Fesili Mai i le Au Faitau

◼ E mafai faapefea e se Kerisiano ona iloa le eseesega i le va o o le faia o se mea e faatogafalea (o loo taʻusalaina e le Tusi Paia) ma le tuuina atu o se “meaalofa” ona o se auaunaga?

E manaomia ona tatou talisapaia faapea o faataʻitaʻiga po o mea e faia e eseese lava mai lea vaipanoa i lea vaipanoa. O auala e talia i nisi atunuu e faasaina pe lē talia i isi nofoaga. Mo se faaaʻoaʻoga, o tagata i isi atunuu atonu e ifo atu ni tagata maualuluga, a e isi atunuu ua tusa lena ma le ifo i tupuaa E faapena foʻi la i le faia o se “meaalofa” e talia i le tasi atunuu a e atonu o se mea e faateʻia ai pe lē faamaonia foʻi i le isi atunuu. A o tauaveina nei feeseeseaiga i le mafaufau, e tatau i Kerisiano ona faatatau fautuaga a le Atua faasaga i le faia o ni mea faatogafalea.

O le ā le faatogafalea, ma o le ā o fai mai le Tusi Paia e uiga i ai? Ua faamatala mai e le The World Book Encyclopedia: “O le faatogafalea o se mea tāua i se tagata e maufaatuatuaina, o lē i le toe faafoʻi mai o le a na solia ai lona tiute o le tulafono ina ia maua ai e lē na foaʻi atu se aogā.” O lea o le togafalea le avatu o se tupe (po o se meaalofa) i se faamasino ina ia tāaina ai lana faaiʻuga ma faasese ai le faamasinoga. O le togafalea foʻi le ofo atu o ni tupe ina ia faataamilo ai le tulafono, e pei o le fai atu i le alii asiasi fale po o le pasi taavale ina ia pupuni ona mata mai le solitulafono ua faia.

E taʻusalaina e le Atua le faatogafalea o se mea, i lona taʻu atu i faamasino Isaraelu: “Aua e te faapioina le faamasinoga; aua e te faailogaina se tasi, aua foi e te talia se mea alofa; auā o le mea alofa e faatauaso aʻi mata o e popoto, e faaseseina ai foi o upu a e amoitonu.” (Teuteronome 16:19; faatusatusa le Faataoto 17:23; Isaia 1:23; 5:23; 1 Samuelu 8:3-5) Na faataatia e Ieova lava ia le tulaga, auā o ia, “e leai se amioletonu . . . po o se faailogaina o tagata, po o se talia o mea alofa.” (2 Nofoaiga a Tupu 19:7; Teuteronome 10:17) O Kerisiano e naunau i le faamaoniga a le Atua latou te alofia togafiti e faaseseina pe faatogafalea ai ni mea.—Faatusatusa le Galuega 24:26.

E ui lava ina tautala ma faia e tagata i le lalolagi atoa tulafono faasaga i le faatogafalea, a e ua fesagaʻi pea le toatele o tagata ma faafitauli e atagia i le fesili o loo i luga. Ua latou iloa e manaomia se “meaalofa” ina ia maua ai tagata ofisa maualuluga i o latou atunuu e faia a latou galuega po o le faia ma le tusa. O se faataʻitaʻiga, na faapea mai le The Wall Street Journal i se atunuu e taatele ai le siʻi taʻi o le tau o le soifuaga: “Ina ia maua ni tupe faasili e manaomia ina ia ola ai, ua tele ai ina fai e tagata faigaluega o le malo togafiti taufaasese iʻuvale. ‘E manaomia ona e totogia i latou ina ia latou tuu atu ia te oe soo se pepa,’ ua fai mai ai le ulu o sui o le setete. I le taimi nei ma ua faavevesi solo ai e tagata ofisa o femalagaaʻiga tagata tafafao mai isi atunuu i malae vaalele faavaomalo mo le $20 e faailogina ai o latou tusi folau ina ia lē misia e tagata malaga a latou vaalelei.”

