O Ni Faailoaga Aupito Sili e Lua o le Alofa e Leʻi Faapea Ona Faia

“Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.”—IOANE 3:16.

1. O le ā le uiga o le faamatalaga “o le Atua o le alofa lava ia”?

“O LE Atua, o le alofa lava ia.” Sa faalua ona faia ai e le aposetolo o Ioane lena faaupuga. (1 Ioane 4:8, 16) Ioe, o Ieova le Atua e alofa e lē na o le auala faapea o ia e poto, e tonu, ma e malosi; a e o ia O LE alofa. O ia o le tino po o le peresona, o le alofa. Atonu e te fesili ifo ia te oe: ‘Pe ou te iloa ai se ā ua faapea ai o le mea moni lena? Pe mafai ona ou saunia se faamatalaga manino i se tasi, e lagolagoina e mea moni po o ni faaaʻoaʻoga e faamaonia ai o ia o Ia o le alofa? Ma o a ni fua o i ai mo loʻu olaga ma gaoioiga?’

2. Na tuuina atu e le Atua le ā le faailoaga vaaia o lona alofa?

² Maeu le tele o le alofa o Ieova le Atua ua faaalia i luga o ana mea faiola faaletagata i luga o le lalolagi! Seʻi manatu i le matagofie atoatoa ma le galuega a o tatou mata, le ofoofogia o le malolosi o ō tatou ponaivi, le malosi ō tatou musele, ma le lagona vave o lo tatou paʻi atu. Ua i ai nei la se mafuaaga tatou te faaleoina atu ai lagona o le faisalamo: “Ou te vivii atu ia te oe, auā na faia aʻu e ala ai ona matautia ma ofo tele ai.” Seʻi manatu foʻi, i atumauga ma maualuluga, o vaitafe manino tafe lemu, laufanua e totogo aʻe ai fugalaau, ma le la goto malualii. “Ieova e, ua matuā tele au galuega. Ua e faia ia mea uma i le poto; ua tumu le lalolagi i au oloa.”—Salamo 139:14; 104:24.

3, 4. O a faaaʻoaʻoga ua saunia e Tusitusiga Eperu o faailoaga o le alofa o le Atua?

³ Sa leʻi taofia ai le faaalia o le alofa o le Atua ina ua fouvale ana uluaʻi mea faiola faaletagata. Mo se faaaʻoaʻoga, na faaalia e Ieova le alofa i lona faatagaina o lena ulugalii e aumaia ni a la fanau o ē atonu o le a maua ai ni aogā mai le sauniuniga e ala i lana “fanau” o le folafolaga. (Kenese 3:15) Mulimuli ane, ona ia faia lea o Noa ina ia saunia se vaa mo le faasaoina o le aiga faaletagata ma isi mea faiola faalelalolagi. (Kenese 6:13-21) O lea na ia faaalia ai lona alofa tele mo Aperaamo, o lē na lauiloa o le uo a Ieova. (Kenese 18:19; Isaia 41:8) I le faasaoina o ē na tupuga mai ia Aperaamo mai noataga i Aikupito, na tuuina atu ai e le Atua se faailoaga o lona alofa, e pei ona tatou faitau ai i le Teuteronome 7:8: “Ona ua alofa lava Ieova ia te outou, . . . ua au mai ai outou e Ieova i le aao malosi.”

