O E Saili mo se Paaga i le Olaga?

“Ua le o toe i ai nei ni faiā alofa, ma mafana faauo, i nuu po o kamupani na i lo o se faaipoipoga lelei.” O tala na a tagata ua fai. O lea, e lē o se mea e ofo ai faapea e faitau miliona tagata nofo toatasi ua manano i ni paaga i le olaga.

Ua vaavaai nisi i komepiuta e suʻeina ai ni a latou paaga, a e o isi ua vaavaai atu i fetu. A e pagā, le sili ona lelei pea vaavaai atu i Lē Na Faia i tatou, o le Amataga o faaipoipoga! (Kenese 2:18-24) O le naunau alofa o le Atua ma le poto ua aumaia ai se faavae mautū mo le faalagolago atu i lana fautuaga ma matupu silisili e fesoasoani ai ia i tatou e iloa po o a mea e vaai i ai mo le sailia o se paaga faaipoipo. (Salamo 19:7) Ua faatonu mai e lana Afioga ia i tatou:

‘Faaipoipo tau o Le Ua i le Alii’

Ai se ā? Talu ai e manatu mamafa tele Ieova i lo tatou lelei tumau. O le faatonu mai a le aposetolo o Paulo ‘ia faaipoipo tau o le ua i le Alii’ ua talafeagai lelei lava ma faataʻitaʻiga na o ē tapuai moni e avea ma a latou paaga faaipoipo. (1 Korinito 7:39; Teuteronome 7:3, 4) E tele aogā e maua i le faia faapea ma e tatau ona teu i le mafaufau.

Mo se faaaʻoaʻoga, o se paaga faaipoipo i la le Atua e mafai ona saosaolaumea i le faaauau pea ona faamaoni i lo tatou Tamā faalelagi alofa. (Faatusatusa le Failauga 4:9-12.) O paaga Kerisiano e mafai ona faamalosiau le tasi i le isi ma e mafai foʻi ona faafetaiaʻia ma le manuia tofotofoga eseese. O le aufaatasi, e mafai ai ona la teteea omiga e ono faavaivaia ai noataga o le faaipoipoga. Talu ai o i laua uma e tepa taulaʻi ia Ieova ma faatatauina ana fautuaga ofoofogia, e mafai ona la faaleleia ma le faigofie vaega fitā ma galulue faatasi i le autasi na i lo le avea o ni e tauvā. O a la taumafaiga faamaoni e auauna ia Ieova ma faafetaui o la olaga e tusa ai ma ona ala o le a saosaolaumea ai i se faaipoipoga manuia e viia ai Lē Na Foafoaina i tatou.

I nai tausaga ua mavae, sa i ai se faatasiga mafana i le va o se tasi fafine e igoa ia Gloria ma se tamaloa talavou na auai i sauniga Kerisiano ma sa oo lava ina faia foʻi ni ana faaopoopoga i le Suʻesuʻega o le Olomatamata. Sa ia maua fautuaga ia aua neʻi faaauauina le la fesoʻotaʻiga vavalalata ma lenei tagata leʻi papatisoina, peitaʻi sa “ulu le alofa” ia te ia ua na lē faatatauina ai le fautuaga. Peitaʻi, sa ia iloa e lelei le fautuaga. O lea, i se tasi aso na ia tatalo ai ma le naunautaʻi ia Ieova, ma ole atu mo lana fesoasoani i le mataupu. E leʻi umi mulimuli ane, a e ia iloa o lenei tamaloa talavou e amio eleelea, ma na tipiesea loa e Gloria le la faiga uo. Sa mulimuli ane faaipoipo atu o ia i se tamaloa talavou Kerisiano amio lelei. I le taimi nei, o ia o se toeaina tofia, ma o le la fanau e toalua o loo malolosi i le upu moni. Ua faapea mai lana tala pe a toe tepa i tua: “Faafetai ia Ieova, ua ou alofia le tele o faafitauli. Talu ai lana taʻitaʻiga, ua ou maua ai le fautuaga sili, ua faataga ai aʻu e ola i se olaga fiafia faatasi ma se tane alofa.”

