Ua Molia Papelonia le Aai Tele

I SE faasologa o tauaofiaga i le lalolagi atoa i le 1988-89, sa lagolagoina ai e le faitau miliona o Molimau a Ieova le iuga fono, e faaalia ai lo latou inoino i amioga a Papelonia le Aai Tele, o le emepaea i le lalolagi atoa o lotu sese—a e maise lava e pei ona fai ai ma sui Kerisinetoma. Atonu e fesili nisi tagata faamaoni, E lē o se tulaga ea lea ua malosi tele? E leai, e matuā leai lava! Pe a matou vaai i le taʻuleagaina ma le toa e perofeta o Isaraelu anamua le ifo i tupua i o latou aso, ma le gagana malosi sa faailoa ai e Iesu le faatagāfai o faigā lotu o ona taimi, matou te talitonu ai la o lenei tulaga ua taʻusaʻoina atoatoa. Ua oo lava foi ina poloaiina e le Atua.—Isaia 24:1-6; Ieremia 7:16-20; Mataio 23:9-13, 27, 28, 37-39.

O lea i luga o le ā le faavae matou te inoino ai i amioga a Papelonia le Aai Tele? O le ā le faamaoniga faatala faasolopito ua ia i matou o le lē taulau e lotu ona faamamalu le Alii Pule Aoao moni o le vateatea, o Ieova?

Inoino Papelonia Faaonaponei i le Suafa

O le Alii Pule Aoao o le vateatea e lē faapea e lē i ai sona suafa e iloa ai. Ua ia faailoaina o ia lava faa 7,000 taimi i le Tusi Paia, o Ieova. Ua ia tuuina le matuā faatāuaina i lona suafa. Ua taʻua e le tulafono lona tolu o Tulafono e sefulu e faapea: “Aua e te taʻu fua le suafa o Ieova lou Atua; auā e le faasaoina e Ieova o lē taʻu fua i lona suafa.” Ma sa faamatilatila foi e Iesu le suafa o lona Tamā i le Tatalo a le Alii, e faapea: “Ia paia lou suafa.”—Esoto 20:7; Mataio 6:9.

O le faamaumauga a Kerisinetoma i le faamamaluina o le suafa o le Atua e faanoanoa ai. E oo lava i le Tusi Paia a King James o le tausaga 1611, na te faaaogāina ai le suafa Ieova na o le faafitu taimi.a O isi faaliliuga ua matuā aveesea lava le suafa. E lē taulau i le tele o lotu ona latou faamamaluina. Na i lo lena, ua latou faamaualugaina la latou Tasitolu “paia” ma, i nisi tulaga, o Maria lea e taʻua faapea o le Tinā o le Atua ua faasilisilia i le Atua o le Tusi Paia. Ua faatagaina le suafa o Ieova e magoto ifo pe a faatatau atu i ai ua oo ina faagaloina.b

E moni e iloaina e Isilama na o le Atua e tasi, o lē ua latou taʻua o Allah, e tusa ai ma la latou tusi paia, o le Koran. A e peitai ua latou lē taulau ona faailoaina lona igoa e pei ona uluai faaalia i le Tusi Paia a itiiti mai tausaga e lua afe a o leʻi i ai le Koran. E tapuaia e Hinitu atua ma atua fafine e faitau miliona, peitai e lē o i ai Ieova i totonu o na atua.

E tulaga ese le lotu Iutaia i le avea ma ni ē e tetee e tusa ai ma le suafa o le Atua. Mo le faitau afe o tausaga, ua fai mai Iutaia o i latou o tagata lauiloa e uiga i le suafa o le Atua, a e peitai ona o mafuaaga o la latou uputuu, ua mafua ai ona latou avea le suafa moni o le Atua e paʻū atu i le matuā lē faaaogāina.

O lea la, i le avea o ni molimau o le Alii Pule Aoao o Ieova, ua tatau ai ona matou faailoa atu lo matou inoino i le tuulafoaia e Papelonia o le suafa paia o le Atua.

