Au Faievagelia—Faia le Seleselega i le Lalolagi Aoao

“A o taamilo atu le vae o le uati ia Amaketo, ua faaateleaʻi atu foi e Molimau a Ieova a latou gaoioiga, ina ia mafai ai ona maua uma le toatele o i tatou latou te mafaia ina ia faasaoina mai lena faaumatiaga mataʻutia.”—O se tusi lena i le faatonu a Ian Boyne i le “The Sunday Gleaner,” Mati 15, 1987, Kingston, Jamaica.

E SAʻO lelei lava le tusi i le faatonu o loo siitia i luga. Ua talitonu Molimau a Ieova faapea, o Amaketo ua lata tele mai, o le a faaumatia ai e le Atua o ē amio leaga, ma i lea, ua ola nei le fanau a tagata i se taimi o le faamasinoga tauatua. (Faaaliga 14:6, 7) O lea, ua i a se manaoga mo tagata ina ia latou utagia ai le feau a le tala lelei. O Iesu Keriso, o le faievagelia sili faaletagata sa leʻi faapea ona i ai muamua, na ia faagaoioia se faalapotopotoga e folafola atu ai le tala lelei “i tuluiga o le lalolagi” i le uluai senituri. (Galuega 1:8, The New English Bible; Kolose 1:23) Na ia valoia foi se galuega faaevagelia faapena i o tatou aso. (Mataio 24:14) O le faalapotopotoga o latou faia nei faapena, o loo faia aʻe i Molimau a Ieova, o ē o loo talaiʻina le tala lelei o le Malo o le Atua ma le faanatinati i atu nuu ma oganuu e 210.

O lea la, o Molimau a Ieova e sili atu na i lo na ona avea o se faalapotopotoga e talaʻi. O i latou foi o e faalapotopotoga e aʻoaʻo atu. Na tofia e Iesu ona soʻo ina i a ō atu “e fai nuu uma lava ma soo, . . . aʻoaʻo atu ia te i latou ia tausi i mea uma ua oau fai atu ai ia te i latou ia tausi i mea uma ua ou fai atu ai ia te outou.” (Mataio 28:19, 20) Matou te fiafia e faafeiloai atu outou i nisi o tagata, o ē na latou maua ni aogā mai la latou galuega talaʻi ma aʻoaʻo atu.

Mekisikō

Ia feiloai mai ia Virginia. Ua 110 ona tausaga ma e manao o ia e taʻu atu ia te outou faapea, “e lē taitai ona tuai le sau ina ia iloa Ieova ma auauna ia te ia.” A o avea o ia o se teine talavou, sa tuutoina atu o ia i lea, mo le fa tausaga sa ofu ai i se ofu faapitoa faalotu. “A e sa i ai se mea na misia,” ua fai mai ai o ia. Sa leai se mea na mafai ai ona ia maua mai ni tali faamalie loto i ana fesili faale-Tusi Paia. Mo se faaaʻoaʻoga, ina ua ia fesili i faiaʻoga i lana lotu, “O ai le suafa o le Atua?” na latou tali mai, “O le suafa o le Atua o le Atua.”

A e i le 1983 na suia ai tulaga o mea, ina ua amata e le afafine o lana tama ona suʻesuʻe le Tusia Paia ma Molimau a Ieova. Na tali e le afafine o lana tama fesili a Virginia i lona faapea atu o le suafa o le Atua o Ieova. (Salamo 83:18) Na uunaʻia e lenei mea Virginia ina ia faia sana lava suʻesuʻega faale-Tusi Paia ma Molimau. I le lua tausaga mulimuli ane, ia Iuni 2, 1985, na papatisoina ai loa o ia i le 108 o ona tausaga.

“Ou te manatua lena aso ma le fiafia,” ua fai mai ai o ia, “auā i lena aso na amata ai ona ou ola. E tusa ai ma oʻu tausaga, ou te talaʻi ai mo le lima i le ono itula i le masina, ma ou te faaaogā se tootoo e fesoasoani i laʻu savali. E sili ia te aʻu le savali na i lo o le alu i le taavale. Ou te matuā malosi ai i le faaletino i lenei auala.”