Ai se ā E Vaai ai I se Isi Mea?

Ai se ā la, o le a vaai atu ai se tagata tuuina atu ia Ieova i se isi mea mo se paaga faaipoipo? Pe ua lē mautinoa ea e se Kerisiano ua sili le silafia e Ieova o mea ma e faanaunau o ia mo le mea e sili mo tatou? (Faataoto 3:1-7; Salamo 145:16) A e faapefea oe? Pe e te talitonu o Ieova o le “Atua faamaoni”? (Salamo 31:5) Afai o lea, ua e mautinoa la ua na saunia fautuaga faatuatuaina e tatau ma aogā. (Isaia 48:17, 18) O le mea moni, ua aumaia e lo tatou Tamā alofa faalelagi fautuaga faatasi ma lo tatou lelei tumau i lona finagalo, peitaʻi atonu e puupuu ma gata mai a tatou fuafuaga mo le lumanaʻi lata mai. Afai e sailia se paaga mo le olaga, pe lē tatau ea ona tatou fuafua mo mea e sili atu na i lo le lumanaʻi lata mai?—Salamo 37:11,29.

Pe e te talitonu moni ea ua lata mai le malo uma ua lē o toe umi a e gaoioi e faamamā le laueleele? Ma pe o e iloa atu oe i le Parataiso faalekelope ua valoia? Pe o e faanaunau e olioli atoatoa i le faiga o mea o i ai nei? Po o e vaavaai ea mo se paaga o i ai se tomai e sauniunia ai mo oe se ituaiga olaga lelei? Pe o e sailia ea se tasi e tausia le tapuaiga moni i le tulaga muamua? (Mataio 6:33) O le mea moni, o le ā le mea silisili i lou olaga? O se mea poto mo i tatou le suʻesuʻeina o ō tatou manatu ma faanaunauga i totonu. Ma, afai e tatau ai, e mafai ona faia ni fetuunaiga ma mafai ai ona alofia se ala o gaoioiga e ono lē fiafia i ai Ieova.—Faatusatusa le Salamo 78:40,41.

O Tatou Fatu Faaʻoleʻole

Ua lapataʻi mai le Ieremia 17:9 faapea “e sili le faaʻoleʻole o le loto i mea uma.” O le a tatou te manaomia ona siakiina pea. E lelei foʻi ona manatua o i latou e lē amanaiaina fautuaga a le Tusi Paia faagaeeina ma faamanatuga ua tuuina mai ma le alofa e toeaina o le faapotopotoga ma isi, e sili atu ona tele o latou loimata e maligi ma faapuapuagaina i le loto tiga.

‘Peitaʻi, e faapefea ona e fai mai faapea?’ atonu e fesili mai ia se tasi. ‘Ou te iloina se uso sa leʻi faaipoipo i se tufafine tapuai, a e o le taimi nei ua tapuai uma i laʻua ia Ieova.’ E moni, i nai nisi tulaga ua faapena le faagasologa o mea, ma ua faafiafiaina i tatou ona o i laʻua uma o loo “savavali . . .i le upu moni.” (3 Ioane 4) E ui i lea, o le uso na faaipoipo atu i le tagata leʻi papatisoina sa leʻi usiusitaʻi o ia. Pe o le a toe aliaʻi aʻe ea lea ituaiga agaga tutoatasi? Pe ono tofotofoina ea o ia e mafaufau ua sili atu lona iloa na i lo le Atua ma lē amanaia ai faatonuga faale-Tusi Paia ma faatuatua ai i lona lava poto i se isi foʻi tulaga? Ua faamalosia i tatou ia ‘faatuatua ia Ieova ma o tatou loto atoa.’ (Faataoto 3:5) Ua faatatauina lena i le usiusitai e fegai ai ma le finagalo tauatua i mea uma. O lea e tatau ona tatou mananao e atiina aʻe se fatu usiusitaʻi, se fatu e faafetaiaʻia le tofotofoga o le usiusitai e oo lava i mea laiti. (Luka 16:10) Afai tatou te lē usiusitai i le Atua, o le ā le ituaiga fua o loo tatou atiina aʻe? O le uso sa leʻi faaipoipo i ‘lē ua i le Alii’ atonu ua na iloa nei lana mea sese i le faia o mea i lana lava auala ma ua sailia se faamagaloga mai ia Ieova. Peitaʻi pe o le auala ea lena e te manao e amata ai lau faaipoipoga?

