Talavou—Ia Leoleo Faasaga i le Ola i se Olaga Uigalua
“Le taulealea e, ina olioli ia i lou tama itiiti, . . . a ia e iloa e faamasinoina oe e le Atua ona o na mea uma.”—FAILAUGA 11:9.
1, 2. O le ā le faaaʻoaʻoga ua i ai o se talavou o loo ola i se olaga uigalua?
“MAI i loʻu tamameamea, sa tausia aʻe aʻu i se siomaga faa-Kerisiano, i totonu o Molimau a Ieova,” na tusi mai ai se talavou. “A e, o le olaga sa ou ola ai, e oo lava i le i ai i le aiga, sa tumau pea ona o se mea e matuā ese lava mai tulaga ma manatu o oʻu mātua. I le tele o vaega o loʻu olaga, sa o se olaga taa, ma o se olaga lē aʻoaʻia o le lalolagi.”
2 Ua faamatala atili mai e le talavou: “E oo lava i le taimi a o leʻi atoa le sefulu o oʻu tausaga, a e ua amata ona ou taaalo i vaega e lua o le lalolagi i le tulaga e sili atu sa ou mafaia—ina ia talia ma maua ai uo i le aʻoga, ma ia tumau pea foi ona talia ai aʻu e oʻu mātua. I le aʻoga, sa ou matuā lolo atu lava i le tele ou te mafaia i tifiga ma amioga . . . A e i le aiga, sa matuā ese foi oʻu uiga. Sa o aʻu o se Kerisiano amio lelei e pei ona sa faatalitalia e oʻu mātua.”
3. (a) O le ā le mautinoa o ia i matou, a e o le ā le mea ua matou iloa? (e) O le ā ua na uunaʻia lo matou uai saʻo atu i talavou?
3 Ua matou iloa o amioga a lenei talavou e lē o fai ma sui o le toatele o outou le au talavou i le faapotopotoga. O le toatele lava o outou ua matou mautinoa, e faamaoni i o outou mātua ma le faapotopotoga, ma ua faamafanafanaina ai o matou loto i lenei mea. I le taimi lava e tasi, ua matou iloa ua amio tonu mai nisi i luma, ma i le mea sili latou te mafaia ua latou natia mai tagata matutua se auala o ola ai o le faia o mea sese. O lea, ua oso aʻe ai le fesili: O oe ea o le ituaiga o tagata ua e faia ina ia matou manatu o oe lava lea, pe o e ola i se olaga uigalua? Matou te lē o fesiligia lea itu ona o se agaga fia suʻesuʻe masei, a e na i lo o lea, ona matou te alolofa ma mananao e fia fesoasoani ina ia olioli i lo outou talavou e ala i le ola ai i se auala o le a fiafia ai Ieova.—Failauga 11:9, 10; 12:14; 2 Korinito 5:10.
4. Ua faapefea i nisi o tagata matutua ona ola foi i olaga uigalua, a e o le ā ua matauina i totonu o tagata talavou talu ai nei?
4 Peitai, atonu o le a e fesili mai: ‘Ai se ā e faitio ai pea ia i matou le au talavou? A e faapefea tagata matutua?’ E lē ma fesiligia foi lena mea faapea e tatau foi ia i latou ona leoleo faasaga i le ola i se olaga uigalua. Sa faia e Kiasi, le auauna a Elia, se gaoioiga taufaaʻoleʻole, i lona taumafai e faaufiufi le mea moni faapea na ia talia ni meaalofa mai ia Naamanu. (2 Tupu 5:20-26) Ma o Anania ma Safaira, o ni tagata matutua, na la faia se mea sese i lo la fai atu faapea na la tuuina atu i le au aposetolo le tau atoa o le fanua—i le taumafai e fia mata faamaoni—a e o le mea moni sa la taofia nisi vaega o le tupe mo i laua. (Galuega 5:1-4) A e peitai, o le mafuaaga ua uai saʻo atu ai ia te outou le au talavou, ona e foliga mai o loo faateleina faailoga vaaia o lenei faafitauli ia te outou.
Le Pogai e Ola ai Nisi i Olaga Uigalua
5. (a) Ai se ā e ola ai nisi talavou i olaga uigalua? (e) O le ā le uiga e masani ona faaali atu i talavou pe afai latou te ola i ni olaga e faaaloalogia, ma i lea, o le ā e faia e nisi?