⁴ E ui lava sa faaalia pea e Isaraelu le lē talisapaia ma fouvale pea lava pea, a e sa leʻi lafoaʻiina ai loa lava i latou e le Atua. Na i lo o lea, sa ia aioi atu pea ma le alofa ia i latou: “Ina outou liliu ese ia i o outou ala leaga; auā pe se a ea le mea tou te fia oti ai, le aiga o Isaraelu e”? (Esekielu 33:11) Peitaʻi, e ui lava o Ieova o le peresona o le alofa, a e tonu foʻi o ia ma le poto. O lea na oo mai ai le taimi na tumu ai le fua o lona onosaʻi mo ona tagata fouvale! Na latou oo atu ai i le tulaga “ua oo ina leai se fofo,” o lea na ia faatagaina ai i latou e ō atu faatagaotaua i Papelonia. (2 Nofoaiga a Tupu 36:15, 16) E ui foʻi i lena mea sa leʻi taofia ai e faavavau le alofa o Ieova. Sa ia silasila i ai ma i lea ina ua mavae le 70 tausaga na toe faatagaina ai se vaega totoe o i latou e toe foʻi atu i lo latou nuu moni. Faamolemole faitau le Salamo 126 ma iloa mai ai pe na faapefea ona lagona agaʻi i ai ē na toe faafoisia mai.

Sauniuni mo Lana Faailoaga Aupito Sili o le Alofa

5. Ai se ā e mafai ai ona faapea atu o le auina mai o lona Alo i le lalolagi sa avea o se faailoaga o le alofa o le Atua?

⁵ I le faagasologa mai lava o le talafaasolopito na oo mai ai le taimi mo Ieova e avatu ai se faailoaga aupito sili o lona alofa. O se alofa moni lava faataulagaina. I le sauniuni atu mo lenei mea, na faaliliu ai e le Atua le soifuaga o lona Alo pele e toatasi mai lona nofoaga agaga i le manava o le taupou Iutaia o Maria. (Mataio 1:20-23; Luka 1:26-35) Seʻi manatu i le vavalalata faapitoa na i ai i le va o Ieova ma lona Alo. Ua tatou faitau i ai le uluaʻi olaga o Iesu na i ai i lalo o le faatusa o le faatinoga o le atamai: “Na ou i ai ma ia [le Atua] o aʻu o le tufuga; na fai foi aʻu mona fiafia i lea aso ma lea aso; sa ou olioli i ona luma i aso uma lava.” (Faataoto 8:30, 31) O lea e te lē ioe ea la faapea i le na o le faia o Lona Alo pele e toatasi e tuua o Ia sa avea o se faataulagaina mo Ieova?

6. O le ā le naunau faa-Tamā e ao ona ia Ieova i le uluaʻi soifuaga o Iesu?

⁶ E mautinoa lava, sa silasila totoʻa ma le naunautaʻi mai Ieova i le tuputupu aʻe o lona alo mai lona faatoa fuafuaina faaletagata agaʻi atu ai i luma. Na faamalumalu ifo le agaga paia o le Atua i luga o Maria ina ia leai se mea e faaleagaina ai le tuputupu aʻe o le pepe. Sa tagaʻi foʻi i ai Ieova faapea sa ō atu Iosefa ma Maria i Peteleema mo le tusigā igoa ina ia fanau ai Iesu i inā e faataunuuina ai le valoaga i le Mika 5:2. Na lapataʻia foʻi e le Atua Iosefa e ala i se agelu, e uiga i fuafuaga fasioti tagata a le Tupu o Herota, na mafua ai ona sosola Iosefa ma lona aiga i Aikupito seʻia oo ia oti Herota. (Mataio 2:13-15) Atonu sa faaauau pea le naunau o le Atua i le tuputupu aʻe o Iesu. Maeu se fiafia sa i ai i le Atua i lona silasila ia Iesu e 12 ona tausaga o maofa ai le au aʻoaʻo ma isi sa i le malumalu i ana fesili ma tali na ia tali atu ai!—Luka 2:42-47.