A e atonu e faapea mai se isi, ‘peitaʻi ua amata ona suʻesuʻeina laʻu uo tama i le Tusi Paia ma ua auai i sauniga faa-Kerisiano.’ Ioe, a e ai se ā ua suʻesuʻe ai o ia? Ina ia manumalo i se paaga faaipoipo po o le aʻoaʻoina e uiga ia Ieova le Atua ma auauna ia te ia? I le taimi o le faauoga atonu o masalosalo ai i faanaunauga o le tama. O le ā o le a e iloina pe a mavae le aso o le faaipoipoga? O le mea moni, atonu e te faatali seʻia papatiso lau uo tama, ma a maea o le a lē pine loa ona faatulaga le aso o le faaipoipoga. I le tautala ma le lotomau, ua e ‘faaipoipo i lē ua i le Alii.’ Peitaʻi pe o e gaoioi ia talafeagai ma le agaga o lena fautuaga.?

Pe o e matauina ea le tofiaina o se uso mo se faaeaga faapitoa i le auaunaga? Pe ua lava ea le tau ina papatiso? Leai, na i lo lea, o se uso ua “muamua ona tofotofoina.” (1 Timoteo 3:10) Pe mafai ona tatou aʻoaʻoina se lesona mai lena mea? Ioe. Taofi, vaai, ma faalogo. Taofi ma mafaufau e uiga i le tulaga mamafa o le faaipoipoga. Vaai i le tagata lea e toatasi i se vaaiga manino i lona tagata moni a e lē ala i se vaaiga puaoa i mata o le alofa faavalea. Ma ia faalogo foʻi. Pe tautala mai ea o ia mai le fatu faatasi ma ni faaupuga alofa viiga i le Atua? Mo se vaitaimi, pe na ia aumaia ni faamaoniga o le tuputupu aʻe faale-Kerisiano? Ina ua maea ona ia faaalia lona faamaoni ma agavaa faaleagaga, ua lava le umi lea e amata ai loa ona tau manatu ia te ia o se paaga fetaui i le olaga. Ua faapea mai se fatusolo tausua:

“Tamatai e! o le tala fatu ua ou taʻu atu

Ua faaoo atu ai lenei lesona—

Aua le filifilia na o se paaga fetaui

A e o le taimi fetaui e faaipoipo ai.”

O le ā e mafai ona tupu pe a faataga e ō tatou fatu i tatou e lafoaʻi fautuaga lelei ma fetuunaiga autū? O iʻuga e mafai ona mataʻutia. Manatua, ua fautua mai le Tusi Paia ia i tatou:

‘E te Selesele Le Mea E te Lūlū’

Manatu i le mea na tupu ia Jacqueline. Na fautuaina o ia e se toeaina e uiga i se faiga uo na faia ma se tama talavou i fafo atu o le faapotopotoga Kerisiano. Peitaʻi talu ai na ia lagona le taofiofi mamau tele o le au uso, sa faataligatuli ai o ia i fautuaga e faavae aʻe i le Afioga a le Atua. Pe a toe manatu i ona lava uiga, na taʻutino mulimuli mai o ai: “O le tagata na te iloa na o mea e manao na te iloa a e lē o mea e silafia e Ieova ma fetalai mai ai.” Na amata ona suʻesuʻe i le Tusi Paia lenei tamaloa ma mulimuli ane papatisoina o ia. I le tolu masina a e faaipoipoina loa i laʻua.

