Fesili Mai le Au Faitau

◼ Pe a sainia e se tasi se Faalauiloaga o se Tautoga o le Faamaoni, pe mafai ona faamutaina lea fuafuaga?

O le fesili e o faatasi ma se sauniuniga ua lē faatatauina i le tele o atunuu. O lea seʻi o tatou muaʻi tilofaʻia po o le ā lea fuafuaga o se tautoga lē tumau.

Sa talanoaina i le Watchtower o Mati 15, 1977, se faafitauli o loo tupu i nisi o atunuu. E ui lava ua faataga e le Atua tatalaga faaipoipoga i pogai faale-Tusi Paia, a e ua lē i ai i nisi malo ni fuafuaga o talaga faaipoipoga. (Mataio 19:9) Pe e matuā faigata tele foʻi ona faia e le tulafono se tatalaga faaipoipoga, atonu pe manaomia ai ni tausaga se tele. Ona o lea, sa faamalamalama mai ai e le mataupu o lea mekasini faapea ua i ai i Molimau a Ieova se faatagana e faatatauina ai i na o ia lava atunuu: e aofia ai se Faalauiloaga o se Tautoga o le Faamaoni. Manatu i se faaaʻoaʻoga o le fuafuaga:

Ua oo ina maua e se fafine le poto o le upu moni faa-Kerisiano a o nonofo (pe atonu ua i ai foi se fanau) ma se tamaloa o lē ua leva ona teteʻa ma lana avā faaletulafono. Ua faamaoni i ai le fafine fou fiafia i le tamaloa ma ua manao ia la faaipoipo, peitaʻi e faigata lea tulaga auā e lē faatagaina e le tulafono le tamaloa e tatala le faaipoipoga mai lana avā faaletulafono. Ona o lea, afai ua faamautinoaina e toeaina o le faapotopotoga o le faiā a le fafine ma lenei tamaloa o le a taliaina e le Atua, o le a latou faatagaina la o ia ina ia sainia se Faalauiloaga o se Tautoga o le Faamaoni. I totonu o lena sainiga na te taʻua ai faapea ua ia faia mea uma na te mafaia e faatulafonoina ai lenei faiā; ua ia faailoa atu i luma o le Atua le noataga tumau o le Faalauiloaga, ma ua ia taʻutino e faaipoipo faaletulafono i le vave e mafai ai, o lea ua faaiʻuina ai le Faalauiloaga faapea ua mafai nei ona avea o ia o se vaega o le faapotopotoga Kerisiano.

A e ui lava i lea, ua mapuna aʻe le fesili: Pe afai e sau ia lea (po o so o se isi lava o i lea tulaga) i totonu o le faapotopotoga i lalo o lea Faalauiloaga, pe toe i ai la se isi auala e muta ai pe mafai ai ona faamuta?

O le Tautinoga lava ia ua taʻu mai ai faapea ‘ua iloaina e lē o sainia o lana lava faiā ua pei o e noataga mau i luma o Ieova le Atua ma luma o tagata uma, e tatau ona tausia ma faamamaluina i le loto atoatoa faatasi ma mataupu silisili o le Afioga a le Atua. ‘O lenei la, ua i ai i le vaaiga a le faapotopotoga, e pei o se noataga mamā o se faaipoipoga faaletulafono. Peitaʻi ane, o le maliu o se paaga e faamuta ai a lē o le faaipoipoga po o se faatasiga i lalo o sea Faalauiloaga. (Roma 7:2) Ua faapea mai foʻi le Tusi Paia pe afai ua agasala se isi o le paaga faaipoipo, i le por·neiʹa (amioga lē mamā faaleituaiga i fafo atu o le faatasiga), ona mafai lea e le paaga o loo mamā ona faia se talaga faaipoipoga. (Mataio 5:32; 19:9) E tutusa lelei lava i lalo o se Faalauiloaga o se Tautoga o le Faamaoni, o le amio lē mamā a se paaga e mafai ona avea ma faavae mo le faaiʻuina o le faatasiga, pe afai ua filifilia faapea e lē o loo mamā. O le a tatau i le Kerisiano o loo mamā ona faamautūina ma le au toeaina le faamaoniga o le lē faamaoni. O le a faamutaina ai la e lenei mea le Tautinoga; ma pe a mavae lea o le a saʻoloto loa faale-Tusi Paia lē o loo mamā.

