O le a Faapefea ona Tatou Toe Taui atu ia Ieova?

AFAI e naunau mafana moni se tasi ia i tatou, atonu i le faia o se mea mo lo tatou lava lelei, o le ā lo tatou uiga faaalia? O le agalelei ma le lima foai e masani ona aumaia ai se tali, pe lē o lea ea? O lea, o ā la o tatou faalogona agaʻi i lo tatou Atua, o Ieova, ona o lona alofa agalelei faifai pea ia i tatou?

E matuā faigofie lava, i lo tatou faanatinati atu e pei ona o loo tatou iai nei i omiga o le olaga i aso uma, ona talia o le agalelei o Ieova e aunoa ma le talisapaia, i nisi taimi ua oo lava ina gaoioi e peiseai tatou te lē o loto faafetai moni. O le mea lea, ua lelei ai ona seʻi tatou faatali mo sina taimi ma mafaufau i le fesili a le faisalamo: “Se a se mea ou te taui aʻi atu ia Ieova ona o lona agalelei mai uma lava ia te au?” (Salamo 116:12) I ā ni auala o le a tatou tali atu ai?

Aogā mai ia Ieova

A aunoa ma le meaalofa mai ia Ieova o lana Afioga, le Tusi Paia, pagā le leiloa o lo tatou auala o le a iai! O tane ma fafine lototetele i senituri ua mavae na tuuina o latou ola i ni tulaga lamatia ina ia maua ma faitau ai lenei tusi, ma ua tatou agaʻigaʻi aʻe ina malamalama le mafuaaga. I taimi uma ua loto faafetai ai tane o le Atua mo le Tusi Paia faagaeeina, i le iloa maeu lona aogā e “aʻoaʻo ai, e aoai ai, e faatonu ai, e faapoto ai foi i le amiotonu.”—2 Timoteo 3:16.

Ae peitai, ua tatou iloa faapea “ina ia atoatoa ona lelei ai . . . i galuega lelei uma lava,” ua tatou manaomia ai e sili atu na i lo na o le iloa o le Tusi Paia i le mafaufau. (2 Timoteo 3:17) E ala i le mana o le agaga paia o le Atua ua aumaia ai aogā i o tatou olaga, ma ua tuuina mai ai lenei mea moni i o tatou mafaufau e ala i faamatalaga fetaui lelei a Ieova e ala i lana perofeta o Isaia: “O lenei foi, o le Alii o Ieova, na ia auina mai aʻu, ma lona Agaga. O loo faapea ona fetalai mai o Ieova, o le na faatauina oe, o le Paia o Isaraelu, O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai. E! ana uai mai ou taliga i aʻu poloaiga, po ua tusa ma se vaitafe lou manuia; ma lau amiotonu, e tusa lea ma peau o le sami.” (Isaia 48:16-18) E ala i lona agaga paia, i le fesootai atu ma lana Afioga, ua taʻitaʻiina ai i tatou e Ieova ina ia maua aogā mo i tatou, ma o le iʻuga o le filemu ma le amiotonu.

E lē gata i lea, o le mana galue o Ieova o loo galue ma le uigā mo lo tatou lelei auā ua uma ona faatuina le auivi, se faalapotopotoga faalelalolagi, lea o loo galue ai lona agaga paia. I le 1 Korinito mataupu e 12, ua faatusaina ai e Paulo le faapotopotoga Kerisiano i se tino ma taʻua ai i le fuaiupu e 7: “Ua foaiina taitasi i tagata le faaaliga o le Agaga e aoga ai.” Ua faaauau ona ia faailoa mai le auala tatou te maua ai aogā mai le avea o se vaega o le faalapotopotoga faalelalolagi a le Atua.

I le pe a ma le lima tausaga talu ona uma ona tusia na upu, na ia faamauina i lana tusi i le faapotopotoga i Efeso lea na ia faalautele atu ai ona aogā i le fesootai atu ma lena fuafuaga faalelalolagi. E ui lava o mea na ia fai mai ai sa muai faatatauina i Kerisiano faauuina, ae pe e lē o i latou foi o le “motu o tagata e toatele” i aso nei ua faapea foi ona ‘faaatoatoaina mo le galuega a auauna,’ i le avea ‘o tagata matutua’ faaleagaga, ua mauaa i le faatuatua, ‘ua lē o toe tama ninii,’ ma ‘i le alofa, ua tutupu ia te ia i mea uma, o le ulu lava ia, o Keriso’? (Faaaliga 7:9; Efeso 4:12-16) Ua ia i tatou uma lava mafuaaga lelei e loto faafetai ai.