7. O a faailoaga e tolu e faaalia ai le fiafia o Ieova i le faiva a Iesu?

⁷ I le sefuluvalu tausaga mulimuli ane ai, sa silasila mai ai Ieova ina ua alu atu Iesu ia Ioane le Papatiso ina ia faatofuina. Ona ia auina mai loa lea ma le olioli lona agaga paia i luga o Iesu ma ia fetalai mai: “O loʻu atalii pele lenā, ua ou fiafia lava ia te ia.” (Mataio 3:17) E mafai e so o se tamā Kerisiano ona manatu maeu se fiafia o le Atua i lona tulimataʻia o le faiva a Iesu ma silafia ai le auala sa ia tataʻi uma atu ai le viiga i lona Tamā faalelagi. I se tasi o mea na aveina atu ai e Iesu nisi o ona aposetolo i se mauga maualuga. O inā na faapogaia ai e Ieova e liua Iesu e pupula mai i se malamalama uiga ese, ma na tuleai mai le Tamā: “O loʻu Atalii pele lena, ou te fiafia ia te ia; ia outou faalogo ia te ia.” (Mataio 17:5) Na faia e Ieova lona siufofoga ia lagona faatolu i le tali atu i olega a Iesu i le Atua ina ia faamamaluina lona lava suafa. Na fetalai mai Ieova: “Ua ou tuuina atu le mamalu, ou te toe tuuina atu foi i ai le mamalu.” E manino lava na fetalai mai faapitoa lenei mea ina ia aogā mo Iesu, ona o nisi na faatasi ma ia sa manatu faapea ua fetalai mai se agelu, a o isi sa manatu ai o se faititili.—Ioane 12:28, 29

8. O le ā sou lagona e uiga i le alofa o le Atua?

⁸ O le ā lau faaiʻuga mai lenei autaluga pupuu o gaoioiga a le Atua agaʻi i lona Alo ma lona naunau ia te ia? E tatau lava ona manino faapea e alofa faapelepele lava Ieova i lona Alo pele e toatasi. Faatasi ai ma lena i le mafaufau, ma talisapaia le toetoe lava o mātua faaletagata uma e i ai ni lagona faapena agaʻi i sa la tama e toatasi, manatu po o le ā na tupu e sosoo ai—i le maliu faataulagaina o Iesu.

O le Faailoaga Aupito Sili o le Alofa

9, 10 O le ā le faailoaga aupito sili o le alofa o le Atua i le fanau a tagata, e faailogaina ai le ā le mau faale-Tusi Paia?

⁹ Ua faaalia e le Tusi Paia faapea e i ai lagona i lo tatou Tamā faalelagi. Ua tatou faitau ai i le Isaia 63:9 faatatau i ona tagata Isaraelu: “O latou puapuaga uma na le faia ai o ia mo latou fili; na faaolaina i latou e le agelu mai ona luma; na ia faatauina i latou i lona alofa ma lona agalelei; na ia siitia i latou ma ave ia i latou i aso uma anamua.” Maeu le tele o puapuaga atonu na ia Ieova i lona faafofoga ma silasila mai i le “tagi tele ma loimata” o Iesu. (Eperu 5:7) O le auala lena na tatalo atu ai Iesu i le faatoaga i Ketesemane. Na faapagotaina o ia, fesagaʻi ma tauemuga, na sasaina ma na faia le pale tuitui ma oomi atu i luga o lona ao. Ia manatu, o loo tulimataʻi mai lava e lona Tamā alofa nei mea uma. Sa silasila mai foʻi o ia o tautevateva Iesu i lalo o le mamafa o le satauro faaoosala ma na tagaʻi mai foʻi ina ua oo lava ina faatautauina lona Alo i lena laau. Aua foʻi neʻi galo ia i tatou faapea sa tatau lava ona puipuia e le Atua nei puapuaga uma i le vaega a lona Alo pele e toatasi. Peitaʻi na faatagaina e Ieova Iesu ia oo i ai puapuaga e tele. Talu ai ona e i ai faalogona o le Atua, o lona molimauina la o nei mea uma le mautinoa ua pogai ai le matuā tiga tele sa ia te ia pe o le a ia te ia.

¹⁰ I le vaai atu i mea uma na uluaʻi tutupu, ua tatou iloa ai le aogā tele o upu a Iesu ia Nikotemo: “Ua faapea lava ona alofa mai o le Atua i le lalolagi, ua ia aumai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.” (Ioane 3:16) E faapena foʻi le tāua o upu a Ioane, le aposetolo pele a Iesu: “O le mea lava lenei ua faaalia mai ai le alofa o le Atua ia te i tatou, ina ua auina mai e le Atua lona Alo e toatasi i le lalolagi . . . o le togiola mo a tatou agasala.—1 Ioane 4:9, 10.

