O le Soifuaga o Iesu ma Lana Faiva

I le Tausamiga o Faleapitaga

Ua logologoa tala o Iesu a o toe itiiti lava atoa le tolu tausaga talu ona papatisoina o ia. E faitau afe tagata na vaai i ana vavega, ma ua salalau atu foi i le atunuu atoa tala e uiga i ana galuega. O lenei, a o faapotopoto atu tagata i Ierusalema mo le Tausamiga o Faleapitaga, ua latou saili atu ai foi ia te ia i inā. “O ifea o i ai o ia?” ua latou fia iloa ai.

Ua avea Iesu ma mataupu o finauga. “O le tagata lelei o ia,” ua fai mai ai nisi. A ua faapea mai nisi, “E leai, a ua ia faasese i le nuu.” Ua tele le femusiaʻi i tala e uiga ia te ia i uluai aso amata o le tausamiga. A e peitai e leʻi mafai e se tasi ona maua le lototele e tautala atu ai e uiga i a Iesu i luma o le lautele. Talu ai ona o le fefefe o tagata ina neʻi faasalaina e taʻitaʻi o Iutaia.

Ina ua oo i le aso tuloto o le tausamiga, a e taunuu atu loa Iesu. Ua maliu atu o ia i le malumalu, o i inā o loo matuā ofo ai tagata i lona tomai ofoofogia o le aʻoaʻo atu. Talu ai sa leʻi auai atu lava Iesu i aʻoga faarapi, o lea ua matuā ofo ai lava Iutaia ma faapea ifo: “Pe faapefea ea ona poto o lenei tagata, a e lei aʻoaʻoina o ia?”

“O laʻu mataupu, e le o saʻu lava,” ua faamatala atu ai Iesu, “a o lana na auina mai aʻu. Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava aʻu.” E pipiimau atu aʻoaʻoga a Iesu i le tulafono a le Atua. O lea, e ao ona faaalia manino mai ai o loo ia sailia le mamalu o le Atua, a e lē o sona lava mamalu. “E lei tuuina atu ea e Mose le tulafono ia te outou?” ua fesili atu ai Iesu. I lona aʻoaʻi mamafa atu na ia fetalai atu ai: “A e leai se tasi o outou e anaana i le tulafono.”

“Pe se a le mea tou te fia fasioti ai ia te au?” ua toe fesili atu ai Iesu.

O le motu o tagata atonu o ni ē asiasi atu i le tausamiga, latou te lē o iloa e uiga i na taumafaiga. Ua latou manatu o se mea e faigata ona talitonu i ai pe ai se ā ua manao ai so o se tasi e fia fasioti i lenei aʻoaʻo e sili ona ofoofogia. O lea ua latou talitonu ai faapea atonu e i ai se mea ua sese ia Iesu ma ua latou manatu ai faapena ia te ia. “O ia te oe le temoni,” ua latou fai mai ai. “O ai ea e fia fasioti ia te oe?”

O loo mananao taʻitaʻi Iutaia e fasioti ia Iesu, e ui lava e lē o iloa e le motu o tagata. Ina ua faamalōlōina e Iesu se tagata i le Sapati i le tusa o le tausaga ma le ʻafa ua mavae, sa taumafai taʻitaʻi e fasiotia o ia. O lea ua faailoa atu nei e Iesu lo latou lē magafagafa i lona fesili atu ia i latou: “Pe afai e peritomeina se tagata i le sapati, neʻi solia le tulafono a Mose, pe se a le mea tou te ita mai ai ia te au, auā na ou faamalōlōina le tino atoa o le tagata i le sapati? Aua le soona faamasino, a ia faamasino i le faamasinoga tonu.”

Ua faapea atu nei tagata e nonofo i Ierusalema, o ē ua latou iloa e uiga i lea tulaga: “E le o ia ea lenei latou te fia fasiotia? Faauta foi, o loo tautala faaali lava o ia, a e le fai atu sa latou upu ia te ia: po ua iloa lava e le au faipule o le Keriso moni lava lenei?” Ua faamatala atu e nei tagata Ierusalema le pogai ua latou lē talitonu ai faapea o Iesu o le Keriso lava lea: “Ua latou iloa le mea ua sau ai lenei tagata; a o le Keriso, pe a maliu mai o ia, e leai se tasi na te iloa pe maifea o ia.”

Ua tali atu Iesu: “Ua outou iloa aʻu, ua iloa foi e outou le mea ua ou sau ai; ou te lei sau fua lava aʻu, a ua moni lava o ia ua auina mai aʻu, e lei iloa o ia e outou; a o aʻu, ua ou iloa o ia, auā mai ia te ia lava aʻu; o ia foi ua auina mai aʻu.” Ona latou fia pue lea ia te ia ona o lenei mea, atonu pe ina ia tuuina atu o ia i le fale puipui pe ina ia fasiotia o ia. A e leʻi manuia a latou taumafaiga auā e leʻi oo i ona po e maliu ai Iesu.

A e o le toatele o loo tumau pea ona faatuatua ia Iesu, e pei lava ona tatau ai ona latou faia faapea. Ioe, sa ia savali i le vai, vavao i matagi, faamalū i matagi malolosi i le sami, fafagaina faavavega le faitau afe i ni nai areto ma ni nai tamai iʻa, faamalōlō maʻi, faasavavali pipili, faapupula mata o tauaso, faamalōlō lepela, ma na oo lava ina faatutūina tagata ua feoti. O lea ua latou fesili atu ai: “Pe a maliu mai le Keriso, e tele ea faailoga e faia e ia i faailoga ua faia e lenei tagata?”

Ina ua faalogo le au Faresaio i le femusuaʻi o le motu o tagata i nei mea, ona aauina atu loa lea e i latou ma le au ositaulaga o auauna e pue ia Iesu. Ioane 7:11-32.

◆ O anafea na taunuu atu ai Iesu i le tausamiga, ma o ā talanoaga na fai ai i inā e uiga ia te ia?

◆ Ai se ā atonu ua fai mai ai nisi faapea ua i ai se temoni ia Iesu?

◆ O le ā le vaaiga a tagata o nonofo i Ierusalema e uiga ia Iesu?

◆ Ai se ā ua toatele ai ua faatuatua ia Iesu?