O le Soifuaga o Iesu ma Lana Faiva

O se Malaga Faalilolilo i Ierusalema

O LE TAU lea e āfu ai mea i le 32 T.A., ma ua latalata le Tausamiga o Fale Apitaga. Ua tele lava ina faapau mai e Iesu lana galuega i Kalilaia talu mai le Paseka o le 31 T.A. ina ua taumafai tagata Iutaia e fasioti ia te ia. Atonu, e na o le pau le taimi na toe asiasi atu ai Iesu i Ierusalema talu mai lena taimi, o lona alu atu lea ina ia auai i tausamiga faaletausaga e tolu a Iutaia.

Ua uunaʻi atu nei Iesu e ona uso: “Ia e tuua lenei mea, ma e alu ane i Iutala.” O Ierusalema, o le aai autū lea o Iutaia ma o le ogatotonu o faiga faalotu uma i le atunuu atoa. Ua manatu ona uso: “E leai se tasi e fai faalilolilo se mea pe a manao o ia i le fia faaalia o ia.”

E ui lava e lē talitonu Iakopo, Simona, Iosefa, ma Iuta faapea o lo latou uso matua o Iesu, o le Mesia moni lava, a e ua latou mananao ia faaalia e ia ona mana faivavega ia i latou uma o loo faatasitasi ai i le tausamiga. A e peitai, o loo silafia lelei lava e Iesu mea matautia. “E le mafai le lalolagi ona ʻinoʻino ia te outou;” ua ia fetalai atu ai, “a e ʻinoʻino mai ia te au, auā ou te molimau i ai ua leaga ana amio.” O lea na fetalai atu ai Iesu i ona uso: “Ō ae ia outou i lea tausamiga; ou te le alu ae nei i lea tausamiga.”

O le Tausamiga o Fale Apitaga o se faamanatuga e fitu aso e faia ai, lea e faaiʻuina i sauniuniga faaletausaga i lona valu o aso. O le tausamiga e faailogaina ai le iʻuga o le tausaga o galuega faafaatoaga ma o se taimi o le olioli tele ma avatu ai taulaga faafetai. Ina ua mavae ni nai aso mulimuli ane talu ona ō atu uso o Iesu ina ia faatasi ma le aumalaga e toatele, ona ō atu faalilolilo ai loa lea o ia ma ona soʻo, ina ia aua neʻi iloa i latou e tagata. Na latou ui atu i Samaria, na i lo o le auala lea e ūia e le toatele o tagata e lata i le Vaitafe o le Ioritana.

Talu ai ona o le a manaomia e Iesu ma ana aumea ni mea latou te nonofo ai i se nuu i Samaria, o lea ua ia muaʻi aauina atu ai ni avefeau e faia ni sauniuniga. A e peitai, ua mumusu tagata e faia se mea mo Iesu ona e talu ai ua latou faalogo ua agaʻi atu o ia i Ierusalema. Ona fesili atu lea ma le ita Iakopo ma Ioane: “Le Alii e, pe e te finagalo, ma te fai atu ia alu ifo le afi ma le lagi, ia fano ai i latou?” Ua matuā aʻoaʻi atu Iesu ia te i laʻua ona o le manatu i le faia o sea mea, ona latou malaga atu ai lea i le isi aai.

A o latou savavali i le ala, ona fai mai lea o le tasi tusiupu ia Iesu: “Le aʻoaʻo e, ou te mulimuli atu ia te oe i mea uma e te maliu atu i ai.”

Ua tali atu Iesu, “E fai lua o alope, e fai foi mea e momoe ai manu felelei: a o le Atalli o le tagata, e leai se mea e moe ai o ia.” Ua faaalia ai e Iesu faapea, afai o le a avea le tusiupu ma Ona soʻo, o le a ia tofo i le tulaga faigata. Ma e foliga mai i le faatatauga, e matuā loto faamaualuga tele le tusiupu e talia lenei ituaiga o olaga.

Ua fetalai atu Iesu i le tasi tamāloa: “Ina mulimuli mai ia ia te au.”

“Tuu mai ia ia te au, seʻi ou alu e muai tanu i loʻu tamā,” ua tali mai ai le tamāloa.

“Ina tuu pea ia i e ua oti e tanu i o latou tagata oti,” ua tali atu ai Iesu, “a o oe, e te alu ma talaʻi atu le malo o le Atua.” E mautinoa lava e leʻi oti moni le tamā o le tamāloa, auā ana fai ua oti, o le a lē faapena la ona i ai i inei lona atalii e faalogologo ia Iesu. A e atonu o loo fesili atu le atalli mo se taimi e faatali ai seʻia oti lona tamā. E leʻi nofo sauni o ia e faamuamua le Malo o le Atua i lona olaga.

A o latou agaʻi atu i le ala i Ierusalema, a e ua fai atu le tasi tamāloa ia Iesu: “Le Alii e, ou te mulimuli atu ia te oe; a ia tuu mai ia te au, seʻi ou muai faamavae i loʻu aiga.”

Ua tali atu Iesu, i le fetalai atu: “O lē tago lona lima i le suotosina, ma tepa i tua, e le tatau ia i le malo o le Atua.” O i latou o le a avea ma soʻo o Iesu e tatau ona taulaʻi atu o latou mata i le auaunaga o le Malo. E pei lava ona o le a pio le laina o palapala pe afai e le taulaʻi saʻo i luma le vaai a le tagata o loo umia le suotosina, o lea, so o se tasi e tepa i tua i lenei faiga tuai o mea atonu o le a sulu ese ai i le ala e taʻitaʻiina atu ai i le ola. Ioane 7:2-10; Luka 9:51-62; Mataio 8:19-22.

◆ O ai uso o Iesu, ma o ā o latou lagona e uiga ia te ia?

◆ Ai se ā ua soona lē mafaufau ai tagata Samaria, ma o le ā ua mananao i ai Ioane ma Iakopo e fai?

◆ O ā talanoaga e tolu ua faia e Iesu i luga o le auala, ma ua faapefea ona ia faamamafa le manaomia mo se auaunaga o le faataulagaina totino?