Initia

“Sa o aʻu o se tagata sauā ma le soonafai e leai se aogā i le aai,” ua fai mai ai se tamaloa o lē sa avea o se pagota ona o le tele o ana solitulafono. “Ou te aumaia faananā vailaau faasaina, pele tupe, ma ulaula fua i sikaleti sa aumaia faalilolilo e tagata na o mai e saili laʻu fesoasoani. Sa fai foi ma aʻu masani le inu ʻava malosi—ou te faia nei mea uma, e ui lava o mea moni sa avea aʻu o se tagata lotu tiotio.” A e peitaʻi, ina ua asiasi atu se tasi o Molimau a Ieova i lona fale, sa amata loa ona ia suʻesuʻe le Tusi Paia ma faatatauina ana fautuaga, ma suia ai loa lona olaga. (Faataoto 2:1-22; 2 Timoteo 3:16) Nei la, ua fesoasoani atu nei o ia, lana avā ma ona afafine e toalua i isi ina ia saoloto mai nei uiga leaga.

Peleseuma

Sa matuā tupu tele le ita o se ulugalii talavou i le Atua. Ai se ā? Ona o la laua tama muamua lava o se teine, na oti ina ua mavae le sefulu aso talu ona fanau. O la laua tama lona lua na fanau mai e pipili. Ma o lona tolu, sa foliga mai e malosi ma lelei le soifua malōlōina, ae na faafuasei lava ona oti ina ua mavae le lima masina. Sa matuā lē talitonu le tinā faapea pe ua faapefea ona faatagaina e se Atua alofa nei mala uma e tutupu ia i latou, a e o le toatele lava o tagata amio leaga o loo i ai ni fanau malōlōina lelei.

Sa leʻi umia lava mulimuli ane, na talaʻi atu ai se Molimau a Ieova mai lea fale i lea fale i aiga tuaoi, ma na ia asiasi atu ai i le aiga o le fafine. A o talanoa atu le Molimau e uiga i folafolaga a le Atua e uiga i se lumanai fiafia mo le fanau a tagata, sa tetee le fafine e uiga i lea manatu i le i ai o se Atua faapea o se Tamā faalelagi alofa. (Salamo 37:10, 11) A e peitai, sa malie o ia e talia ni lomiga faale-Tusi Paia. Ina ua mavae ni nai asiasiga e lē aunoa a le Molimau, sa āuāu malie loa ona faamalūina e le feau a le Tusi Paia o le tala lelei, le loto o le fafine ma ua fausia aʻe ai lona mautinoa i le Atua. Nei la ua ia i laua uma ma lana tane se faamoemoe malosi faapea, o le a lē gata ina faamalōlō e Ieova la laua tama pipili i le lumanai i le lalolagi Parataiso, a e o le a Ia faatutūina mai foi le isi a laua fanau e toalua.—Ioane 5: 28, 29; Faaaliga 21:1-4.

Potukale

I le taeao o se tasi Aso Sa, na tu ai se fafine o loo ave se ato e tumu i lana faatauga e talanoa atu i se ulugalii faaipoipo. O le taimi muamua lea, ae lē o le taimi mulimuli foi lea na latou feiloa ai. O le ulugalii o ni Molimau a Ieova, ma sa ō atu i le galuega faaevagelia. Sa la faamalo atu i le fafine faatau ona o le vaaia lelei o manaoga o lona aiga i le itu faaletino. A e o ai, na la fesili atu ai, e mafai ona aumaia ni mea e manaomia e le fanau a tagata? Sa tali lava e i laua le fesili i le taʻu atu i le fafine faapea e mafai e le Atua. (Salamo 107:8, 9; Isaia 33:24) “E i ai sana vaifofō mo loʻu faafitauli?” sa tau manatu ai le fafine ma le leo tele. Na tali mautinoa atu i ai Molimau, ma sa valaaulia loa i laua i le fale o le fafine, o inā lava na amata ai se suʻesuʻega faale-Tusi Paia. Ua matauina e le tane suiga lelei i uiga o lana avā, sa ia auai atu loa i le suʻesuʻega faale-Tusi Paia ma i sina taimi puupupu lava, na faia ai loa foi e le tane ni suiga i auala o lona olaga.