Ua iloa faatasi ma le faapotopotoga Kerisiano le auauna faautauta ma le mafaufau, o lana galuega o le fafagaina faaleagaga o i tatou, o le tasi lea faamaoniga faapea o loo tatou maua aogā mai ia Ieova. (Mataio 24:45, 46) Ua tatou iai nei i le taimi na valoia o le faatasi mai o le Matai. Pe o faia e le “auauna” lana galuega? E ui lava i le auaoa o nei “aso e gata ai,” pe o faatumuina ea i tatou i se faamoemoe? Pe o ia te i tatou ea se fuafuaga aogā i le olaga? (2 Timoteo 3:1-5; Roma 5:5; 1 Timoteo 4:10) Ioe! Ma o lo tatou faamoemoe e lē o se mea e taumatemate peitai o se talitonuga mautinoa e fausia aʻe i luga o le faatuatua, lea i se isi itu, ua faavae i faamaoniga maumaututū.—Eperu 11:1.

Ua manino mai la faapea, ua tuuina mai ia i tatou e Ieova, o Lē Sili e Aumaia Aogā mo i tatou, le tele o mea e tatau ai ona tatou loto faafetai ai. Ua mulimuli mai ai ma le magafagafa le fesili:

O le ā o le a Ou Toe Taui atu ai ia Ieova?

Muamua lava, e tatau ona tatou faailoa atu faapea e lē o manaomia e Ieova se mea mai ia i tatou. O ia o lē ua fetalai mai, “O loo ia te au le ario, o loo ia te au foi le auro,” e faapena foi ona ia te ia o “manu e tataa i mauga e afe.” (Hakai 2:8; Salamo 50:10; Iopu 41:11) O le uiga o lenei mea e leai se auala e mafai ai ona tatou “faatau mai” le finagalo malie o Ieova; peitai ua faalaeiauina i tatou ina ia faia ni taulaga e ofoina atu ma le loto ia te ia. (Faatusatusa le 1 Nofoaiga a Tupu 29:14.) Ae peitai, e iai tulaga patino e manaomia i le faatagaina o i tatou e ofoina atu meaalofa ia Ieova.

“Ou te alu atu ma ni a i luma o Ieova, ou te ifo atu ma ni a i le Atua maualuga? Ou te alu atu ea i ona luma ma taulaga mu, ma tamai povi e tasi lo latou tausaga? E fiafia ea Ieova i afe o mamoe poa, ma manomano alia o tafe suāuu? Ou te tuuina atu ea laʻu ulumatua e sui aʻi loʻu solitulafono, o laʻu fanau to tino e sui aʻi le agasala a loʻu agaga? Sole, ua faaali atu e ia ia te oe le mea lelei; se a foi se mea e finagalo ai Ieova ia te oe, pe a le o ia mea, ia fai le amiotonu, ia naunau i le alofa, ma ia feooai ma lou Atua ma le loto faamaulalo?”—Mika 6:6-8.

Ua tatou aʻoaʻoina mai lenei mea faapea o mea manaomia e Ieova e magafagafa pea, e mauagofie pea. E faaopoopo atu i ai, na faasino mai e Iesu le mea ua muai manaomia e faapea e tatau ona saʻo la tatou faiā faatasi ma Ieova ma o tatou uso a tagata ina ia talia mai ai a tatou taulaga. (Mataio 5:23, 24) I le faataatiaina o le faavae saʻo, ua mafai ai ona tatou iloa nei faapea o i tatou uma lava e iai se mea e tuuina atu ia Ieova, i le talisapaia o lona lelei ia i tatou.

E Mafai Faapefea ona Tatou Faaaogā Mea ua ia i Tatou?

E manaomia ai le taimi, taumafaiga, ma i sina tulaga o tupe, ae maeu le faaeaga o le avea ma sui o Ieova i le galuega talaʻi! O lenei taulaga o viiga o se mea e mafai e i tatou uma ona avatu ia Ieova. O le faalogona lenei i ai o se toeaina paeonia e iai sana fanau laiti e toatolu:

“O le auai i le faaeaga o le auaunaga faataimi-atoa e aogā i so o se faataulagaina totino—ma e sili atu—auā o le auala aupito sili lea ona uigā e avatu ai le viiga i lo tatou Tamā faalelagi. Ua mafai ai foi faapena ona ou faia sina sao e faafetai atu ai ia te ia mo lona alofa tunoa ua faaalia totino ia te aʻu.”