Le Pogai Matou te Inoino ai i Aʻoaʻoga Faa-Papelonia

O le faitau miliona o tagata ua faavaleaina ma tuuina i le mataʻu ona o le aʻoaʻoga faa-Papelonia o le solu e lē mafai ona oti. Mai lava i taimi anamua, ua faavaleaina ai e lotu sese le mataʻu i le solu ua faapuapuagatiaina e faavavau i le afi i hele pe a mavae le oti. O se isi toe faaleleia atamai o lena aʻoaʻoga o le pagatia e lē tumau i le afi i pulekatolio. E totogiina tupe e tagata faamaoni ina ia faia Misasa mo ē ua oti, a e lē taitai ona iloa pe o afea e mafai ai ona faamuta le totogiina! E leai se faavae i le Tusi Paia mo nei aʻoaʻoga lē faaaloalo.—Faatusatusa le Ieremia 7:31.

O le mea moni, ua aʻoaʻoina e le Tusi Paia e faapea o le tagata o se solu e ola, a e mafai ona oti. Sa leʻi folafolaina ia Atamu se afi i hele po o pulekatolio ona o lona lē usitai—a e na o le oti. Ua na ona taʻua e faapea, “o le oti, o le totogi lea o le agasala.” (Roma 6:23; Kenese 2:7, 17; 3:19) O le faamoemoe faale-Tusi Paia mo ē ua oti, e lē faavae i se solu e lē mafai ona oti, a e peitai, na i lo lena, i le folafolaga a le Atua o se toetu i le olaga lelei atoatoa i se lalolagi parataiso.—Ioane 5:28, 29; Faaaliga 21:1-4.

A e peitai ane o le isi aʻoaʻoga faa-Papelonia o le Tasitolu “paia.” O lenei aʻoaʻoga o peresona e toatolu i totonu o le Atua e toatasi sa lē taitai avea ma se vaega o le faatuatuaga o Eperu anamua. (Teuteronome 5:6, 7; 6:4) Sa mautinoa ona lē taitai ona talitonu pe aʻoaʻoina e Iesu, o se tagata Iutaia lava ia, e faapea o ia sa avea o le Atua e ona le malosi uma lava. Sa leai sana vaega na faia i so o se aʻoaʻoga faa-Papelonia po o talitonuga i se tasitolu.—Mareko 12:29; 13:32; Ioane 5:19, 30; 14:28; 20:17.

O le mea lea, matou te teena ai aʻoaʻoga lē faaaloalo a Papelonia e pei ona aʻoaʻoina i lotu sese o le lalolagi. Matou te avatu le tapuaiga i le Atua moni e toatasi, o Ieova, e ala i lona Alo, o lē na avea ma “togiola foi o ia” mo agasala e lē gata i Kerisiano faauuina a e faapea foi le lalolagi atoa o le fanau a tagata.—1 Ioane 2:2.

Le Pogai Matou te Teena ai Filosofia e Tetee i le Atua

Ua auē pope ma taʻitaʻi lotu a Kerisinetoma i le oso faafuasei aʻe o le lē talitonu i le i ai o se Atua, ma ua faaaogā e le toatele e taʻusaʻoina ai lo latou lagolagoina o vaega faapolotiki ua taʻua o le right wing. A e peitai, e tatau ona fai le fesili: O ai na lē amanaiaina le lē faamasinotonu ma feeseeseaiga, ia ua mafua ai ona tupu aʻe le lē talitonu i le i ai o se Atua, ae maise lava i le senituri ua mavae? Sa tupu lea mea i se auala iloga i nofoaga o Kerisinetoma. Mo se faaaʻoaʻoga, sa faifaimea faatasi le Lotu Orthodox a Rusia ma o latou emeperoa (czars), o ē na latou matuā sauaina ma le lē alolofa tagata. O le leai o ni tapulaa moni faa-Kerisiano i le vaega a i latou ua faapea mai o i latou o sui o le Atua, na fai lea ma sao i le tulaga na faavaeina ai le faapunafanau o le lē talitonu i le i ai o se Atua.