11. Ua faapefea ona faatāua e le aposetolo o Paulo le faailoaga aupito sili o le alofa o le Atua?

¹¹ O lea la, ua e malamalama nei, i le pogai na faamamafa ai e le aposetolo o Paulo i le Roma 5:6-8, le alofa tele o Ieova i nei upu: “Auā na maliu Keriso i ona po e tatau ai, ina o vaivai pea i tatou, o le sui o ia o e faalematau. Auā e toe ina le mafai ona oti o se tasi e sui aʻi le ua amiotonu; a o le ua agalelei, atonu pe faamalosia ona oti se tasi e sui aʻi o ia; a ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea.” E moni lava, i le auina mai o lona Alo pele e toatasi i le lalolagi, tigaina, ma maliu i se maliu sili ona matagā, na faia ai e Ieova se faailoaga aupito sili o lona alofa.

O Lona Lua o Faailoaga Aupito Sili

12, 13. (a) O le ā le auala ua tutasi ai le faailoaga o le alofa o Iesu? (e) Ua faapefea ona tataʻi e Paulo manatu i le alofa tele o Iesu?

¹² ‘O le ā,’ atonu o le a e fesili ai, ‘le isi faailoaga aupito sili o le alofa na sosoo ai?’ Na fetalai Iesu Keriso: “E le sili lava le alofa o se tasi i lenei alofa, ia tuuina atu e se tasi lona ola e sui ai ana uo.” (Ioane 15:13) E moni, i le faagasologa o le talafaasolopito o le tagata, sa i ai nisi o ē na faataulagaina o latou ola mo nisi. Peitaʻi o ō latou ola ua na o ni ola e faatapulaa; e lē umi lava pe mulimuli ane a e feoti. A e peitaʻi, o Iesu Keriso sa avea o se tagata lelei atoatoa e i ai lana aiā i le ola. Sa ia leʻi fesagaʻi ma se oti tuufaasolo e pei ona sa i ai ma o loo i ai le fanau uma a tagata; e lē mafai foʻi e se ona aveesea faamalosi le ola o Iesu e aunoa ma lana faatagana. (Ioane 10:18; Eperu 7:26) Manatua ana upu: “Fa te oe ea ou te le mafai ona aioi atu nei i loʻu Tamā, ona aauina mai ai lea e ia ia te au o agelu e sili ona toatele i lekeona e sefulu ma le lua?”—Mataio 26:53; Ioane 10:17, 18.

¹³ E mafai foʻi ona tatou talisapaia atili le alofa o loo aafia i le mea na faia e Iesu e ala lea i le vaai atu i nei taualumaga o loo mulimuli mai ai: Na ia tuua se nofoaga mamalu, na avea ai o ia o se mea faiola agaga i le lagi i le mea na ia nofo ai, e avea o se aumea vavalalata ma se tagata faigaluega a le Silisili i le vateatea ma le Tupu o le vavau. A e ona o le alofa lē manatu faapito, na faia ai lava e Iesu e pei ona taʻu mai e le aposetolo o Paulo ia i tatou: “O ia sa uiga faatasi ma le Atua, e lei manatu o ia o se mea faoa ina ia tusa lava ia ma le Atua; a ua faamaulalo e ia ia te ia, ua uiga o ia faatasi ma le pologa, ina ua faia o ia faapei o se tagata: na iloa foi o ia ua tino mai i le tagata, ua faamaulalo e ia ia te ia, ua na anaana ua oo ina maliu, o le maliu lea i le satauro.”—Filipi 2:6-8.

