Lipoti o E Faalauiloa le Malo

O E Loto Faafetai ona o le Faiva i le Lautele?

E faale-Tusi Paia le faiva mai lea fale i lea fale, ma ua lauiloa Molimau a Ieova i le lalolagi uma ona o lenei taualumaga o la latou auaunaga i le lautele. (Galuega 20:20, 21) Sa taʻu atu e Iesu i ona soʻo: “A e maua e outou i le mana, pe a afio ifo le Agaga Paia i luga ia te outou; e fai foi outou ma molimau ia te au i Ierusalema ma Iutaia uma lava, o Samaria, e oo lava i le tuluʻiga o le lalolagi.” (Galuega 1:8) Ua faailoa mai e le Galuega 5:42 faapea sa leʻi mapu na uluaʻi Kerisiano i le ō atu i “lea fale ma lea fale.”

I Haiti sa i ai se fetaiaʻiga e tusa ai ma le faiva mai lea fale i lea fale a Molimau a Ieova. Na tupu lenei mea ina ua feiloaʻi se paeonia faapito ma se fafine maelega i le lotu Porotesano. A o faia le talanoaga, sa faatu atu e le uso faapea na o Molimau a Ieova lava o loo talaʻi atu mai lea fale i lea fale e pei ona faatomua mai e le Tusi Paia. A e na tali ma faapea le fafine e mafai foʻi e tagata o lana lotu ona ō e talaʻi mai lea fale i lea fale ma sa faia foʻi faapena i nisi mea. O le mea moni, o le isi Aso Toʻonai, na fetaiaʻi ai Molimau ma se vaega o ō atu mai lea fale i lea fale, e taʻitaʻi e lenei fafine. Pe tusa ma le toa selau le vaega. Ona o le mimita tele o le fafine i lenei faatinoga, sa ia valaaulia ai le uso ina ia molimauina lenei mea.

I le vaiaso mulimuli ane, na toe taʻitaʻia ai foʻi e lenei lava fafine se isi vaega ma sa fiafia lava e faasino atu i le uso. Na faapea mai le uso, a e peitaʻi ua na o le ʻafa o i latou na ō atu i le vaiaso ua teʻa o loo auai nei. I le Aso Toʻonai lona fa ua faaitiitia i le 20 le vaega, ma i le Aso Toʻonai lona lima ua na o le fafine. Sa ia alu atu ma le loto maulalo i le uso ma faapea atu: “Ou te ioe, ua na o Molimau a Ieova e i ai le upu moni, auā na o i latou lava e mafai ona ō atu i le galuega talaʻi i lea vaiaso ma lea vaiaso.”

Sa ofoina atu i ai e le paeonia faapito i le fafine se suʻesuʻega faale-Tusi Paia o le a faailoa atu ai ia te ia le pogai e mafai ai e Molimau ona faaauau pea ona talaʻi atu mai lea fale i lea fale ma le pogai e lē mafai ai e isi. Sa talia lelei e le fafine. Sa amata loa ona suʻesuʻe o ia ma lana tane ma agaʻigaʻi lelei i luma. Ua aufaatasi atu nei i laʻua uma ma Molimau a Ieova, ma ua faalauiloa atu nei ma le maelega le Malo i le lautele mai lea fale ma i lea fale!

O le galuega mai lea fale i lea fale ma isi auala o le faiva mo le lautele, o ni sauniuniga ofoofogia ma le alofa a Ieova ua fuafuaina mo le sailia o i latou loto faamaoni, ma fesoasoani ai la i latou e aʻoaʻo i mea o ia finagalo ai mo le ola. Ua auai ma le fiafia Molimau a Ieova e tusa ai ma na mea atoa foʻi ma isi taualumaga o la latou auaunaga paia i le Atua. Ua tutusa lelei lava o latou uiga ma uiga o le aposetolo o Paulo, o lē na faapea mai: “Ou te faafetai atu foi ia Keriso Iesu lo tatou Alii, o le na faamalosia aʻu, na ia manatu ua faamaoni aʻu, i lona tofia aʻu i lenei faiva.”—1 Timoteo 1:12.