Lipoti a Ē Faalauiloa le Malo

O se Toe Faatasiga Fiafia i Pasili

Mai i le 67 o misionare na aʻoaʻoina i Kiliata o loo auauna nei i Pasili (Brazil) o le toʻa 63 na faapotopoto faatasi i le ofisa o le lālā ma faatulaga lelei mai ai i inā mo lenei ata faatalatuufaasolo. Na faia lenei toe faatasiga fiafia ia Novema 18, 1986, i le taimi o le asiasiga a A. D. Schroeder, o le sui o le Vaega Pule o Molimau a Ieova i Brooklyn i Niu Ioka.

Ua 41 nei tausaga ua mavae i le aso—17 o Novema, 1945—talu ona ō mai i Pasili le toalua lea na faauuina o le uluai vasega a le Watchtower Bible School of Gilead. O le tasi o i laua o Charles Leathco (i le itu tulimau tauagavale o le laina ogatotonu) o se toe faatasiga faapitoa lenei auā sa la vasega faatasi ma le o asiasi atu o Charlotte Scroeder i Kiliata, ma o le uso o Schroeder sa avea o se tasi o ō latou faiaoga.

Talu mai lena uluai vasega, e 258 le aofai o misionare na ō mai i Pasili. Na faatasi ai ma i latou na le toʻa 16 o tagata a nuu o Pasili. O le tasi o i latou o Augusto Machado (i le tauagavale i luma) na ia aʻoaʻoina le upu moni mai se uluai misionare, na alu i Kiliata ma toe foi atu i Pasili. Sa auauna o ia i le ofisa o le lālā mo le 30 tausaga, ma ua avea nei o ia o le taitai o Komiti o Lālā. E ui lava o le toatele o misionare ua le o toe auauna i le auaunaga faamisionare, a e o loo tumau pea galuega lelei na latou faia. I le 1945, sa na o le 344 le aʻu talaʻi o le Malo i lena atunuu; a e ua ausia nei la e Pasili le maka e 200,000, ua lipotia mai ai se tumutumuga e 201, 226 le aʻu talaʻi ia Fepuari 1987.

Maeu se olioli mo misionare i Pasili, o e mātutua ma e talavou, e toe faamanatu ai i lenei faatasiga fiafia e uiga i gaoioiga ofoofogia uma i tausaga e 41 ua mavae.