Ua opoopoina foi e lotu o Kerisinetoma le aʻoaʻoga e lē o faamamaluina ai Lē na Foafoaina Mea o le faaevolusione. Ua latou faafesootaia le lavelave ma le eseese o ituaiga o ola e sili atu i le miliona i malosiaga e leai ni faavae pe faamaonia faalenatura. O le mea moni, ua latou faapea mai o lenei eseesega na atiina aʻe e ala i se faasologa o ni mea aogā e teʻi lava ua i ai. O sea filosofia ua lē manaomia ai le Atua ma leai se tasi e taunapa i ai le tagata. Ua oo ina avea amioga mamā o se mataupu o le filifiliga totino. (Salamo 14:1) O se tasi o āuga e faapea ua oo atu nei le faapaʻū tama i le faitau sefulu miliona i tausaga taitasi—i atunuu e fai mai o atunuu lotu!

Matou te teena nei filosofia ma amioga e tetee i le Atua. Matou te tapuai ia Ieova, o “le o soifua e faavavau faavavau lava, o le na faia le lagi ma mea o i ai, ma le fanua ma mea o i ai, ma le sami ma mea o i ai.”—Faaaliga 10:6; 19:6.

Le Pogai Matou te Inoino ai i Fua o Papelonia le Aai Tele

Ua lē taulau ia Kerisinetoma ona utagia feau o lapataiga i faapotopotoga e fitu ua faataatia i le Faaaliga mataupu e 2 ma le 3. O nei feau ua fautuaina ai faasaga i faiga o fevaevaeaiga faalotu, ifoga i tupua, faitaaga, ma faasaga i le faaleogalua ma le faatalalē.

O le a faaalia e se asiasiga toetoe i so o se nofoaga o tapuaiga pe toafia tagata lotu ua faamaualugaina mea faiola i lo Lē na Foafoaina Mea. E faapefea? E auala i o latou faatusa ma faaaloaloga loloto i faatusa ma a latou tapuaiga e avatu i “sagato [tagata paia],” faatusa o Maria, ma koluse.—Faatusatusa le Salamo 115:2-8; 1 Korinito 5:7; 1 Ioane 5:21.

I o latou tulaga, ua i ai i upu a Paulo se faataunuuga: “Auā foi na iloa e i latou le Atua, a ua le vivii ma faafetai atu ia te ia, . . . ua vālea i latou, a o faafiapopoto ia i latou, ua latou fesuiai foi le mamalu o le Atua soifua pea lava ma le faatagata o le tino o le tagata iu vale, ma manu felelei, ma manu vaefa, ma mea fetolofi.”—Roma 1:21-23.

Le Pogai Matou te Taʻusalaina ai Amioga Lē Mamā a Papelonia

O le 20 tausaga ua mavae ua vaaia ai le faamaonia po o le faatagaina o le faatauatane e avea o se ituaiga o olaga ua talia. E faitau miliona tauatane ua “o atu ma le lē toe natia” ma i aso nei ua savavali i alatetele, faaalialia o latou “Lotomimita Tauatane.” O le ā le silafaga a le Atua e uiga i lo latou faatauatane?

Sa taʻua manino mai e le Tusi Paia i le 3,500 tausaga ua mavae: “Aua lua te momoe ma se tane, e pei ona momoe ma se fafine; o le mea e inosia lava lea.” (Levitiko 18:22) Ma toeitiiti 2,000 tausaga ua mavae sa faaalia ai e Paulo e faapea o faatulagaga a le Atua e leʻi suia lava ina ua ia tusi: “O le mea lea na tuuina atu ai i latou e le Atua i manao e masiasi ai; auā o latou fafine foi, ua latou fesuiai le tu e tatau ma le tu e le tatau; e faapea foi tane, ua tuua e i latou le tu e tatau i le fafine, ina ua mu i lo latou femanaoai; o tane ua fefaiai i latou i mea e masiasi ai; ua tauia foi i latou i o latou lava tino e tusa ma lo latou sese.”—Roma 1:26, 27; 1 Korinito 6:9, 10; 1 Timoteo 1:10.

A e peitai ane, e toatele naʻuā taʻitaʻi lotu o Kerisinetoma o loo faia le faatauatane e faapea, ua latou mafaia ai ona faavaeina se taaʻiga malosi ina ia faatulafonoina faatauatane i le tele o lotu tetele. Latou te matuā mananao faapea ia aloaia la latou ituaiga o olaga o ola ai ma ia latou taliaina le tulaga faafaifeau. O se mea na tupu e tusa ai ma le manatu o le lotu Porotesano pito sili ona tele i Kanata, o le Lotu Tuufaatasi a Kanata, sa palotaina e ona taʻitaʻi e 205 e ese i le 160 ia Aokuso 24, 1988, e ioe i le faatagaina o tagata tauatane i le galuega faafaifeau.