Talu ai nei, fai mai le U.S. News & World Report e uiga i le lē taulau o le ofisa tau i le vai fafo ma iʻu ai ina avea le faia o totogi mulimuli ma mea taatele i le lalolagi atoa. Mo se faaaʻoaʻoga, ua faapea mai le lipoti: “O se tagata Initia i aso nei e ao ona faasee atu ni tupe i tagata ofisa ina ia tusia ai se tamaitiiti i le aʻoga, ina ia maua ai se faatagaga i le falemaʻi, e oo lava ina ia faasaogalemuina ai le taofia o nofoa i ni nofoa afi.” Ua faaaofia atu ai ma isi faataʻitaʻiga o lenei mea:

—O se tagata faatauoa na te manaomia se pemita a o leʻi mafai ona ia faigaluega. Ua ia totogia se tagata o ofisa i se ofisa o le malo, ioe auā ua iloa e tagata uma a aunoa ma lona totogia o se “meaalofa” o lona uiga e faapito lava i lalo o le faaputuga ana pepa. Ona e lē o fai atu o ia ina ia faamuamua o ia i luma o isi, a e afai na te avatua se “meaalofa” fetaui, ona mafai lea ona taulimaina lelei lana pepa.

—I se isi atunuu faapitoa, e iloa ai e tagata faapea o tagata ofisa i mea tau taavale e maulalo lava se totogi e maua ma ua faatalitalia e faaopoopo atu i ai “meaalofa” mo ni fagu inu ma isi mea faapena.” A taofi e se leoleo se taavale ma fai atu i le ave taavale ua e soli se tulafono, o lea, e tatau ai i le tagata ona totogi se sala. Afai e tetee le ave taavale ma fai atu na te leʻi solia se tulafono, ona lapataʻi atu loa lea o le alii ofisa afai e ave le mataupu i le faamasinoga, o le a ia molia foʻi le tamaloa i le faaoʻolima i se alii ofisa. O lea, o le toatele lava o le a totogi loa lava le “sala,” i le manatu faapea o se lafoga e lē alofia. O isi e mumusu, ua malilie lava e tauave iʻuga.

—I se malo, e tatau ona saunia le aoina o kalone lapisi. A e o se mea masani mo lē ona le fale ona tatau ona avatu se “meaalofa” i le tamaloa ao lapisi. A lē faia e se tasi, e “faagalo” ai lava lana lapisi, ma ua tatau ai loa ona faasalaina o ia ona o le manogi leaga.

O na faafitauli ua faaalia ai o le toatele o faipule silisili ua latou faaaogāina o latou tulaga faalemalo e maua ai ma le lē amiotonu tupe faasili. (Failauga 8:9) Ua leva ona faanaunau Kerisiano mo le faiga fou amiotonu a le Atua, peitaʻi seʻia oo lava i lena taimi, e tatau lava ona latou feagai ma le faiga o mea o i ai nei. (2 Peteru 3:13) E mafai ona uiga lenei mea i le iloa o tulaga masani e faatalitalia ai e ofisa o le malo meaalofa mo le faia o a latou galuega. E tusa lava po o atunuu e taatele ai lenei mea, o le toatele lava o Molimau a Ieova o ē feutagaʻi ma alii asiasi ma ofisa o le tiute ua latou teena lava le avatu o “meaalofa” ina ia maua ai le mea ua manao ai le tulafono latou te faia. Ona e lauiloa i latou i lenei tulaga, ua latou maua ai faiga ia faatoʻā maua e le toatele i le na ona totogiina o ni tupe. (Faataoto 10:9) Peitaʻi, e tatau i Kerisiano taitoatasi ona taʻitaʻia e lona loto fuatiaifo aʻoaʻoina i le Tusi Paia e tusa ai ma na tulaga lautele.

