Fesili Mai le Au Faitau

◼ Ai se ā e toaitiiti ai Molimau a Ieova e tagofia le areto ma le uaina i le faamanatuina faaletausaga o le Talisuaga Afiafi a le Alii?

Talu ai ona, pe a faatusatusa Molimau a Ieova i lotu Kerisinetoma, ua talia e Molimau a Ieova le aʻoaʻoga a le Tusi Paia faapea e toaitiili se aofaiga o tagata o le a maua le ola i le lagi a o isi uma auauna faamaoni a le Atua, o le a tauia i le ola e faavavau i le lalolagi.

Ua leva tausaga o aʻoaʻo e lotu faapea o le lagi o le taui lea mo i latou uma e faafiafia i le Atua: a o isi uma e ō i le afi i hele. A e ese le mea lea e fai mai ai le Tusi Paia. Ua faaalia manino e le Tusi Paia faapea e na o ni nai tagata, e pei o le au aposetolo o le a nofo tupu faatasi ma Keriso i le lagi. Na fetalai Iesu o i latou nei o le “lafu mamoe itiiti.” Fai mai le Tusi Paia, o lo latou faitau aofai e 144,000. (Luka 12:32, Faaaliga 14:3,4) O le toatele o i latou sa faamaoni i le auaunaga ia Ieova ma maua lana faamaoniga, na maliliu a o leʻi tatalaina e Iesu le auala mo le ola faalelagi. (Mataio 11:11; Eperu 10:19-21) Ma ina ua uma ona filifilia le “lafu mamoe itiiti,” e faitau miliona isi ua avea o ni Kerisiano moni. Mo i latou uma lava o ē faamaoni e lē i ai i le “lafu mamoe itiiti,” ua taofia e le Tusi Paia le faamoemoe mo i latou o le ola e lē uma i le parataiso toe faafoisia faalelalolagi. (Salamo 37:20, 21; Faaaliga 21:4, 5) A e ai se ā e lē tagofia ai foi e i latou na le areto ma le uaina? Na faaalia e Iesu faapea o le tagofia o faatusa i le taimi o le Talisuaga Afiafi a le Alii sa mo na o i latou ua valaaulia mo le ola i le lagi, i latou na e i le feagaiga fou.

O le mea moni, o le faatuatua i le taulaga a Iesu e tāua mo i latou uma o ē o le a maua le faamagaloga a le Atua ma le ola e faavavau, tusa pe ola i le lagi po o le lalolagi parataiso. Na faaalia e Keriso lenei mea i le Ioane 6:51-54: “O aʻu le areto ola na alu ifo mai le lagi; pe a ʻai se tasi i lenei areto ona ola ai lea o ia e faavavau. O le areto foi ou te avatua, o loʻu tino lea, ou te avatua ma ola o le lalolagi [le fanaua a tagata ua togiolaina]. . .O lē ʻai i loʻu tino ma inu i loʻu toto, ua ia te ia le ola e faavavau.”

Peitai e aogā ona matau faapea na fetalai atu e Iesu na upu i le sili atu na i lo o na o ona soʻo. I se aso mulimuli ane ina ua uma ona ia fafaga faavavega le faitau afe o tagata, na ō mai ai ia Iesu le motu o tagata i le nuu o Kapanaumi. Sa mafai e lenei motu o tagata ona faatalanoa o ia lea na aofia ai ana fetalaiga i le Ioane 6:51-54. O lea sa leʻi fetalai atu Iesu na o soʻo ina ua ia fetalai faapea o ia o le “areto ola na alu ifo mai le lagi” faafaatusa, lea e mafai ona saunia ai ni meaʻai e sili ona tumau e maua ai le ola na i lo o le manai lea sa ʻai i le vao.—Ioane 6:24-34.

I le talanoaina o lena mea na tupu i le vao anamua, seʻi manatu po o ai na ō mai mai Aikupito ma ō atu i le vao. O le ‘fanauga a Isaraelu o lo latou faitau aofai e ono selau afe tane malolosi sa savavali, e ese mai ai mai tamaiti, ma le anoanoai o isi tagata ese e toatele.’ (Esoto 12:37, 38; 16:13-18) O nei “tagata ese” na aofia ai ni tagata Aikupito o ē na faaipoipo atu i tagata Isaraelu ma isi tagata Aikupito o ē na lafoai atu a latou mea ia Isaraelu. Sa manaomia uma e tagata Isaraelu ma “tagata ese” le manai ina ia ola ai. E ui i lea, pe sa maua la e “tagata ese” faamanuiaga tutusa e pei o tagata Isaraelu? E leai, latou te leʻi maua. E ui lava sa mafai ona latou tapuai faatasi ma tagata Isaraelu, ma e mafai ona faamoemoe e ulu atu i le Nuu o le Folafolaga, a e lē mafai lava ona avea ai i latou ma tupu po o ni ositaulaga i lalo o le feagaiga o le Tulafono. O lea, o le ʻaina o le manai faaletino i le vao sa lē avatua ai i tagata uma le faamoemoe e tutusa.