Na vave ona tutupu aʻe faafitauli. O le mea moni na amata lava i le taimi o le la feiloaʻiga ina ua faatoa mavae le faaipoipoga! O uiga lē manaomia sa leʻi matauina e Jacqueline pe na te leʻi amanaiaina foʻi ua faaalialia nei. Sa moe miti o ia i se faaipoipoga fiafia ma le autasi, peitaʻi, ma le faanoanoa lava, o le faafeagai ma le mea na faamaonia moni. Na faateʻaina lana tane ma tuua o ia ma ā la pepe e toalua. Nei, e tatau ona ia fetaiaʻia ma omiga tau tupe i lenei faiga o mea malepelepe faapea le luʻi o le tausia aʻe o le fanau laiti e toalua, i le tausia o ō la manaoga faaletino ma faalogona. O le ā ua aʻoaʻoina mai e Jacqueline mai lenei mea tiga na tupu? Fai mai a ia o le “usiusitai.” “E ui ina foliga e saūa le fautuaga pe lē foliga mai foʻi e sili ona lelei mo oe, a e tatau lava ona e manatu i ai e sau mai ia Ieova ma e tatau ona e matuā usitai i ai.”—Kalatia 6:7; Salamo 86:11.

Manatu i se isi faaaʻoaʻoga. Sa fetaui Maritza i le galuega ma le tamaloa o le a avea ma ana tane i le lumanaʻi. Sa ia faaali ia te ia mea i le lalolagi na te leʻi iloa muamua—sa leʻi foliga e leaga ia te ia. Sa aʻoaʻoina lelei o ia, lelei ona uiga, ma e tele mataupu e tautala ma le poto i ai o ia. E ui ina sa avatu ia te ia le tele o lapataʻiga faale-Tusi Paia ae sa leʻi goto i totonu nei lapataʻiga. Sa matuā “ulu le alofa” ia te ia.

E leʻi umi a e avea sauniga Kerisiano ma mea pasiā ia Maritza, pe a lē faafiafiaina o ia faatasi ma lana paaga i faafiafiaga i afiafi. A o lumanaʻi le la faaipoipoga, sa ia folafola o le a ia lē faalavelave i ana sauniga faa-Kerisiano, ma sa faapena lava. Peitaʻi, na faasolosolo ina faatumuina o ia i isi mataupu ma ua toe faatulaga ai ana galuega faaleagaga i le nofoaga lona lua, ma avea ai o ia o sē lē maelega faaleagaga.

Peitaʻi e faapefea na talanoaga fiafia? Na faasolo malie atu lava ina uma, ma iʻu ina faateʻa o ia e lana tane, tuua ai o ia ma lana fanau e toafa mai le fa tausaga e oo i le iva tausaga le matutua. O lenei tulaga faateʻia na gase ai Maritza, ma na ia faatoa lagona le toafilemu lelei ina ua mavae le tolu tausaga ma iloa ai le mea na tupu ma le mea o le a ia faia i lona olaga. Sa tumau pea ona faapea ifo o ia ia te ia: “Afai ou te ola o le a ou puapuaga pea.” Peitaʻi sa leʻi faamalieina ai o ia auā sa mafai pea ona ia manatua tausaga sa fiafia ai, a o faafiafiaina o ia i le ea malū na taia ai ona mata a o auai i le auaunaga i le fanua, faatasi ma isi i le tufaina atu o le tala lelei o le Malo.

“Auē, pagā le tele o tiga ma popolega sa ono mafai ona ou alofia pe ana fai sa ou faalogo!” O le tala lea a Maritza. O uo o lana fanau i le aʻoga, na toe fesoʻotaʻi ai o ia ma Molimau a Ieova. O lona naunau fiafia i le upu moni ma le alofa mo Ieova na toe faagaeeina, ma o le taimi nei ua maelega o ia ma lana fanau i lana auaunaga. O le taimi nei ua faapea mai ma le loto atoa Maritza: “Aʻoaʻo ia gauaʻi i le taʻiala ua tuuina mai e Ieova ma ia iloa e faaaogāina e Ieova tagata e sili ona e manatu faatauvaa i ai latou te faalauiloina lona finagalo.” E pei ona fetalai Iesu: “Ia outou, pe faapefea lo outou faalogo.” (Luka 8:18) Ioe, taofi, vaai, ma faalogo!”