5 Ai se ā ua faia ai lenei mea? Na taʻu saʻo mai e se tasi talavou le pogai sili i lona faamatala mai: “Sa ou lē manao e lē iloa aʻu uo i le faaesea o aʻu.” E moni o le faaesea mai i se auala aogā e masani lava ona avea ai se tasi o le autū o faitioga. (Faatusatusa le 1 Peteru 3:16; 4:4.) Ina ia aloese mai ai i lenei mea ma maua le talileleia e a latou tupulaga, ua oo ai ina onanā isi talavou pe faia foi ni feusuaiga. Na auē mai se tasi teine e 13 tausaga e lē o se Molimau, o lē na maua uma e ona maka le A ma e auai pea lava i talanoaga a le vasega: “O le a lē fiafia tama i se tasi e poto ma lelei e pei o aʻu. . . . Ua ou manatu o le a aveesea oʻu maka i le aʻoga po o le suia o se isi mea ina ia olaola ai loʻu talaaga.”
6. Na faapefea ona taaʻina Peteru i le faia o le mea sese, ma e ao faapefea i lenei mea ona aafia ai la tatou faamasinoga o talavou?
6 E manino lava, i se tasi taimi sa manatu tele ai le aposetolo o Peteru i lona lava tagata, po o lona talaaga, na i lo o le faia o le mea sa ia iloa e tonu. Ina ua asiasi atu Kerisiano Iutaia mai Ierusalema i Anetioka, ona ʻalo lea o Peteru i lona au faatasi atu ma Kerisiano o Nuu ese ona o le fefe ina neʻi faitioina o ia e Iutaia ona o le miomiō faatasi ma nei tagata o Nuu ese. (Kalatia 2:11-14) Talu ai e oo lava i Kerisiano taʻumatuaina sa faapea ona lolo atu i omiga mai tagata o le nuu, pe o se mea ea la e ofo ai pe afai e faia foi faapena e talavou e leʻi lava le poto masani?—Faataoto 22:15.
7. O le ā atonu ua tofotofoina ai nisi talavou e ola i olaga uigalua?
7 O le isi mafuaaga e fesootai i ai ua mafua ai ona ola nisi talavou i olaga uigalua, ona ua latou talitonu ua latou misia le mālie o le olaga. Latou te faalogo i talanoaga a le au talavou i le aʻoga e uiga i a latou gaoioiga—maeu le manaia o le patī, le matautia o musika, le inuga o ava malolosi, le tagofia o vailaau faasaina, e ese le manaia o le tulaga fiafia sa latou oo i ai! Pe o latou faalogo foi i le faia o feasogiga a tama ma teine, ma faia feusuaiga. O lea la, ua gaee aʻe ai loa le faanaunauga ina ia tofo i nei mea, ma ua taaʻina ai loa le au talavou e faataʻitaʻia le mea ua taʻua e le Tusi Paia o “le fiafia i le agasala e vave mavae.”—Eperu 11:24, 25; 1 Korinito 10:6-8.
8. O le ā le pogai faavae ua ola ai talavou i olaga uigalua?
8 A e peitai, o le pogai faavae ua ola ai nisi talavou i olaga uigalua, ona e lē o matuā moni Ieova ma le lalolagi fou o loo sau ia i latou. Latou te lē talitonu moni i folafolaga a Ieova po o lapataiga o loo aumaia e ala i lana Afioga ma lana faalapotopotoga vaaia e tusa ai ma iʻuga o le lē usiusitai ia Ieova. (Kalatia 6:7, 8) E lē pei i latou o Mose, o lē ua fai mai ai le Tusi Paia: “Auā sa faanaunau o ia i le taui [a le Atua]. . . . Auā na faamalosi o ia pei o sē iloa atu i le le o vaaia.” Sa moni ia Mose Ieova ma Ana folafolaga. A e o i latou o ola i olaga uigalua e lē ia i latou lena faatuatua. O mea uma lava latou te vaai i ai ua na o mea lava o loo manao Satani ina ia latou iloa—le ilaila mai o lana faiga o mea. Ma i lea ua latou mulimuli atu ai i le fiafia i le agasala e vave mavae a e peitai, i le taimi lava e tasi, o loo taumafai e faafoliga mai i fafo e paia.—Eperu 11:26, 27.
Mātua e, e Mafai ona Outou Saosaolaumea
9. (a) Ua faapefea ona mafai e mātua ona saosaolaumea i le ola ai o a latou fanau i olaga uigalua? (e) O le ā e manaomia ona talisapaia e tagata matutua ma mataala ina ia faia?
