine talavou o fanau a Molimau a Ieova ma e faapena foʻi tama o ē na aafia faatasi ma i latou. O le tū i aso nei o le tuutala e mafai ona fua mai ai se tiute tauave mamafa mo nei mala, atoa foʻi ma le faitau miliona o faamaʻi fou pipisi ua feavaeaʻi ona o feusuaiga i tausaga taitasi.
16. (a) Na o fea lava e tatau ona faataunuuina ai ma le tonu manaoga tau feusuaiga? (e) O le ā ua tupu i le toatele o tagata o le Atua?
16 Na fuafuaina e le Atua e tatau ona faatinoina manaoga mo feusuaiga i totonu o noataga o le liʻo o faaipoipoga, e mafai ona maua ai le fiafia atoatoa ma le faamalieina. (Eperu 13:4; Faataoto 5:15-19) Ui i lea, ua faatogafiti ona faaaogā e Satani le meaalofa na tuuna mai e le Atua e faaseseina ai tagata ai le faia o feusuaiga lē talafeagai e faia ai le faitaaga. I aso anamua, e 24,000 tagata Isaraelu na fasiotia i le aso e tasi ona o lenei faasagatau i le Atua, ma i aso nei foʻi e faitauafe i tausaga taitasi ua tuuese mai le faapotopotoga Kerisiano ona o le faitaaga. O lea ia mata poto. Faalogo i fautuaga ma faatonuga. Aua le faatagaina oe ia olegia.—Numera 25:1-9, 16-18; 31:16.
17. (a) O le ā le vaaiga tau faaoleole ua siitia e Satani e tusa ai ma nei mea e pei o taaloga, musika, ma siva? (e) Ai se ā ua aumaia ai e faafiafiaga a le lalolagi se faamataʻu i tagata o le Atua?
17 Ia mataala foʻi, i isi faiga a Satani. Mo se faaaʻoaʻoga, o taaloga, musika, ma siva, uma ua avea ma vaega taatele o ana faafiafiaga a lana lalolagi. E moni, e leai se mea leaga o i na mea e mafai ona fiafia ai ma maua ai foʻi ni aogā. (1 Timoteo 4:8; Sakaria 8:5; Luka 15:25) Peitaʻi, ua siitia e Satani se vaaiga tau faaoleole faapea e leai lava se mea e tupu mai pe tatau ai fua, e oo lava i le auau faatasi ma tagata o le lalolagi. A e ua lapataʻi mai le Afioga a le Atua: “Aua neʻi faaseseina outou, O le feoai ma e amio leaga e leaga ai amio lelei.” (1 Korinito 15:33) Mafaufau i ai. Afai o lotu ma polotiki o se vaega o le faiga o mea a Satani, e le o se mea valea ea la ona talitonu faapea o faafiafiaga ua uunaia e le lalolagi ua saoloto mai ana taaiga? E matuā manaomia lava ona leoleo oe ina ia aua “le faatagaina le lalolagi o loo siomia ai oe e faafoliga oe ia te ia.”—Roma 12:2, The New Testament in Modern English, a J. B. Phillips.
Sauniuniga mo le Puipuiga o Talavou
18. Ai se ā e tatau ai ona e talisapaia ni matua e faatonu ma taʻiaʻi oe?
18 Ua faataatia ma le alofa e Ieova sauniuniga e puipuia ai outou le au talavou mai le olegiaina. Muamua, ua ia avatua ō outou matua e faatonu ma taʻitaʻiina outou. Ma e mafai ona e fiafia pe a latou faia faapea. O se tasi talavou na le fiafia e 18 tausaga, o le na maua se pepe a o leʻi faaipoipo, sa faitio ma faapea mai semanu e le tupu lenei mea “pe ana fai e oʻu matua lo la tiute e pei ona tatau ai i matua ma taʻu mai ia te aʻu mailei e paū i ai i le feiloai pea ma se uo tama, ma taofia aʻu i le mafuta atu i ai.” O lea ia e loto faafetai pe a fai ua e maua ni matua e matataʻu i le Atua. Latou e le o taumafai e taofiofia oe i totonu ma faia ai lou olaga ia lē fiafia ai e ala i faasasaga ua tuu atu ia te oe. I le tuufegai ai la te alolofa ia te oe ma manao e puipuia oe. Ia faaaogā lo latou poto masani ma le atamai ma ia sailia a latou fautuaga.