Vaavaai solo i le taimi o le isi sauniga i le Maota o le Malo. E aunoa ma le masalosalo o le a e vaaia le tele o ulugalii faaipoipo fiafia Kerisiano ma o le a e iloa lo latou fiafia e fetufaaʻi faatasi le taimi ma mea na tutupu. I le isi itu, atonu o e iloa nisi ua na o i latou ona o a latou paaga e lē talitonu. Maeu lo latou moomoo ina i ai a latou tane po o avā e faatasi ma i latou! E masani lava ona latou faatotope atu i le aiga pe a uma le sauniga ma misia ai talanoaga atiina aʻe ma le auaufaatasi ma uso talitonu. Pe e te naunau ea ia maʻimau oe i se tulaga lē manaomia faapena ona o le lē amanaiaina o le fautuaga ia ‘faaipoipo tau o le ua i le Alii’? Na i lo lea, maeu le atamai o le mulimuli i faatonuga a Ieova ma alofia ai iʻuga faanoanoa!—Salamo 119:9; Faataoto 28:26.

Faatalitali ia Ieova

‘Peitaʻi,’ atonu e te faapea mai, ‘Ou te lē maua se isi i le faapotopotoga. E toaitiiti tele tagata o laʻu tupulaga.’ Atonu pe moni lena. Peitaʻi pe ua e mautinoa ea e finagalo Ieova ia e fiafia? “O loo naunau mai o ia ia te outou.” (1 Peteru 5:5, 6) Pe e te manatua le faataoto o faapea mai: “O le avā mafaufau, mai ia Ieova lava ia.”? (Faataoto 19:14) O lea la, ai se ā e lē tāea ai le mataupu tau i faaipoipoga i au tatalo?—Filipi 4:6, 7.

Pe e te manatua Hana ma lona faanaunauga ia maua se tamaitiiti? O le ā na ia faia? Na ia sasaa atu lona fatu i talosaga ia Ieova, ma le faatuatuaga atoatoa ia te ia. Ona ia tuua lea o mataupu i ona aao. I le taimi tatau ai, na ia maua se tali matagofie i lana tatalo—i le fanauina o se tama tane.—1 Samuelu 1:9-11,18-20; Salamo 62:8.

E ui atonu e toaitiiti tagata i lau faapotopotoga tou te tupulaga faatasi, a e faapefea fonotaga matagaluega ma tauaofiaga itumalo? Tatou te auai i ia faatasitasiga mo ni mafuaaga faaleagaga. Peitaʻi o i latou o tauofo atu a latou auaunaga i taimi faapea ua i ai se fiafiaga o le auauna i isi ma fetaui ai i uso ma tuafafine o ē auauna ma le ola atoa ia Ieova. Ma i ia ituaiga faatasiga, ua i ai nisi avanoa o le a e fetaui ai i lau paaga i le lumanaʻi mo lou olaga.

Peitaʻi tusa lava pe lē mafai ona e maua nei se paaga Kerisiano e fetaui, a e ia tatalo ma faalagolago ia Ieova e fesoasoani ia te oe e saili se olaga mamā o se tagata nofo toatasi. Ma a o leʻi faaipoipo pea, ia atiina aʻe uiga ma tomai e faigofie ai ia te oe ona avea ma tane ma tamā lelei po o se avā ma se tinā lelei. (Kalatia 5:22, 23) E toatele ua fesoasoani i ai e faia faapea e ala i le auai i le auaunaga sauatoa o ni paeonia. Maeu se auala sili e faaaogā i ai lou taimi ma le malosi!

Afai o e vaavaai mo se paaga mo lou olaga, ia, o fea o le ā e amata mai ai? Talosia ia aumaia mai uso tapuai o Ieova, i latou o ē tutusa sini i le olaga ma ē e i ai se faanaunauga loloto e auauna ia te ia e faavavau. (2 Timoteo 2:22) Ma afai e faamanuiaina oe e Ieova i se paaga e mataʻu i le Atua i le olaga, talosia ia avea lau faaipoipoga o se mea e viia ai lo tatou Atua alofa.

[Faamatalaga faaopoopo i le itulau 28]

“Auē, paga le tele o tiga ma popolega sa ono mafai ona ou alofia pe ana fai sa ou faalogo!”