9 Na matauina e le talavou o loo taʻua i le amataga: “O le mea sa lē lauiloa ai aʻu i le aʻoga na talia ma aumaia ai se talisapaia ma le fiafia o le faamaonia i le aiga. A e sa ou manaomia e sili atu na i lo o lena. Sa ou manaomia se tasi e mafai ona ou toomaga atu i ai, talanoa atu i ai, ma faalagolago atu i ai, ma sa ou leʻi maua lena mai oʻu mātua.” Mātua e, o outou faaeteete ea ina ia aua neʻi faia so outou sao i le ola ai o a outou fanau i se olaga uigalua? O outou avatua ea ia i latou le uai atu totino ma le taʻitaʻiga o loo latou manaomia? E tatau i tagata matutua ona talisapaia omiga e tele e faavaivaia ai le faatuatua o loo fesagaʻi ma o tatou tagata talavou i le aʻoga ma ia mataala e faia mea uma e mafaia e faalaeiau ai ma fesoasoani ai ia i latou.—Salamo 73:2, 3; Eperu 12:3, 12, 13.
10. (a) O le ā le naunau fia iloa lea ua avea ma tiute tauave o mātua e uaʻi i ai? (e) O le ā e masani ona iʻu i ai pe a lē taulau ona saunia e mātua taʻiala?
10 E masani lava ona i ai se uiga autū i fesili a se talavou e uiga i faiā ma isi o le isi ituaiga, o le mataupu lea o le toatele o mātua latou te alofia. “E lē taitai ona la faia se talanoaga mafana ma aʻu,” na taʻua ai e se talavou aʻoga aulelei ma faaaloalogia e 15 ona tausaga. “O mea uma ou te aʻoaʻoina e uiga i faiga faaleituaiga ou te aʻoaʻoina lava e aʻu ia. . . . Sa ou lagona le matamuli e laga atu e ui lava sa tele mea sa ou fia iloa.” O le ā sa iʻu i ai? Na fai mai o ia: “Sa oo ina mafiafia le pa pupuni lē vaaia i le va o aʻu ma oʻu mātua, ma sa oo ai ina avea aʻu o se teine sili ona naunau fiailoa, valea ma le masalosalo.” Ioe, sa oo ina ia lolo atu i ni taumafaiga a se tama talavou e faia ni feusuaiga, a e o ai e te iloa e i ai sona sao i le tiute tauave mo lenei mea?—Faataoto 22:3; 27:12.
11. (a) E mafai faapefea i mātua ona faaalia latou te alolofa i a latou fanau? (e) Atonu e faapefea ona tali atu talavou i lena alofa?
11 E tāua le faailoa e mātua i a latou fanau iti faapea latou te alolofa moni ia te i latou e ala i le faaalu o se taimi ma i latou, ia fetufai i ni talanoaga mau faatuatuaina, ma ia saunia ni taʻiala. (Faataoto 15:22; 20:18) “Sa ia te aʻu se lagona faapea ana fai la te manatu moni mai ia te aʻu atonu o le a la faia ni tulafono,” na fai mai ai le isi talavou. E tusa lava pe tugā i talavou a outou tulafono ma a outou tuutuuga i le taimi nei, a e mulimuli ane o le a latou toe tepa i ai ma le talisapaia. Na tusi atu se teine talavou i lona tinā: “I le avea o se tasi sa maumauai pea i le iloiloina o tapulaa ma vaavaai mo ni itu vaivai ma ni auala e sola ese ai mai tulafono ma tuutuuga malolosi, ua sili ai ona ou faafetai ona sa mau pea lou taofiofia o aʻu.” O lea, ia faaali atu e te alofa i lau fanau e ala i lou faamautinoa ua latou gauai atu i au taʻiala. Tau ina ia aua lava neʻi i ai sou sao i lo latou ola i olaga uigalua e ala i le lē taulau ona tatalaina pea laina o fesootaiga pe o lou lē i ai foi i inā i le taimi latou te manaomia ai oe!