Le Pogai Matou te Inoino ai i le Talitane Faaleagaga a Papelonia

Ua taʻuleagaina e le Faaaliga le faitaaga a Papelonia ma “tupu o le lalolagi,” o ona taʻitaʻi faapolotiki. Ua faaataina le fafine talitane o loo tietie “i vai e tele,” o lona uiga “o nuu ia, ma motu o tagata, ma atu nuu, ma gagana eseese.” (Faaaliga 17:1, 2, 15) I le i ai o se faiā mafana ma taʻitaʻi faapolotiki, ua faaaogāina ai i le auala lē natia po o le natia foi e faigā lotu sese i senituri ua mavae lana taaʻiga i le faamalosia ma le faavaleaina o tagata lautele.

O faaaʻoaʻoga o lenei pulega malosi o ioega, po o maliega, na sainia e le Vatikana ma pule faa-Nasi ma le Fascist i lenei lona 20 senituri. O se iuga, o taaʻiga faalotu i luga o lafu na taʻitaʻiina atu ai i le usiusitai atoatoa i taʻitaʻi lē alolofa. I le 1929 na faaiua ai e le Vatikana se ioega ma le pule taʻitaʻi tautalatasi a le Fascist o Benito Mussolini. O le ā na sosoo mai ai i Siamani? I le tuuina atu ai e le Katinale Siamani o Faulhaber upu o loo mulimuli mai ia Pio XI, na avatu ai le malamalamaga i mafaufauga o le pope e uiga ia Hitila: “Ua ou fiafia; ua avea o ia ma taʻitaʻi faalemalo muamua ua tautala faasaga i le faa-Bolshevism.” Sa mulimuli ane ona faapea mai lea o Faulhaber: “O laʻu malaga i Roma ua faamautinoa ai le mea atonu na ou masalomia mo se taimi umi. I Roma, o le National Socialism ma le Fascism e manatu ua na o lea le faaolataga mai le faa-Komunisi ma le faa-Bolshevism.”

Sa tetee epikopō Katoliko i Siamani i le filosofia faa-Nasi a o lumanai le 1933. A e pei ona taʻua e le tusitala Siamani o Klaus Scholder i lana tusi The Churches and The Third Reich, sa faatonuina ai epikopō e le amepasa o le Vatikana i Siamani, o Katinale Pasieli, ina ia toe iloiloina ma suia o latou uiga faasaga i le National Socialism. O le ā na uunaʻiaina lenei suiga? Ona o le faamoemoe o le ioega i le va o le Third Reich (Pulega Lona Tolu) ma le Vatikana, lea na faaiuina ia Iulai 20, 1933.

Ua lipotia mai e Klaus Scholder: “I le palota ma le pelepesite ia Novema 12 [1933] na seleseleina ai e Hitila fua o le ioega a le Reich [Pulega] i le maualuga o ana palota ʻioe’ e faateʻia ai, e sili aʻe i vaega uma Katoliko maualuluga i le aufai palota.”

E ui lava ina toaitiiti ni taʻitaʻi Porotesano na faaalia le tetee i le pulea e Nasi i le 1933, a e sa leʻi pine a e lē toe lagona o latou leo i le alaga tele o le lotonuu. Ua faamatalaina e Scholder: “Sa manino se faateleina o le nofo sauni i le lotu Porotesano e lafoaia le faaeteetega na i ai i aso ua mavae ma nei la, ua iu lava foi ina auai i le maelega faaleatunuu. . . . Mo le taimi muamua na aliai mai ai ni faamatalaga faalemalo a le lotu, lea e lagolagoina ai le Reich [Pulega] fou e aunoa ma le toe taofiofia.” O le mea moni, na faatauina atu e le faa-Porotesano ia lava i le lotonuu faa-Nasi ma avea ma ana auauna fafine, e pei ona sa faia faapea e le lotu Katoliko.

