Fesili Mai le Au Faitau
◼ O le ā le “fanau a le Atua” lea e taʻua mai i le Malaki 2:15 [NW]?
Ua faitauina lenei fuaiupu lavelave i se vaega e faapea: “Ma sa i ai foi lē na te leʻi faia lea mea, ona sa ia te ia le toe o le agaga. O le ā foi ua ia sailia? O le fanau a le Atua.” E mautinoa lava o loo faasino le “fanau” i le nuu o Isaraelu anamua, o le sa i ai i tulaga matautia i aafiaga faalotu i le taimi lea na tusia ai le fuaitau.
Sa vavalo Malaki i totonu o se vaitaimi sili ona leaga tau amio a le nuu. O nisi o tane Isaraelu na le gata ina latou ‘faiavā i afafine o atua ese’ a e na latou faateʻa foi ia latou avā Isaraelu na muai fai, ‘a o taulelea’ ina ia faia ni avā atonu i ni fafine talavou faapaupau. A e peitai, e lē o tane uma o Isaraelu sa faia lenei “mea e inosia” (Malaki 2:11, 13, 14; Teuteronome 7:3, 4) E mautinoa lava, i le faasino atu i tagata taitoatasi o ē na teena le toe tatalaina o a latou feagaiga tau faaipoipoga ma sē e tapuai ia Ieova, na tusi ai faapenei Malaki: “Ma sa i a foi lē na te leʻi faia lea mea, ona sa ia te ia le toe o le agaga.”
O le “agaga,” o le agaga paia o le Atua, lea sa ia liligi ifo i luga ole nuu. E ui lava i lea, sa teena e na Isaraelu lē usiusitai, ma i lea na latou faatigaina ai lea agaga. (Isaia 63:10; Galuega 7:51-53; faatusatusa le Efeso 4:30) Sa faamaoni nisi Isaraelu taitoatasi i tulafono a le Atua, ma e ala i lo laotu usiusitai na latou teu ai i o latou mafaufau mea na “toe o le agaga.” Sa leʻi sailia e nei tagata tapuai ni o latou lav afiafiaga manatu faapito. O i latou ia na sa tusi faatatau i ai Malaki e pei ona ia tusia: “O leā foi ua ia sailia? O le fanau a le Atua.” O lenei “fanau” o le nuu lea o Isaraelu anamua, lea sa taʻua e Malaki faapea, ‘na foafoaina e le Atua.’ Sa tupu lenei ‘foafoaga’ ina ua aumaia e Ieova le fanauga a Isaraelu i se fegaiga ma ia i le Mauga o Sinai, ma avea ai i latou ma ana “oloa tāua” ma “nuu paia.” Ma o le “fanau” moni lava la a Aperaamo lea o le a faamanuiaina ai le lalolagi uma, sa tatau ona auala mai i lenei nuu.—Malaki 2:10; Esoto 19:5, 6; Kenese 22:18.
A e peitai, sa tatau ia Isaraelu ona latou tausia pea lo latou mamā faaletapuaiga, i lo latou lē faaipoipo atu i tagata o nuu ese, o ē sa lē tapuai ia Ieova. O uiga lē faaleatua o na tagata sa ono faaumatia ia, e pei ona matauina mai i le tulaga i taimi o Esera. A e mo Isaraelu, sa “latou fai avā i o latou afafine (o nuu ese latou te tuaoi) o i latou atoa ma o latou atalii, ma ua (oo ina) fefiloi le fanau paia ma tagata o ia nuu.” (Esera 9:2) O lenei foi lava “mea leaga tele” sa tupu i aso o Neemia, ua tulaga tutusa lava ma taimi o Malaki. Sa iloa manino e tagata Isaraelu, o ē na faamaoni i le Atua, le matautia faaleagaga mo i latou, atoa ma ni fanau o ē na tupuga mai i lea sootaga. Sa i ai se matautia o le toe see ese mai le tapuaiga a Ieova, ona o se avā e le tuutoina atu ia te Ia. Sa oo foi ina faaalia e Neemia e faapea, mai i na Isaraelu o ē na faaipoipo atu i tagata ese, e ‘aunoa ma se tasi o a latou fanau na iloa ona tautala i le gagana Iutaia.’—Neemia 13:23-27
Na sailia e Iutaia lē faamaoni o latou lava fiafiaga, e aunoa ma se manatu mamafa i le tulaga e aumaia ai aafiaga leaga tau tapuaiga i luga o lo latou nuu, “le fanau a le Atua.” E lē tioa ona apoapoai mai Malaki: “Ia faaeteete outou i o outou loto, ina neʻi faaʻoleʻole se tasi i lana avā na fai a o taulealea.” (Malaki 2:15, NW) Sa leoleoina e tane faamaoni o Isaraelu o latou agaga, po o ō latou uiga i amio, ina ia nonofo ai ma le faamaoni ma a latou avā Isaraelu. O nei tane, sa latou faatāuaina tele le mamā faaletapuaiga o lo latou “nuu paia.” Sa latou naunau ina ia iloa e a latou fanau ona faitau le Afioga a le Atua, ma ia tuputpupu aʻe e alolofa ia Ieova, e lagolagosua atu ai i le malosi faaletapuaiga o le nuu.
E faapena foi la mo Kerisiano tuuina tu i aso nei, ona manaomia le faaalia o lea lava naunautaʻi i o latou agaga, po o uiga autū. Afai ua faaipoipo, e manaomia la ona alofia e nei tagata taitoʻatasi le toe faateteʻaina ma le faaʻoleʻole i a latou paaga. Ma e ao foi i se Kerisiano o loo nofo fua, ona ia utagia le fautuaga a le aposetolo o Paulo ina ia faaipoipo atu “tau lava i lē ua i le Alii,” i le ulu atu lea i le noataga o le faaipoipoga, ma se isi lava molimau ua tuuina atu ma papatisoina a Ieova.—1 Korinito 7:39.