12. O le ā le uiga lē atamai o nisi mātua ua saosaolaumea ai i le avea o a latou fanau o ni ē e ola i olaga uigalua?
12 E mafai foi ona i ai se sao o mātua i le ola ai o a latou fanau i ni olaga uigalua i se isi auala e matuā ese lava. Ua faaatagia mai i faamatalaga a le faamasino sili o le setete i New Jersey. “O faiaʻoga,” na fai mai ai le faamasino, “latou te taumafai e aʻoaʻi tamaiti ona o le faia o mea sese i le aʻoga, a e e matuā faitioina malosi e mātua na i lo o le lagolagosua.” E foliga mai ua i ai i nisi mātua le talitonuga sese faapea e lē faia e a latou fanau iti ni mea sese. E tusa lava foi pe faailoa atu i ai e toeaina Kerisiano ma isi o le faapotopotoga o loo latou iloa mea sese a ā latou fanau i nei mātua, a e faataliga tuli lava i ai. I lo latou faia faapea, ua latou saosaolaumea ai i le ola aʻe o a latou fanau iti i ni olaga uigalua.
Le Uiga Moni o le Olaga Uigalua
13. O le ā le uiga moni lava o le ola i se olaga uigalua?
13 E tāua tele ona talanoaina lenei mea: O le ola i se olaga uigalua o lona uiga moni lava o le faia o mea sese—o le avea ma sē e taufaasese, o sē e pepelo. (Salamo 12:2; 2 Timoteo 3:13) Ua pei lava o Satani, o lē na te “liua o ia e ia ma agelu o le malamalama.” (2 Korinito 11:14, 15) E uiga foi i le pei o na taʻitaʻi lotu o ē na fetalai i ai Iesu: “Oi talofa ia te outou tusiupu ma faresaio, tagata pepelo! auā e tutusa outou ma tuugamau ua faasinasinaina, o loo matagofie i fafo, a o totonu ua tutumu i ivi o tagata oti, ma mea leaga uma. E faapea foi outou, o fafo ua mataamiotonu i luma o tagata, a o totonu, ua tutumu outou i le pepelo ma le amioletonu.” (Mataio 23:27, 28) Ua manino lava, o le ola i se olaga uigalua, o se matuā tetee matuiā i le Atua.
14. Ai se ā e tatau ai i se tasi ona manao e aloese mai le ola i se olaga uigalua?
14 O le isi mea moni mo se talanoaina uigā o lenei: E lē mafai ona natia e faavavau se auala pepelo. “E mafai ona iloa o le tama i lana amio; pe sao ona lelei ma le tonu o lana mea e fai,” ua fai mai ai le Tusi Paia. (Faataoto 20:11; Luka 12:1-3) Ioe, o au gaoioiga, pe leaga pe lelei, o le a iloa lava i se taimi mulimuli. Ma ua faailoa mai e le Tusi Paia faapea o le a matuā faasalaina e le Atua tagata pepelo. (Mataio 24:51) E mautinoa lava la e ao ona e manao e aloese mai le ola i se olaga uigalua!
Le Auala e Aloese ai
15. O le ā o le a fesoasoani i talavou e aloese mai le ola i se olaga uigalua?
15 O le tasi auala ia aloese ai mai le ola i se olaga uigalua, o le faafesagaʻi lea e tusa lava po o le ā lona tele e oo i ai, ona e fesili ifo lea ia te oe: O le auala ea le la o oʻu manao e manatua ai aʻu, i le avea o se tagata pepelo, i le avea o sē e faaaʻoaʻo ia Satani ma le au Faresaio? E mautinoa e leai! O se isi mea o le a fesoasoani ia te oe e aloese ai mai le ola i se olaga uigalua, o le mafaufau i faalogona o le loto tiga ia te oe lava ma le iʻuga matautia o le a aumai e sea ituaiga o olaga ia te oe. Ia manatua le mea na tupu ia Kiasi ona o lona taumafai e faia se pepelo. Na taia o ia i le lepela o Naamanu i lona olaga atoa. Ma na taia foi Anania ma Safaira e le Atua i le oti ona o le taumafai e faatagā faaalia le limafoai.—2 Tupu 5:27; Galuega 5:5, 9, 10.
16. O le ā na tupu i se tasi talavou o lē na aafia i se olaga e tusa ma le lalolagi?
16 E i ai foi ni faaaʻoaʻoga faaonaponei. O se talavou i le Iunaite Setete sa amata ona suʻesuʻe le Tusi Paia ma auai i sauniga i le Maota o le Malo. A e sa toe amata ona ia paʻipaʻi atu i se olaga e tusa ma le lalolagi ma lē toe auaufaatasi ai loa. Ina ua mavae ni tausaga, na ia tusi mai: “I le tusa ma le lua masina talu ai, sa ou ole atu i le Atua ina ia auina mai ia te aʻu se Molimau ona ua ou lagona le faanaunauga ina ia toe amata. Sa amata ona ou toe suʻesuʻe a e tupu loa ma se faalavelave. Sa maua mai se faaiʻuga mo aʻu pe tusa ma le masina ua mavae, faapea ua ou maua i le Kaposi’s sarcoma o le isi ituaiga o le faamaʻi fou e lē ma togafitia o le FFP (AIDS).” Na ia faaiʻu mai: “Ana fai ou te mulimuli ma usiusitai i lapataiga a le Tusi Paia i la aso, atonu ou te lē oo i lenei tulaga ua ou i ai i aso nei.” E mautinoa lava o loo e manao e aloese mai so o se iʻuga faanoanoa faapena! E leai lava se mea tāua e ofo mai e le lalolagi.—1 Ioane 2:15-17.