Mulimuli ane, taʻu atu e le fafine i Molimau faapea, muamua a o leʻi talanoa atu ia i lau i le taeao o le Aso Sa lena, e faalua lava ona ia taumafai e pule i lona ola. Sa matuā lē fiafia o ia i lana tane ma sa la filifili ai loa o le a tatala la laua faaipoipoga. Nei la, ua aufaaatasi nei o ia, o lana tane, ma la laua fanau i le faia o se agaʻigaʻi i luma i le aʻoao lea e uiga i le tala lelei.

Taialani

Mo le tele o tausaga o lona olaga, sa faalavelaveina ai le olaga o lenei fafine e nofo i le vaega i mau o lenei atunuu e temoni. Ina ua ia feiloai atu ise Molimau a Ieova i le galuega faaevagelia, na ia maua ai ni lomiga faale-Tusi Paia, ma na ioe i le faia o se suʻesuʻega faale-Tusi Paia i lona fale. Ina ua uma masina e lua o le suʻesuʻega, sa ia talisapaia loa ni pogai faale Tusi Paia mo le lafoaiesea o mea uma mo tapuaiga sese mai lona fale, e pei o faatusa, ma faaumatia foi lona fale teu oa faagagaga na fausia e puipuia ai lona aiga mai agaga leaga. (Galuega 19:19; 1 Korinito 10:21; 1 Ioane 5:21) Ua lē toe osofaia nei o ia e temoni ma ua mafai ona uaʻi tasi atu i le fesoasoani atu i isi e aʻoaʻo e uiga i le Atua moni e toatasi o Ieova.

Kenya

Ina ua taʻu atu i se taʻitaʻi sauā o se kegi faapea, ua manatu tagata o ia ua matautia tele ma ua uma ona faatonuina leoleo ina ia fana o ia pe a vaaia, sa na ona ata sa lē popole i ai. A e peitai, e leʻi pine mulimuli ane, sa lē savali ai se tasi o lana kegi e tusa ma le fuafuaga. Na ia iloa ua na o ia nei, o loo siomia e tagata tetee ua faatumuina i le ita ma ua sauni o le fai ia i la latou lava iʻuga. I le taimi lava lena na oo mai ai leoleo ma laveai o ia, na latou aveese o ia, ma loka i le fale puipui e faatali ai lona faamasinoga.

Sa fautuaina o ia e lana loia ina ia faafiti i le tele o mea na molia ai o ia. A e peitai, a o ia ai o ia i totonu o le sela o le faalepuipui, sa ia manatua asiasiga na faia e Molimau a Ieova i tausaga ua mavae. Sa amata loa ona ia te ia se lagona faanoanoa ona o ona ala solitulafono ma na ia tatalo atu ai i le Atua mo se fesoasoani. O le mea moni, na ia tatalo atu i le suafa o Ieova (Faatusatusa le Galuega 10:1, 2) Na ofo le faamasinoga ina ua ioe lenei pagota i ona moliaga i le faamasinoga. O lea, na tuuina atu ai e le faamasino se faaiʻuga fuafua lelei ma e māmā foi; na i lo o le faasalaina i le oti, na faasalaina o ia i le sefulu tausaga i se fale puipui e malu puipuia.

A o nofo saisiatia, sa ia faitauina ma le maelega lomiga faale-Tusi Paia ma tatalo pea e lē aunoa i le Atua, ma ole atu i ai, afai e mafaia ia faapuupuuina ona tausaga i le fale puipui ina ia mafai ai ona ia auauna ia te Ia. Na faafuasei lava ona taʻu atu ia te ia faapea, ua tuu i lalo le tuliga o lona faasalaga i le ʻafa. O lea, ina ua mavae tausaga e lima o lona nofo saisaitia, na toe tatalaina o ia ma na amata loa ona suʻesuʻe le Tusi Paia ma Molimau a Ieova. E leʻi pine lava mulimuli ane, a e papatisoina loa o ia, ma nei la ua avea nei le galuega faaevagelia sauatoa ma ona sini.

O mea i luga ua na o ni nai faaaʻoaʻoga itiiti na i le pe o faapefea ona faataunuu e Molimau a Ieova o latou tofiga, ma le avega tauave e folafola atu ai le tala lelei i “tuluiga o le lalolagi.” Ua ma fai e nei mea tutupu ona faateleina i le faitau afe. O lea, e te lē ioe ea la faapea o Molimau a Ieova o le au faievagelia moni o aso nei?