O le eseesega lenei e tatau ona manatua a o e toe manatunatu i le fetalaiga a Iesu i ona soʻo pe tusa o le tausaga talu ona mavae lona fetalai i upu o loo taʻua i le Ioane 6:51-54. I lenei mea na tupu mulimuli ane, sa faamatala atu ai e Iesu se faiga fou e aofia ai le areto moni ma le uaina lea sa faatusaina i lona tino ma lona toto. A o ia faatuina le faamanatuina o le Talisuaga Afiafi a le Alii, na fetalai atu Iesu i ona soʻo vavalalata: “O lenei ipu o le feagaiga fou lea i loʻu toto, ua faamaligiina mo outou.” Na ia faaopoopo atu i lenei lava vaega toaitiiti o aposetolo: “O outou foi, ua outou tumau ia te au i oʻu tofotofoga. E faapei ona tofia mai e loʻu Tamā o le malo ia te au, e faapea foi ona ou tofia outou, ina ia outou aai ma inu i laʻu laoai i loʻu malo, ma ia nonofo i nofoālii, ma faamasino atu i itu aiga o Isaraelu e sefulu ma le lua.”—Luka 22:20, 28-30.

Ia matau mai nei fetalaiga mulimuli faapea, o i latou sa tatau ona aai i le areto moni ma inu i le uaina moni e fai ma faatusa o le tino ma le toto o Iesu, o le ʻau soʻo o i le “feagaiga fou.” O i latou foi na o le a i ai i le isi feagaiga, lea ua fai e Iesu ma i latou ina ia mafai ai ona latou auai i le pulega tautupu ‘i lona malo.’ E manino lava, sa faasino e Iesu i inei ia i latou o le a ‘faia le malo ma ositaulaga i lo tatou Atua, e pule o ni tupu i le lalolagi.’ (Faaaliga 5:10) I le uluai senituri, na amata ai e le Atua ona filifili le 144,000 o ē o le a auai i le Malo faalelagi. O Kerisiano i Korinito sa i ai i lena vaega, auā o i latou na ua faamatalaina e pei o ē ua “faapaiaina ia Keriso Iesu, ua valaauina e fai ma tagata paia.” (1 Korinito 1:2, faatusatusa le Roma 1:7; 8:15-17) O na “tagata paia” sa tatau ona latou auai i le Talisuaga Afiafi a le Alii, ia tagofia ma le talisapaia le areto faafaatusa faapea foi ma le uaina o lona uiga “o le feagaiaga fou lea i [lona] toto.”—1 Korinito 11:23-26.

I aso nei, o loo soifua pea se vaega totoe toaitiiti o i latou na o ē na filifilia e le Atua mo le ola faalelagi. Na o i latou na o ē o loo i le “feagaiga fou” ua i ai le aiā e tagofia ai faatusa, o le areto ma le uaina, i le faamanatuina faaletausaga o le Faamanatuga.

O le mea moni, o Kerisiano moni uma i aso nei o ē o loo vaavaai atu i luma ina ia ola e faavavau i le lalolagi i lalo o le pulega a le Malo, ua latou iloa e mafai lenei mea i le faaalia o le faatuatua i le taulaga a Iesu. E pei ona sa fetalai atu Iesu i le motu o tagata, o ia o le “areto ola na alu ifo mai le lagi.” (Ioane 6:51) Peitai, e lē o le uiga o lena mea faapea, o i latou o i ai le faamoemoe faalelalolagi e tatau ona tagofia faatusa faaletino o le Faamanatuga, auā latou te lē o i ai i le “feagaiga fou,” latou te lē o i ai foi i le feagaiga ma Iesu ina ia ‘i ai i lona malo, e nonofo i nofoalii.’

O le mea lea, o lenei vaega toatele o loo i ai le faamoemoe faalelalolagi latou te lē tagofia faatusa, le areto ma le uaina. A e lē o se auala foi lenei e faaalia ai le leai o se faatuatua po o le talisapaia loloto mo le tino ma le toto o Iesu. O le mea moni, talu ai ona o lo latou talisapaia loloto mo lana taulaga ma le faamoemoe fiafia faalelalolagi o loo i o latou luma, ua sili ai ona mautinoa lo latou auai i tausaga taitasi e avea o ni tagata e maimoa ma le faaaloalo i le faamanatuina o le Talisuaga Afiafi a le Alii. I lenei auala, ua latou faaatagia ai lo latou lava faatuatua ma avatu ai le faamaoniga fiafia faapea o le vaega totoe o le “lafu mamoe itiiti” ma le motu o tagata e toatele o “isi mamaoe” o loo i ai i se aufaatasiga mafana.—Ioane 10:16.