Ua faaopoopo mai lana avā: “O se faaeaga moni le fesoasoani i laʻu tane ina ia paeonia. Ua mafai ai faapena e le aiga atoa ona iai se sao sili i le faiva, ma o le vaavaai atu i le aao mafola o Ieova ua saunia mea mo i matou i le auala faaleagaga ma le faaletino ua uunaia ai i matou e vivii atili atu ia te ia.”

Ua faasalalauina atu e le Sosaiete o le Olo Matamata Tusi Paia ma lomiga faale-Tusi Paia i se faavae tauofo mo le sili atu i le selau tausaga ma lomia nei tusi i ana lava masini lomitusi talu mai le 1920. O le taimi ma taumafaiga a tagata galulue tauofo i Peteli ina ia saunia lomiga uma ua tatou maua i aso nei, faatasi ai ma ni taumafaiga a tagata talaʻi o faapotopotoga ma paeonia e tufaina atu, ua oo ai ina avea, i se tasi faaupuga, o se foai faaopoopo i le galuega talaʻi matuā tāua.—Mataio 24:14.

Ae lē gata i lea, o Kerisiano o loo iai i atunuu e lelei i le tulaga tau tamaoaiga ua fiafia e iloa faapea o a latou meaalofa tupe agalelei, ua auina atu i le ofisa o le lala o le Sosaiete o le Olo Matamata i o latou atunuu, ua mafai ai e le toatele o o latou uso i isi vaega o le lalolagi ona faaaluina o latou taimi atoa i le talaʻiga ma le faia o soʻo. O misionare mai le Aʻoga faale-Tusi Paia a le Olomatamata o Kiliata, ovasia itumalo ma matagaluega, ma paeonia faapitoa o loo avatu uma lava i ai le fesoasoani ina ia faaauau ai i la latou auaunaga faataimi-atoa e ala i nei meaalofa tauofo.

Atonu e lē mafai ona e auauna i Peteli pe avea o se tagata auai i le Polokalama Faavaomalo o Tagata Galulue Tauofo i le Fausiaina. Ae atonu o ia te oe tupe e mafai ona lagolagosua ai ia i latou o loo auai i lenei galuega ae o i latou ia e leai ni “tupe faasili” e tausia ai i latou lava i lea mea. O le mea lea ua fesoasoani ai le faia o se tufatufaga tutusa, e pei ona faamatalaina i le 2 Korinito 8:14. O tusi na aumai faatasi ma ia foai ua faaaofia atu ai se tusi o loo mulimuli mai i se tuafafine matua o lē na tusi mai:

“Ua ou matuā loto faafetai mo faamanuiaga uma ua aumaia e Ieova ia te aʻu, ma e faaauau pea ona ou tatalo mo fuafuaga o le fausiaina ma le faalapotopotoga.”

Na faapea mai se tasi tuafafine: “E sili ona ou auina atu lenei tupe itiiti e fai ai se mea lelei faatiokarate na i lo o le tuu ai i se faletupe lena ua lē o toe umi ae lē taulau!”

Na faamatala mai e se uso i upu nei: “Ua fautuaina i tatou e Ieova ina ia faaaogā a tatou mea totino e vivii ai ia te ia ua avea o se auala o le puipuiga moni mai le matapeapea i tamaoaiga, le ‘vaega lona tolu’ o le faiga o mea amioleaga a Satani. Seʻi avea ia lenei avanoa ou te faapea atu ai maeu loʻu fiafia e tuuina atu faameaalofa se mea ina ia faatelevaveina ai le faatelega ua tuuina mai e Ieova ia i tatou, ma ou te faafetai ia te ia auā ua aumai e ia ia te aʻu mea ina ia mafai ona faaaogāina aʻu i le tulaga lenei.”

Meaalofa mai Ē Matutua ma Ē Iti

O se faalaeiauga le faitau i le maumauai faamaoni o tagata matutua o ē, e ui lava ina faamoemoe e faasaoina atu i le faaiʻuga o lenei faiga o mea, a ua faamautinoa mai faapea, e ala i le faia o se uili (mavaega) talafeagai, ina ia maua e le galuega o le Malo ni aogā pe a oo ina latou maliliu. O nisi faamatalaga na maua mai i tagata tausi mavaega, e faaopoopo mai i uiga lelei faaalia o na tagata e ona mavaega, o loo aofia ai ia:

“O se tagata agalelei tele i tagata uma, i lona olaga atoa . . . sa alofa o ia ia Ieova ma lana foafoaga.”

“O ona popolega muamua lava, sa avea pea o faanaunauga o le Malo.”