14. Na faapefea ona molimau le perofeta o Isaia i le faailoaga aupito sili o le alofa o Iesu?

¹⁴ Pe sa lē o se faailoaga ea lena o le alofa? E matuā mautinoa lava sa o lea—ua na o lea e pito atu i le alofa o Ieova le Atua, lona Tamā faalelagi. O upu faavaloaga i le Isaia 53 o loo molimau tino i mea uma na tumau ai Iesu: “ua inosia ma tuulafoaiina o ia e tagata; o le tagata faanoanoa, ua masani foi ma le tiga; . . . E moni, ua na tauave o tatou tiga, ma na tauave o tatou faanoanoa; a ua tatou manatu o ia ua taia, ua fasia e le Atua, ma ua faatigaina. A ua manua o ia ona o a tatou solitulafono, ua momomo o ia ona o a tatou amio leaga; . . . o ona faalavalava foi ua malolo ai tatou . . . ua ia sasaa atu o lona ola ia oti.”—Isaia 53:3-5,12.

15, 16. E faapea sa o se faataulagaina lenei mo Iesu, i iloa i ā ana upu?

¹⁵ Ona o mea uma na fusia faatasi ma lona maliu, na tatalo ai Iesu i le faatoaga o Ketesemane: “Lou Tamā e, afai e mafai, ia ave ese lenei ipu ia te aʻu; a e aua le faia loʻu loto, a o lou finagalo. (Mataio 26:39) O le ā le mea na fesili atu ai Iesu ina o ia fai atu na upu? Sa ia manao ea e ole atu ina ia lē avea o ia ma “Tamai mamoe a le Atua, na te aveese le agasala a le lalolagi.”? (Ioane 1:29) E mautinoa lava e lē o le uiga lena, auā i mea uma lava talu mai na taʻu atu e Iesu i ona soʻo faapea o le a tigaina o ia ma maliu, na oo lava i lona faailoa atu o le ituaiga o maliu o le a ia maliu ai. (Mataio 16:21; Ioane 3:14) O lea atonu na i ai se isi mea i le finagalo o Iesu ina o ia tatalo faapena.

¹⁶ Ma le mautinoa lava sa manatu mamafa Iesu i tuuaiga faatatau i upu leaga na ia silafia o le a lafo atu ia te ia, o se solitulafono aupito sili ona leaga atonu e mafai ona molia ai se Iutaia. Ai se ā se manatu mamafa ai i se tuuaiga sese? Auā o lona maliu i lalo o lena tulaga o le a faalumaina ai lona Tamā faalelagi. Ioe, le Alo lē ponā o le Atua, o lē alofa i le amiotonu ma inoino i le amioletonu o lē na afio mai i le lalolagi e faapaiaina le suafa o lona Tamā, lea o le a fasiotia e tagata lava o le Atua ona e faapea ua ia upu leaga ia Ieova le Atua.—Eperu 1:9; Ioane 17:4.

17. Ai se ā na faamaonia ai o se mea mataʻutia mo Iesu lea ituaiga o maliu na fesagaʻi ma ia?

¹⁷ Muamua lava i lana faiva na taʻua ai e Iesu: “O loʻu papatisoga o le a papatisoina ai aʻu; ua ou matuā tiga lava seia faaiuina.” (Luka 12:50) O lena, le taualuga o lenei papatisoga. E faamaonia ai le avea o lona afu o ni matāua o le toto ina o ia tatalo. (Luka 22:44) E lē gata foʻi i lea, sa i ai se avega mamafatū sa i luga o ona tauʻau i lena po, o se avega e lē tāea e lo tatou tomai. Sa ia silafia lelei lava e tatau ona ia faamaonia lona faamaoni auā afai e lē taulau o ia, pagā se sii ta i fofoga o Ieova! O le a faapea mai ai loa Satani e saʻo ia ae sese Ieova le Atua. Peitaʻi o se po i mata o Satani le Tiapolo auā na faamaonia le faamaoni o Iesu seʻi oo i lona maliu! O le mea lea ua faamaonia ai lava Satani o le autū, ma o le matuā pepelo aʻiaʻi.—Faataoto 27:11.