17. O le ā le isi mea ia mafaufau atili i ai e ao ona fesoasoani i talavou e aloese mai le ola i se olaga uigalua?
17 O le isi mea o le a fesoasoani foi ia te oe e alofia le ola i se olaga uigalua, o le mafaufau lea i āuga o le a i ai i le suafa o Ieova ona o lou faia o na amioga. Na faapea mai le talavou lea o loo taʻua i le faatomuaga o le mataupu e faapea, ina ua vaai atu se tasi ia te ia o ia talia se sikaleti na faapea atu lea tagata: “Ou te leʻi iloa e ulaula Molimau a Ieova. Pe e lē o oe ea o se Molimau?” Na ia faapea mai mulimuli ane, o lena fesili na oo ai ia te ia se faalogona leaga ona o le mea sa ia faia sa faalumaina ai Ieova. Pe e te manao ea i lena mea? Pe faapena ea ona e manatu māmā i lo tatou Atua i le pei o Isaraelu lē faamaoni anamua, o le a e faalumaina ai lona suafa?—Salamo 78: 36, 37, 41; Esekielu 36:22.
18. (a) O ā ni uiga atonu o le a faaalia e mātua pe afai la te iloa faapea sa ola la laua tama i se olaga uigalua? (e) Ai se ā e tatau ai i lenei mea ona fesoasoani i talavou Kerisiano ia aloese mai le ola i se olaga uigalua?
18 E lē gata i lea, manatu i le igoa ma faalogona o ou mātua. “Na oo mai le aso na iloa tino ai e oʻu mātua le ituaiga moni o tagata sa i ai aʻu,” na tusi ai le talavou o loo taʻua i luga. “Sa faateia ai i laua. Ma o se taimi muamua lea i loʻu olaga ua ou vaaia ai ua fetagisi loʻu tamā ma loʻu tinā. Sa matuā tiga i laua ona o le mea na ou faia.” Atonu o le a fetagisi foi ou mātua, pe a la iloa o loo e ola i se olaga uigalua. Pe o le mea ea lena e te manao i ai? “E sili atu ona faanaunau i se igoa lelei na i lo o le oloa e tele,” ua fai mai ai le Tusi Paia. (Faataoto 22:1, The Jerusalem Bible) O le ola i se olaga uigalua, o lou faaleagaina lea o lo oe lava igoa lelei. A e ua lē na o le pau ai lena. Ua e faaleagaina ai foi le igoa lelei o ou mātua ma aumaia ai se toʻilalo popo, e faalumaina ma faamasiasi ai i laua.—Faataoto 10:1; 17:21.
19. Na faapefea i amioga sese a atalii o Iakopo ona aafia ai o ia, ma o le ā le lesona e mafai ona tatou utufia mai i lenei mea?
19 Ua faataʻitaʻia lelei lava e atalii o Iakopo le auala e mafai ai e fanau ona faaleaga le igoa lelei o o latou mātua. Ina ua faaleagaina Tina le afafine o Iakopo, na fasiotia e ona tuagane tane o le aai ma faaumatia le aai, o lea na auē ai Iakopo: “Ua oulua faatiga mai ia te au, e inosia ai aʻu e i latou o e mau i le nuu.” Sa oo foi ina faatonu atu e le Atua Iakopo ina ia tuua lea mea. (Kenese 34:30; 35:1) E mafai foi ona e faapogaia le inosia o le igoa o lou tamā ma lou tinā, e faamasiasi ai i laua i le faafeagai ai ma o laua tuaoi ma uo. E moni, e pei ona fai mai le Tusi Paia: “O le atalii valea o le faatiga loto lea i lona tamā; o le faaonoono foi i le na fanau mai o ia.”—Faataoto 17:25.