“Na ia ausia lona taui faalelagi ina ua mavae le 70 tausaga o le auaunaga faamaoni . . . sa manao pea o ia ina ia faalautele atu le upu moni i ana mea faitino.”

Tatou te olioli foi e faalogo atu i ē iti, ua naunau e faaaogāina a latou meafaitino mo le galuega a Ieova. O se tasi o tusi na maua mai i le ofisa o le Sosaiete i Peretania na aumai mai i se teine talaʻi e aʻoga. Na ia faamatala mai faapea na manumalo i le tulaga muamua i se tauvaga tusigātala. Na ia fafao mai ai le tupe atoa o lona togi. O lomiga a le Sosaiete sa avea ma puna atoa o lana tala i “Le Taʻutinoga Faa-Kerisiano,” o lea sa ia lagona ai o le tupe, o le tupe e a Ieova.

Ina ua uma ona fesili atu pe o le ā o le a ia toe taui atu ai ia Ieova, ua faaauau mai ai le tusitala o le Salamo 116 i fuaiupu e 13 ma le 14 i le faapea mai: “Ou te avae le ipu o le olataga, ma ou valaau atu i le suafa o Ieova. Ou te avatua ia Ieova i luma o lona nuu uma lava o mea na ou tauto ai.” O le talisapaia o le meaalofa tautele o le faaolataga mai ia Ieova e ala i lona Alo, ua iai ia i tatou se lagona e uunaia ai, e pei ona faia e le faisalamo, valaau ia te Ia ma tausi i a tatou folafolaga ia te Ia.

E tele aogā ua tatou maua mai ia Ieova, ma so o se mea tatou te mafaia ona fai e taui atu ai e foliga mai e itiiti i se faatusatusaga. O lea, maeu le talafeagai i le avea o se faaupuga o le loto faafetai, tatou te faia ai mea uma lava tatou te mafaia, i auala uma! “Ou te fai le taulaga o le viiga ia te oe, ou te valaau foi i le suafa o Ieova.”—Salamo 116:17.

[Pusa i le itulau 25]

AUALA E FAIMEAALOFA AI NISI I LE GALUEGA O LE MALO

◻ MEAALOFA: O foai tauofo o tupe e mafai ona auina tuusaʻo atu i le International Bible Students Association, P.O. Box 673, Apia, Western Samoa, po o le ofisa o le lala o le Sosaiete i lo outou atunuu. O mea totino e pei o fanua, faapea foi ma maatāua po o isi lava mea tautele, e mafai foi ona foai atu. O se tusi puupuu e taʻua ai o le mea o le foai tuusaʻo, e tatau ona aumai faatasi ma nei meaalofa.

◻ O LE FAATULAGAGA O MEAALOFA FAATUUTUUGA: E mafai ona avatu tupe i le International Bible Students Association po o le Watch Tower Society ina ia tausi ai i se mavaega, faatasi ma se sauniuniga faapea ina neʻi teʻi ua manaomia totino e le tagata, e mafai ona toe faafoi atu i lē na foaiina mai.

◻ INISIUA: E mafai foi ona taʻua le International Bible Students Association po o le Watch Tower Society o se maua aogā mai se polisia mo le inisiuaina o le ola pe i se fuafuaga tau litaea. E tatau ona faailoa atu i le Sosaiete so o se faatulagaga faapena.

◻ TAUSI TUSI: E mafai ona tuuina atu i lalo o le tausiga mo le Sosaiete tupe o loo teuina i faletupe. Afai e faia lenei mea, faamolemole ia faailoa atu i le Sosaiete. O sea, ma tupe e teu mo le saogalemu, ma mea totino e mafai foi ona foai atu i lalo o se faatulagaga ina ia aogā mo lē na tuuina mai i le taimi a o soifua pea. O lenei auala ua soloia ai le taugata ma le lē mautonu o le faatagana faaletulafono o se uili, ae ua faamautinoaina faapea o le a maua e le Sosaiete le mea totino pe a maliu lea tagata.

◻ UILI (MAVAEGA): O mea totino po o tupe e mafai ona tuuina atu i le International Bible Students Association po o le Watch Tower Society e ala i le faia o se uili tusitusia faaletulafono. E tatau ona auina atu se kopi i le Sosaiete.

Mo nisi faamatalaga ma ni fautuaga e faatatau i na mataupu, ia tusi atu i le International Bible Students Association, P.O. Box 673, Apia, Western Samoa, po o le ofisa o le lala o le Sosaiete i lo outou atunuu.