18. Ai se ā na i ai Iesu i lalo o se mea faigata i lena po?

¹⁸ Sa ia Ieova sea talitonuga i le faamaoni aʻiaʻi o lona Alo o lea na ia valoia ai faapea o le a faamaonia lava le faamaoni o Iesu. (Isaia 53:9-12) Ioe, na silafia foʻi e Iesu faapea o le avega o le tausia o le faamaoni sa i ona luga. E mafai ona ia solomuli. E mafai foʻi ona ia agasala. (Luka 12:50) O lona lava ola e faavavau faapea ma le fanau atoa faaletagata na fua lelei i se tulaga paleni i lena po. Pagā se mea faigata semanū e i ai! Ana fai e faavaivai ma agasala Iesu, atonu o le a lē mafai ona ia valaau atu ma le alofa tunoa e faavae i se isi taulaga, e pei ona mafaia e i tatou o ni meafaiola lē lelei atoatoa ona faia.

19. O le ā na faataunuu e Iesu i lona ala lē manatu faapito?

¹⁹ E moni lava, o le tumau o Iesu ia Nisani 14, 33 T.A., o se faailoaga sili o le lē manatu faapito o le alofa e leʻi faapea ona faia e se tagata, e faaluaina ai le na faia e na o Ieova le Atua. Ma maeu le ofoofogia o mea na ia faatinoina mo i tatou i lona maliu! E ala i lona maliu na avea ai o ia o le “Tamai mamoe a le Atua, na te aveesea le agasala a le lalolagi.” (Ioane 1:29) Na ia tatalaina le ala mo le 144,000 ona soʻo mulimulitaʻi i ona tulaga aao e avea ai ma tupu ma ositaulaga e pule faatasi ma ia mo le afe o tausaga. (Faaaliga 20:4, 6) E faaopoopo atu i ai, o le “motu o tagata e toatele” o “isi mamoe” i aso nei o loo maua aogā mai le taulaga togiola a Keriso ma mafai ona faamoemoe ai e faasaoina mai le iʻuga o lenei faiga o mea. O i latou nei o le a muaʻi olioli i faamanuiaga o se parataiso faalelalolagi. O le a leai foʻi se masalomia o le faitau piliona o le fanau a tagata o ē o le a toe faatutuina mai e avea o se iʻuga o le mea na faia e Iesu. O le a i ai foʻi le avanoa e olioli ai i latou i le ola e lē uma i le Parataiso faalelaloalgi. (Faaaliga 7:9-14; Ioane 10:16; 5:28, 29) E moni “o mea uma ua folafolaina e le Atua, ua ioe ia te ia,” e ala lea ia Iesu Keriso.—2 Korinito 1:20.

20. E tatau faapefea ona tatou tali atu i faailoaga aupito sili e lua o le alofa i le vaega a Ieova le Atua ma Iesu Keriso?

²⁰ E mautinoa lava ua sili atu ona fetaui lo tatou faaalia o le talisapaia mo mea uma na faia e Ieova le Atua ma Iesu Keriso ona o i tatou i le tuuina mai o nei faailoaga aupito sili o le alofa. Ua tatou aitalafu ia te i laua i lenei talisapaia, ma ina ia tatou maua moni aogā atoatoa, e tatau ai ona tatou faailoa lea talisapaia. I le mataupu o mulimuli mai o le a faaalia ai nisi o auala aupito sili e mafai ai ona tatou faia lenei mea.

E te Manatua?

◻ O a faailoaga o le alofa o le Atua ua mafai ona iloa e le fanau uma a tagata?

◻ E mafai faapefea ona tatou iloa na mafatia Ieova ina ua silasila mai ua mafatia lona Alo?

◻ Na faapefea ona ese le maliu o Iesu e fai ma sui o le fanau a tagata mai oti o isi atonu sa faataulagaina o latou ola?

◻ E tatau faapefea ona aafia i tatou i le alofa na faaalia ia i tatou e Ieova ma Iesu?