O le Soifuaga o Iesu ma Lana Faiva

O Ai Moni Lava Iesu?

INA ua lata atu le vaa o loo o atu ai Iesu ma ona soʻo i Petesaita, ona aumai lea e tagata ia te ia se tauaso ma ole atu ina ia paʻi atu i le tamaloa ma faamalōlō i ai. Ona taʻitaʻi lea e Iesu le tamaloa i tua o le aai, na ina ua uma ona feanu i ona mata ona fesili atu lea i le tauaso: ‘Pe ua e iloa atu se mea?’

Ua tali le tamaloa: “Ua ou iloa atu tagata ua faaapei o laau, o loo savavali.” I le faaee atu o aao o Iesu i mata o le tamaloa, ua ia toe faalelei ai lana vaai ina ia manino lelei lava pupula. Ona auina loa lea o ia e Iesu i lona aiga ma faatonu ia i ina ia aua neʻi ulu atu i totonu o le aai.

Ua o atu nei Iesu ma ona soo i le nuu o Kaisaraia Filipo, i le itu i matū mamao o Palesitina. O se malaga umi na alu ai le 30 maila i le nofoaga matagofie o Kaisaraia Filipo, pe ā ma le 1,150 futu i luga aʻe o le fogatai. O se malaga pe tusa ma le lua aso.

A o ō atu i le ala, ua maliu ese ai Iesu na o ia e tatalo. O le taimi lea pe toe iva pe sufulu masina o totoe a o leʻi maliu o ia, ma ua manatu mamafa ai i ona soʻo. Ua toatele isi ua toe faaamaamulu mai le mulimuli atu ia te ia. O nisi ua manino lava le lē mautonu, ma e lē malilie ona o lona teena o taumafaiga a tagata ina ia avea o ia ma tupu, ma lona lē saunia foi o se faailoga mai le lagi e faamaonia ai lona tulaga tautupu, ina ua luʻia e ona fili. O le ā ua talitonu ia i ona soʻo e uiga i le iloa tinoina o ia? Ina ua latou o mai i le mea o tatalo ai, ua fesili atu Iesu: “Pe se a le upu a tagata ia te au nei, po o ai?”

O le upu a isi, o oe o Ioane le papatiso,” ua latou tali mai ai, “a o isi, o Elia, a o isi, o Ieremia, po o se tasi o le au perofeta.” Ioe, sa latou manatu o Iesu o se tasi o nei tagata, ua toe faatuina mai le oti!

“A o outou, pe se a la outou upu ia te au, po o ai?” ua fesili ai Iesu.

Ua oso vave atu Peteru: “O oe o le Keriso, o le Alo o le Atua soifua.”

Ina ua maeʻa oan faamalamalama atu le faamaoniga o le tali a Peteru, ona fetalai atu lea o Iesu: “Ou te fai atu nei aʻu ia te oe, O Peteru oe, ou te ati ae foi laʻu ekalesia i luga o lenei papa, e le mafaia foi e faitotota o seoli ona manumalo i ai.” O i inei la ua uluai faasilasila ai e Iesu faapea, o le a oo lava i le oti e na te lē mafaia ona saisaitia ai ona sui, pe a uma a latou auaunaga faamaoni i luga o le lalolagi. Ona ia fetalai lea ia Peteru: “Ou te avatu foi ia te oe ki o le malo o le lagi!.”

O lea, ua faalia ai e Iesu le mauaina e Peteru o ni faaeaga faapitoa. Ae lē faapea ua tuuina i ai se tulaga e sili ai i lo isi aposetolo, e leʻi avea foi o ia ma faavae o le faapotopotoga. O Iesu lava ia, o le Papa lea o le a atiina aʻe ai le faapotopotoga. A e o Peteru, ua tuu atu i ai ki e tolu e tatala ai, e pei ona i ai i lena taimi, o le avanoa mo ni vaega o tagata ina ia ulu atu ai i le Malo o le lagi.

Na faaaogā e Peteru le uluai ki i le Penetekoso 33 T.A. ina ua taʻu atu ia Iutaia ua salamō, le mea e ao ona fai mo lo latou faasaoina. E leʻi umi, a e ona faaaogā le ki lona lua, a o ia tatala le avanoa mo tagata talitonu Samaria, e ulu ai i le Malo o le Atua. Ona oo lea i le 36 T.A sa ia faaaogā ai le ki lona tolu, e ala i le tatalaina atu o le avanoa lava lea i tagata o Nuu ese lē peritomeina, o Konelio m ana uo.

Ua faaauau le talanoaga a Iesu ma ona aposetolo. Ua ia faatiga i latou i le taʻu atu i ai, o puapuaga ma le oti ua lē o toe mamao se taimi ona ia fesagaʻi ai lea i Ierusalema. Ona o le lē malamalama faapea o le a toetu aʻe Iesu mo le ola faalelagi, ua taʻitaʻi ese ai e Peteru Iesu. Ua ia fai atu: “Le Alii e, ia mamao ia te oe lea mea; e le oo lena mea ia te oe.” Ua faliu i tua Iesu ma tali atu i ai: “Satani e, ina alu ia oe i oʻu tua, ua fai oe ma mea ou te tausuai ai; auā e le o mea a le Atua ua e loto i ai, a o mea a tagata.”

E manino lava, o loo i ai nisi e ese mai le au aposetolo, o loo faimalaga faatasi ma Iesu, o lea ua ia faamalmalama loa i ai faapea, o le a lē faigofie ona avea se tasi mona soʻo. “Ai se tasi e fia mulimuli mai ia te aʻu,” ua fetalai ai, “ʻaua neʻi usiusitai o ia ia te ia, a ia ave e ia lona satauro, i le mulimuli mai ai ia te aʻu. Auā ai se fia faasaogalemuina lona ola, e māumau ai ia te ia; a o le faamāumau lona ola ona o aʻu ma le tala lelei, e faasaoina e ia.”

Ioe, e ao i soʻo o Iesu ona loto tetele ma ia faataulagaina i latou, pe afai o le a faamaonia le onomea mo lona finagalo malie, e pei ona ia fetalai: “Auā ai sē mā ia te aʻu ma aʻu upu i lenei tupulaga mulilulua ma le agassala, e mā foi le Atalii o le tagata ia te ia, pe a sau o ia faatasi ma ana agelu paia i le mamalu o lona Tamā.” Mareko 8:22-38; Mataio 16:13-28; Luka 9:18-27.

◆ Ai se ā ua manatu mamafa ai Iesu i ona soʻo?

◆ O ā ni manatu o loo iai i tagata e uiga i le iloa tinoina o Iesu?

◆ O ā ki na tuuina atu ia Peteru, ma sa faapefea ona faaaogā?

◆ O le ā le faasaʻoga na maua e Peteru, ma ai se ā?