20. O le ā le meaalofa ofoofogia ua faaavanoa atu e mātua Kerisiano i a latou fanau?
20 A e peitai, ua matou mautinoa, e te lē manao e pagatia ou mātua i le popole ma le tiga. O lea, ia manatunatu i āuga o le a avatu e au gaoioiga ia i laua. Afai foi ua faaeaina oe e maua ni mātua Kerisiano, ia mafaufau i mea na la avatu ia te oe—e lē na o le ola—a e o se mea e sili atu ona tāua. Ua faapea mai le Tusi Paia e uiga ia Ieova: “O lou alofa e sili ona lelei lea i le ola.” (Salamo 63:3) E ala i le tausia aʻe o oe i le upu moni, ua faaavanoa atu ai e ou mātua ia te oe le alofa tunoa o le Atua, e fesoasoani ia te oe ia i ai se faiā ma ia. O le maua o lenei mea e sili ona lelei lea na i lo o le maua o le na o le ola, auā e tusa lava pe e te oti, o le a toe faafoisia oe e le Atua i le ola e faavavau i le Parataiso.
Fesoasoani i Isi e Aloese ai
21. (a) O le ā le tiute tauave ua i talavou pe afai ua latou iloa mea sese ua faia e isi? (e) O le ā le faaaʻoaʻoga lelei ua saunia e se tasi talavou e 13 tausaga?
21 A e faapefea pe a e iloa se tasi o ola i se olaga uigalua? Muamua, ia faamalosiau i le tagata ina ia alu i le au toeaina. A e faapefea pe afai e musu o ia e faia lena mea? Ia o lau tiute tauave faale-Tusi Paia lena ina ia taʻu atu. (Levitiko 5:1) Matou te iloa o le a lē faigofie ona faia o lenei mea, a e o le mea saʻo lena e tatau ona faia. “E faamaoni manua mai le uo,” ua fai mai ai le Tusi Paia. (Faataoto 27:6) Ina ua uma ona faalogo se teine e 13 tausaga i se lauga sa faamalamalama ai lona tiute tauave faale-Tusi Paia, sa ia alu atu loa i se uo na ia iloa sa faia se mea sese ma fai atu i ai, e tatau ona ia alu e taʻu atu i le au toeaina. “Sa ou alu e vaai pe ua ia talanoa atu i se toeaina,” ua tusi ai le teine. “Sa ia leʻi faia faapea. O lea sa ou alu ai loa ma talanoa atu i se tasi o toeaina.” Na fesili le teine talavou: “Pe sa ou faia ea le mea saʻo i le taʻu atu o laʻu ‘uo aupito sili muamua?’” Ioe, sa ia faia! A o atonu e tiga iʻuga ona o le faia o lenei mea, a e mafai ona olioli i iʻuga mulimuli, ma oo lava ina avea o se faasaoola i lē ua fai mea sese.—Eperu 12:11.
22. O le ā le auala poto ua faalaeiauina ai talavou e uia, ma o le ā o le a iʻu i ai?
22 Peitai e mafai ona e alofia nei mea uma pe afai e te lē ola i se olaga uigalua i lou laasaga muamua lava. O lea, ia e atamai. Ia atiina aʻe se faiā totino malosi ma le Atua, e pei ona e faia ma sau uo vavalalata. Ia faia faapea e ala i lou tatalo atu e lē aunoa ia te ia, e ala i le fesili atu mo lana fesoasoani, ma e ala i le suʻesuʻe ma le filiga o lana Afioga le Tusi Paia, ina ia e talisapaia moni ai ona uiga. Talavou e, o le a faamanuiaina ai outou ma o le a faafiafia ai loto o outou mātua. A e sili atu ona tāua, o le a e faafiafia ai le finagalo o Ieova.—Faataoto 27:11.
O le ā Lau Tali?
◻ Ai se ā e ola ai nisi talavou i olaga uigalua?
◻ Ua faapefea ona saosaolaumea nisi mātua i le ola ai o a latou fanau i ni olaga uigalua?
◻ O le ā moni lava le uiga o le ola i se olaga uigalua?
◻ E mafai faapefea ona aloese talavou mai le ola i se olaga uigalua?
◻ O le ā le tiute tauave a talavou pe afai ua latou iloa nisi tagata talavou ua faia ni sese matuiā?
[Ata i le itulau 29]
O le talatalanoa i se auala mau faatuatuaina ua faaalia ai le alofa o le matua
[Ata i le itulau 31]
Afai ua e iloa ua faia e se isi se agasala matuia, ia faamalosiau i lena tagata ina ia alu e lipoti atu