O le Soifuaga o Iesu ma Lana Faiva

Aʻoaʻo atu Atili i le Aso Fitu

O LE aso mulimuli o le Tausamiga o Fale apitaga, o le aso fitu lea, o loo faagasolo pea. O loo aʻoaʻo atu Iesu i le itu o le malumalu ua taʻua e “teu ai oloa.” Atonu o le itu lenei o loo i le vaega o le malumalu ua taʻua o le Lotoa o Fafine, i le mea o i ai pusa e tuu i ai e tagata a latou meaalofa.

I po uma lava o le tausamiga, e i ai se malamalama faapitoa e pupula mai i lenei vaega o le malumalu. E fa moli gaʻo uumi o loo faatutu ai i inei, e tofu moli taitasi ma pesini lapopoa taʻi fa e tutumu i suāuu. O le malamalama mai nei pesini e 16 o suāuu mai moli gaʻo pe a tutuina e lava lo latou malosi e faamalamalama ai le siosiomaga i so o se vaega mamao o le fale atoa i le po. O le fetalaiga a Iesu i le taimi nei atonu ua faamanatu atu ai i lana au faalogologo lenei faaaliga. “O aʻu nei o le malamalama o le lalolagi,” ua folafola atu ai Iesu. “O lē mulimuli mai ia te au, e lē savali o ia i le pouliuli, a e ia te ia le malamalama o le ola.”

Ua tetee le au Faresaio: “Ua e molimau oe ia te oe; e le faamaoni lau mau.”

I lana tali ua fetalai atu Iesu: “E ui lava ina ou molimau aʻu ia te au, a e faamaoni lava laʻu mau; auā ua ou iloa le mea na ou sau ai, ma le mea ou te alu i ai; a ua outou le iloa le mea na ou sau ai, ma le mea ou te alu i ai.” Ua ia faaopoopo atu: “O aʻu nei lē molimau ia te au, o loo molimau foi ia te au le Tamā ua auina mai aʻu.”

“O ifea lou Tamā?” ua fia iloa ai le au Faresaio.

“E lē iloa e outou o aʻu, po o loʻu Tamā,” ua tali atu ai Iesu. “Ana iloa e outou o aʻu, po ua iloa foi e outou o loʻu Tamā.” E ui lava sa mananao pea le au Faresaio e puʻe Iesu, a e leai se tasi na paʻi atu ia te ia.

“Ou te alu ese,” ua toe fetalai atu ai Iesu. “E lē mafai e outou ona ō i le mea ou te alu i ai.”

I lona fai atu faapena ua amata ai ona tau manatu Iutaia: “E fasioti ea o ia ia te ia? ina ua faapea mai o ia, E lē mafai e outou ona ō i le mea ou te alu i ai.”

“O outou o lalo nei,” ua faamatala atu e Iesu. “O aʻu mai lugā; o outou e ō le lalolagi nei, e lē so le lalolagi aʻu.” Ona ia faaopoopo atu lea: “A outou lē talitonu, o aʻu lenei o ia, ona oti lea o outou i a outou agasala.”

Ma le mautinoa lava, o loo faasino atu e Iesu i lona i ai a o leʻi avea o ia ma tagata, ma le mea moni faapea o ia o le Mesia folafolaina, po o le Keriso. A e peitai, e lē taumate ua latou fesili atu ma le matuā manatu faatauvaa: “O ai ea oe?”

I le fesagaʻi ai ma la latou teteega, ua tali atu Iesu: “Ai se ā ua ou tautala atu ai ia te outou?” Peitai ua ia toe faapea atu: “O ia ua auina mai aʻu e moni lava o ia. O mea ua ou faalogo ai ia te ia, o mea ia ou te fai atu ai i le lalolagi.” Ua faaauau atu Iesu: “Pe a siitia i luga e outou le Atalii o le tagata, ona iloa lea e outou o aʻu lenei o ia; ou te lē fai fua foi se mea, a e peitai, faapei ona aʻoaʻo mai e loʻu Tamā ia te au, o mea ia ou te tautala atu ai. O ia foi ua auina mai aʻu o loo ia te au ia; e le tuua aʻu e toatasi e le Tamā, aua ou te faia pea lava o mea e lelei ia te ia.”

Ina ua fetalai atu e Iesu nei mea, e toatele ua faatuatua ia te ia. Ona ia fetalai atu lea ia i latou nei:“ Afai tou te tumau pea i laʻu mataupu, o oʻu soo moni outou. E iloa foi e outou le mea moni, e tuu saʻoloto foi outou e le upu moni.”

“O i matou nei o le fanau a Aperaamo,” ua tali mai ai e tetee ia te ia, “e lei fai lava i matou ma pologa o se tasi; pe faapefea ona e fai mai, E tuu saʻoloto outou?”

E ui lava ua masani ona i ai Iutaia i lalo o se pule e ese, a e latou te lē mananao e taʻu se tagata tetee o se matai. Latou te tetee pe a taʻua i latou o pologa. Peitai sa faasino atu e Iesu e faapea o i latou moni lava o pologa. I le ā le itu? “E moni, e moni, ou te fai atu ia te outou,” ua fetalai ai Iesu, “o sē faia le agasala, o le pologa lea o le agasala.”

O le teena o le avea o i latou ma pologa o le agasala ua tuu ai Iutaia i se tulaga matautia. “O le pologa foi, e le tumau pea ia i le aiga,” ua faamatala atu ai e Iesu. “O le atalii, e tumau pea lava ia.” Ona o le pologa e leai ni ona aiā mo se tofi, atonu o le a lamatia ai o ia i le ono faateaese i so o se taimi. E na o le atalii moni na fanau mai pe tausia foi e le aiga e nofo “pea,” o lona uiga, po o le ā lava le umi e ola ai.

“O lenei, pe a tuu saʻoloto outou e le Atalii,” ua faaauau mai Iesu, “ona saʻoloto faamaoni ai lea o outou.” O lea, o le upu moni e tuusaoloto ai tagata, o le upu moni e uiga i le Alo, o Iesu Keriso. Ua na o le taulaga togiola o lona soifua lelei atoatoa faaletagata o le auala lea e mafai ai e so o se tasi ona saʻoloto mai le oti ona o le agasala. Ioane 8:12-36.

◆ O fea o loo aʻoaʻo ai Iesu i le aso fitu? O le ā ua tupu i inā i le po, ma e faapefea ona fesootai lenei ma le aʻoaʻoga a Iesu?

◆ O le ā ua fetalai mai ai Iesu e uiga i lona amataga, ma o le ā e ao ona faaali mai e lenei mea e uiga i lona faailoa mai?

◆ I le ā le auala ua avea ai Iutaia ma pologa, a e o le ā le upu moni o le a faasaolotoina ai i latou?