O le alofa i lou tuaoi o se mea moni e tatau ona manatunatu i ai. (Mataio 22:39) O se faalealofa le faia o se “meaalofa” ina ia maua ai ni faiga faaaʻauaʻu, e pei o le oso atu i luma o se laina, e tuua ai i tua isi sa faatalitali. Na fautuaina i tatou e Iesu ina ia tatou faia i isi e pei ona tatou mananao e faia mai ia i tatou. (Mataio 7:12) Atonu ua lagona e nisi Kerisiano faapea a oo mai lo latou taimi i le faasologa, e mafai ona latou faia e tusa ma faiga a le atunuu e avatu se “meaalofa” ina ia maua ai se tagata ofisa o le malo e faia le mea o manaomia i lana galuega. O le mea moni, i atunuu e lē o ni aganuu po o o ni tu le faia o ni “meaalofa” pe avea foʻi o se mea e ilitata i mafaufau o tagata lautele, o le Kerisiano alofa la o le a gaoioi i se auala e lē tausuai ai isi—1 Korinito 10:31-33.

O le isi mea moni o le usiusitaʻi i le tulafono. Sa lapataʻia mai e Iesu: “ina ia avatu ia o mea a Kaisara ia Kaisara; ia avatu foi mea a le Atua i le Atua.”b (Mareko 12:17; tagaʻi foʻi i le Mataio 17:24-27) O le mea lava e tasi pe afai e leʻi solia e se Kerisiano se tulafono ae ua faatalitalia e avatu se “meaalofa” i se tagata faigaluega o le malo po o se isi alii ofisa. A e faapefea pe afai ua solia moni lava e se Kerisiano le tulafono? I lena itu, e faapefea ona i ai sona loto fuatiaifo lelei e ofo atu ai se meaalofa e faatogafalea ai le alii ofisa ina ia aloese mai lea soligatulafono? Sa tusi mai le aposetolo o Paulo e tatau ona tatou matataʻu i faipule silisili o ē ua tuuina atu i ai le pule “na te taui atu le toasa i lē amio leaga.” (Roma 13:3, 4) Sa faapena lava le tulaga o Paulo: Afai na ia faia se leaga, o le a ia talia lava le faasalaga ua talafeagai. (Galuega 25:10, 11) O lea, o se Kerisiano na ia solia se tulafono tau auala e tatau ona ia totogia se faasalaga po o o se totogi, e pei ona faatonuina e se ofisa po o se faamasino.

Na fai mai foʻi Paulo o malo o ‘auauna i latou ma lo outou lelei.’ E ui lava i le manao tele o nisi alii ofisa, a ua faia lava e malo ni auaunaga mo le lelei lautele. O se faataʻitaʻiga, e pasia e alii ofisa taavale, e faatatau i lo latou aogā po o le lelei e femalagaaʻi, e femalagaaʻi ai i luga o auala, ma latou te iloilo foʻi fale pe tusa ma tulaga e saogalemu ai i le afi. O lea la, afai e lagona e se Kerisiano e tatau ona “totogi” le alii ofisa o lē na te faatalitalia manino ai lava la e eseese lenei ma le faatogafalea o se alii asiasi i na ia aloese mai le solia o le tulafono.

Po o fea lava se atunuu latou te nonofo ai, e tatau lava i Kerisiano ona faaalia le poto aogā i le feagai ai ma nei tulaga masani. E tatau i auauna a le Atua ona manatua faapea o i latou o ē o le a ‘nonofo i le fale fetafai o le Atua ma mau i lona mauga paia’ e lē mafai ona latou faia ni togafiti faatogafalea. (Salamo 15:1, 5) E tusa ai ma le tuuina atu o ni “meaalofa” ina ia maua mai ia ni auaunaga faamaoni, po o le alofia ai o faiga lē tonu mai tagata i ofisa, e ao lava i se Kerisiano ona filifili po o le ā ua faatagaina e lona loto fuatiaifo ma tauave ai le avega tauave moni faalavelave e ono iʻu i ai. O le mea moni e tatau lava ia te ia ona tulimataʻia se auala e tuua ai o ia ma se loto fuatiaifo lelei totino ma e lē faaeleeleaina ai le igoa lelei o le faa-Kerisiano pe faatausuai ai ē o loo matau mai.—2 Korinito 6:3.

[Faaopoopoga i lalo]