I le faagasologa mai o senituri, ua faaalia ai e faamaumauga faatala faasolopito le aumea faatasi o lotu sese ma vasega o pulega maualuluga sili ona malolosi ma na faamalosia lo latou mamalu i le faaleagaina o tagata lautele. Sa leʻi faaalia e taʻitaʻi lotu a le lalolagi le ‘finagalo o Keriso,’ o ē ua sailia ma le galala le pule, mea totino ma le ʻoa. I le avea o ni Molimau a Ieova, matou te inoino ai i sea gaoioiga talitane faaleagaga.—Ioane 17:16; Roma 15:5; Faaaliga 18:3.

Le Pogai Matou te Inoino ai i le Nofosala o Papelonia i le Toto

I le tusi o Faaaliga, ua tuuaʻia ai Papelonia le Aai Tele i le tele naunau o le nofosala i le toto: “Na ou iloa foi le fafine ua onā i le toto o le au paia ma le toto o e na molimau ia Iesu. Ua iloa foi ia te oe le toto o perofeta ma le au paia, ma i latou uma ua fasiotia i le lalolagi.”—Faaaliga 17:6; 18:24.

O le tala faasolopito o lotu sese o se tala faasolopito o le feitagai ma le faamasaa toto, ma Kerisinetoma e sili atu ona nofosala i le toto. E lua taua a le lalolagi sa amataina i le siomaga o atunuu ua taʻua o atunuu Kerisiano. Na saili atu e taʻitaʻi faapolotiki “Kerisiano” le fesoasoani a auupega i le 1914 ma le 1939, ma na avatuina e le au taʻitaʻi lotu o atunuu uma na auai i fetauaiga a latou faamanuiaga. Ua taʻua e The Columbia History of the World e uiga i le Taua Muamua a le Lalolagi e faapea: “Sa faaitiitia le tāua o le upu moni faatasi ai ma le ola, ma sa tau leai se leo na lagonaina i ni teteega. Sa taʻimua ē na leoleoina le afioga a le Atua i vaega faafitafita. O le taua atoa na oo ina avea ma feitagai atoa.” (O upu faasisipa e a matou.) Sa uunaʻia e faifeau a vaega au o le eleele a latou fitafita faatasi ma le maelega lotonuu a o avea talavou o itu uma e lua ma fitafita ua tuuina atu ia faamanunuaina i meatau. Ua taʻua e le tusi lava lea e tasi o tala faasolopito: “O le faaoonaina pea lava pea o mafaufau o tagata i le pasae faafuaseʻi aʻe o le lotonuu . . . ua faalavelavea atili ai le sailiga mo le filemu.”

Ua faaauau pea e lotu i le lalolagi atoa ona faapogaia le feitagai, a o vevela fetauaiga i le va o Iutaia ma Musalimi, Hinitu ma Sikh, Katoliko ma Porotesano, Musalimi ma Hinitu, Puta ma Hinitu. Ioe, ua faaauau pea ona saosaolaumea lotu sese i le fasiotia o “i latou uma ua fasiotia i le lalolagi.”—Faaaliga 18:24.

O lea la, e taʻuleagaina ai e Molimau a Ieova lotu sese o le fafine talitane e nofosala i le toto, o Papelonia le Aai Tele. Matou te faasilasilaina atu i le lalolagi le auala moni e tasi i le filemu ma le tapuaiga moni—o le liliu atu lea i le Alii Pule Aoao o le vateatea, o Ieova le Atua, e auala i Lē na ia auina mai i le lalolagi, o le Keriso, po o le Mesia, o Iesu. O lona uiga o le taliaina lea o le Malo o le Atua o se malo amiotonu, o le malo e faavavau ua na o lea le malo e mafai ona faamalie manaoga o le fanau a tagata. Ma o lona uiga foi ua oo nei i le taimi e usitai ai i le faatonuga: “Loʻu nuu e, ia outou o ese ia te ia [Papelonia le Aai Tele], ina neʻi faatasia outou i ana agasala, ina neʻi tofusia foi outou i ona mala.”—Faaaliga 18:4; Tanielu 2:44; Ioane 17:3.

[Faaopoopoga i lalo]