19. O ā fesoasoani faaopoopo ua aumaia e puipuia ai le au talavou?
19 E faaopoopo i lena, ua aumaia e Ieova lana faalapotopotoga faalelalolagi e fesoasoani ia te oe. Mo se faataʻitaʻiga, o lomiga taitasi o le Awake! ua tauaveina ai le mataupu “Ua Fesili Talavou . . .” e faaalia ai iina le fetaui o tulafono a Ieova. E faapena foʻi le polosiua School and Jehovahʻs Witnesses ua aumaia e fesoasoani ia te oe ia tausisia tulafono a le Atua ma ana mataupu silisili i siomaga o le aʻoga. E le gata i lea o faalaeiauga ma faatonuga o loo aumaia e ala i itulau o Le Olomatamata ma i sauniga a le faapotopotoga, fonotaga matagaluega, ma tauaofiaga itumalo. E moni, o lenei mataupu, “Talavou E—Aua Neʻi Olegia Outou,” o se lauga na faia i le tauaofiga itumalo talu ai nei faapena foʻi ona avea o se mataupu o le Sauniga o le Auaunaga.
20. (a) Ai se ā ua tele ai fesoasoani e avatu mo tagata talavou? (e) O ā uiga o le a fesoasoani ia te oe e tetee atu ai taumafaiga a Satani e olegia oe?
20 Tau ina ia outou lē manatu faapea o lenei uaʻi atu ua matou taumafai ai e faaituau faasaga ia te outou e faaola lo outou olioli. Na i lo lena, e alofa le faalapotopotoga a Ieova ia te outou, ma o mea uma ua taʻu atu ma lomia ona o le manaʻo ina ia puipuia outou—faasaoina o outou ola! Taumafai e aʻoaʻo ma talisapaia nei sauniuniga. Fai ma masani le faia o ni suʻesuʻega faale-Tusi Paia e faaaogā ai lomiga a le Sosaiete; faataga le upu moni mai le Tusi Paia e faagaeʻe oe i le talisapaia. Tau ina ia i a te oe uiga o se talavou e 18 tausaga, o le na tusi mai ina ua uma ona manatunatu i fautuaga sa tuusao atu i talavou faapea: “Ua faatoa ou iloa nei maeu le manuia o i matou o talavou i totonu o le upu moni! E leai lava se isi faalapotopotoga i luga o le lalolagi o manatu mamafa alofa tele i ona tagata talavou!” Seʻi o tatou auau faatasi ma tetee atu i taumafaiga a le Tiapolo e olegia i tatou, auā tatou te le o valea i ana faiga!
PUSA MO LE AUTALUGA
◻ Ai se a ua ave ai ma taulaiga faapitoa a Satani le au talavou
◻ Na faapefea ona faaseseina e Satani Eva ia faia le mea sese?
◻ Ua faapefea ona faaseseina pea e Satani talavou i aso nei ia faia mea sese?
◻ O ā sauniuniga ua i ai mo le puipuia o talavou?
[Ata i le itulau 10]
E pei ona taumafai Satani e faaseseina Eva, o lē na itiiti lona poto masani i lo o Atamu, ua faapena foʻi ona avea talavou ma taulaiga faapitoa a Satani
[Ata i le itulau 13]
Pe faaesea e le au talavou i latou, o le a tuputpup aʻe faanaunauga tau i feusuaiga ma taʻitaʻiina atu ai i le solia o le tulafono a le Atua