I le iloa faapea o loo talanoaina e le faapotopotoga le Faalauiloaga o se Tautoga o le Faamaoni e avea o se noataga mamā tau amio e pei o se faaipoipoga faaletulafono, ua mapuna aʻe ai se mataupu e fesootaʻi foʻi i ai. E tupu mai lenei mataupu ina ua aveesea le toʻatuga tau faaipoipoga lea na seʻi faatoa mavae atu. Mose faataʻitaʻiga, i le faaaʻoaʻoga o i luga, atonu ua maliu le avā faaletulafono a le tamaloa pe ua tatala foʻi faaletulafono e le malo le faaipoipoga, ma ua ia filifili ai nei e faaipoipo atu faaletulafono i le fafine Kerisiano. I lea tulaga e lē mafai e le tuafafine ona toe faaauaua le i ai i lalo o le Faaalauiloaga o se Tautoga o le Faamaoni, e tusa lava po o mafuaaga e pei o le matamuli e faaipoipo faaletulafono loa nei pe ona o le a ia lē toe maua ai nsi o faamanuiaga faaletino. Ina ia tusa ai ma lana Tautinoga, ua ao nei ona ia faia ni laasaga ina ia faatulafonoina le la faatasiga. A lē faia faapea, o le a faaleaogāina la e le faapotopotoga le Tautinoga, ma o le a tatau ai ia te ia ona vavae ese mai le tamaloa po o le faateʻaina o ia [tuafafine].

A e faapefea la, pe afai e musu le tagata lē talitonu e faaipoipo i le tuafafine? Ina ua ia saunia le Tautinoga, ua manatu ai le faapotopotoga i le faatasiga o se noataga ma e mamā. O lea mea moni ua lē avea lona lē mafaia ona faatulafono le la faatasiga ma tulaga o le a lē faapea ai ua mamā nei lea faatasiga. O lea e mafai lava ona faaauau pea e avea o se paaga faamaoni, e lē manaomia ona tau vavae ese mai i le paaga lē talitonu, e ui lava e tatau ona ia maumaututū i ana taumafaiga agaʻi atu i le avea o le faatasiga ina ia faaletulafonoina. (Ua faasaʻoina e le mea lenei le faamatalaga i le “Fesili Mai le Aufaitau” o Novema 1, 1985)—Faatusatusa le Faamasino 11:35; Luka 18:1-5.

O le mea moni, e ese le tulaga pe afai ua sainia e itu uma e lua le Faalauiloaga ma avea ma Kerisiano papatisoina. I lenei tulaga, ua tuuina atu ai ma le maumauaʻi e i laua uma lava i laua e ulufale atu i se faaipoipoga faatulafonoina ina ua aveesea toʻatugā faalemalo, lea sa faasino atu e ona faamuta ai le Faalauiloaga. Ua faatagaina ai nei i laua ia faia lenei mea i se taimi vave, a lē o lea ia nonofo eseese ina ia tumau ai i totonu o le faapotopotoga. (Faatusatusa le “Fesili Mai le Aufaitau” i le Watchtower o Setema 1, 1982.) Afai o le a nonofo eseese i laua, e faaaogāina pea le Faalauiloaga o le noataga mamā, o lea la e lē saʻoloto ai se isi o i laua e ulufale atu i se faatasiga ma se isi tagata.—Faatusatusa le 1 Korinito 7:10,11.

E ui lava e lē faaaogāina i le tele o nofoaiga le fuafuaga lea o le Faalauiloaga o se Tautinoga o le Faamoni, a e o le talanoaga ua i luga ua faaautū i le tulaga faale-Tusi Paia o loo faaaogā i so o se mea: “Ia lelei le faiavā i tagata uma, o le moega foi ia leai sona leaga; e faasalaina e le Atua o e faitaaga ma e mulilua.”—Eperu 13:4.